இந்து, முஸ்லிம் இடையே இருக்கும் உண்மை நிலை: வைரலாகும் விவகாரம்!-Samayam Tamil

இந்து, முஸ்லிம் இடையே இருக்கும் உண்மை நிலை: வைரலாகும் விவகாரம்!-Samayam Tamil

இந்து, முஸ்லிம் என்றாலே ஏதோ பகையாளிகள் போல சில ஊடகங்கள் உட்பட, சில அரசியல் கட்சிகளும் தொடர்ந்து பொய்யாகப் பரப்புரை செய்து வருகிறது. அதிலும் குறிப்பாகக் குஜராத் என்றாலே, அவ்வளவுதான் அங்கு மனிதர்களே வாழாததைப்போல மதம் பிடித்தவர்கள் சித்தரிக்கத் தொடங்கி விடுகிறார்கள்.

இந்நிலையில், நாட்டில் பரவலாக இரு மதங்கள் குறித்துப் பரப்பப்படும் பொய் பிரச்சாரங்களுக்கு முற்றுப்புள்ளி வைக்கும் வகையில் சமூக வலைத்தளங்களில் ஒரு போட்டோ வைரலாக உலா வருகிறது. இப்போதைய நேரத்தில் பலரின் வாட்ஸ் ஆப் ஸ்டேட்டசிலும் இந்த படம் தனது இடத்தை தக்க வைத்துக் கொண்டுள்ளது.

பெரிதாக நடக்கும் விஷயமல்ல, ஆச்சரியத்துடன் இதை அணுக வேண்டிய சூழலும் இல்லை என்பதை எளிமையாகக் காட்டுவதைப் போல தெற்கு குஜராத்தில் எடுக்கப்பட்ட இந்த புகைப்படம் காட்டுகிறது. தெற்கு குஹராத்தில் உள்ள தாத்ரா நகர் ஹவேலி யூனியன் பிரதேசம் சில்வா என்ற பகுதியில், மொகரம் பண்டிகையையொட்டி இஸ்லாமியச் சகோதரர்கள் டாசியா என்ற ஊர்வலத்தை செப். 10ஆம் தேதி மேற்கொண்டனர்.

அதே நேரத்தில், சம்பந்தப்பட்ட பகுதியில் வாழும் இந்து இனத்தைச் சேர்ந்தவர்களும் விநாயகர் சதுர்த்தி முடிந்த வடிந்ததையடுத்து, சிலைகளைக் கரைக்க விநாயக விசர்ஜன் என்ற பெயரில் ஊர்வலம் மேற்கொண்டனர். இந்த இரு மதங்களைச் சேர்ந்தவர்கள் மேற்கொண்டிருந்த ஊர்வலம் ஒரு கட்டத்தில், அதாவது ஷாகித் செளக் என்ற இடத்தில் நேர் எதிரில் சந்திக்க வேண்டிய சூழல் ஏற்பட்டது. இடையில் இவர்களைப் பிரித்தது சாலையில் போடப்பட்டிருந்த தடுப்பு மட்டுமே.

எனினும், ஊர்வல நேரத்தில் இரண்டு தரப்பினரும் சாலையில் அமைக்கப்பட்டிருந்த தடுப்புகள் மீதெறி கை குலுக்கு ஊர்வலத்துக்கான ஆதரவையும், வாழ்த்துக்களையும் தெரிவித்துக் கொண்டனர். அதிலும் சில இளைஞர்கள் பாகுபாடின்றி கட்டி அனைத்து தங்கள் வாழ்த்துக்களைத் தெரிவித்துக் கொண்டனர். இந்த சம்பவம் அந்த பக்கம் சாலையோரங்களில் இருந்த மக்களின் கண்களில் ஆனந்தத்தைத் தெளித்துச் சென்றது. பாதுகாப்புப் பணியில் ஈடுப்பட்டிருந்த காவல்துறை அதிகாரிகளும், மரியாதையோடு இந்த நிகழ்வை ரசித்தனர்.

இந்த நிகழ்வுக்குப்பின் விநாயகர் சிலைகள் கரைப்பதுக்குக் கொண்டு செல்லப்பட்டது. அதே வேலையில், டாசிய ஊர்வலத்தை அந்த பகுதியிலிருந்த பள்ளிவாசலில் முடித்துக் கொண்டனர். இந்த நிகழ்வு குறித்து சில்வாசா பகுதிவாசி ஒருவர் பத்திரிக்கைகளிடம் கூறுகையில், “இந்த பகுதியில் சுமார் 4 ஆயிரம் பேர் வசித்து வருகிறோம். இரு மதங்கள் மட்டுமில்லாது பல மதங்களைப் பின்பற்றுபவர்கள் வாழ்ந்தாலும், அனைவரும் ஒரு மதத்தினராக நினைத்தே வாழ்கிறோம்” என்றார்.

மேலும் டாசிய ஊர்வலத்தில் பங்கேற்றிருந்த அரீப் மேனன், தனியார் பத்திரிக்கைக்கு அளித்த பேட்டியில், “இந்த புகைப்படத்தை யார் எடுத்தார் என்பது தெரியவில்லை. எனது ட்விட்டர் பக்கத்தில் காட்டியது, நான் இதை ஷேர் செய்தேன், சில மணி நேரங்களில் நாடு முழுவதும் இந்த படம் குறித்துப் பேசத் தொடங்கிவிட்டனர்.” எனக் கூறினார்.

இந்த பகுதியில் மட்டுமில்லாது பெரும்பாலான இடங்களில், முஸ்லிம்களும் இந்துக்களும் இணக்கமாகத் தான் இருந்து வருகின்றனர். சில மதத் தலைவர்கள் ஏற்படுத்தும் சில சர்ச்சைகள் காரணமாகத் தான் பல குழப்பங்கள் மக்கள் மத்தியில் ஏற்படுகிறது. இந்த புகைப்படம் காட்டுவதே நாட்டின் உண்மை நிலை எனப் பெரும்பாலானவர்கள் சமூக வலைத்தளங்களில் கூறி வருகிறார்கள்.

Leave a Comment

This site uses Akismet to reduce spam. Learn how your comment data is processed.