புற்று மண் பிரசாதமாக வழங்கப்படும் தஞ்சாவூர் புன்னைநல்லூர் மாரியம்மன் கோயில்

தஞ்சாவூர் அரண்மனை தேவஸ்தானத்திற்குட்பட்ட 88 கோயில்களில் புன்னைநல்லூர் – மாரியம்மன் கோயிலும் ஒன்றாகும். இத்தலத்தில் அம்மன் புற்று வடிவில் சுயம்பு மூர்த்தியாக அருள்பாலிக்கிறார். மூலவர் புற்று மண்ணால் ஆனதால் மூலஸ்தான அம்பாளுக்கு அபிஷேகங்கள் செய்யபடுவதில்லை. தைலக்காப்பு சாற்றப்படுகிறது. அம்பாளுக்கு 5 வருடத்திற்கு ஒரு முறை ஒரு மண்டலம் தைலக்காப்பு அபிஷேகம் நடைபெறும்.

அம்மையால் பாதிக்கப்பட்டவர்கள் பிரார்த்தனைக்காக இங்கு தங்கியிருந்து குணமடைந்து செல்கின்றனர். ஆலயத்திற்கு வரும் பக்தர்கள் மாவிளக்கு எடுப்பது, உப்பு, மிளகு இடுவது, வேப்பஞ்சேலையை உடுத்தி அக்கினி சட்டி எடுப்பது, கோயில் தீர்த்தமான வெல்லக்குளத்தில் வெல்லம் வாங்கி போடுவதும் ஆகியவை பக்தர்களால் செய்யப்படுகிறது. மேலும் நோயாளிகளுக்கு புற்று மண் பிரசாதமாக வழங்கப்படுகிறது.

தஞ்சை ஆண்ட சோழ பேரரசர்கள் தஞ்சையைச் சுற்றிலும் எட்டுத் திக்குகளிலும் அஷ்ட சக்திகளை காவல் தெய்வமாக அமைத்தார். அவ்வாறு தஞ்சைக்கு கீழ்ப்புறத்தில் அமையப் பெற்ற சக்தியே புன்னைநல்லூர் மாரியம்மன் என்று “சோழசம்பு” எனும் நூல் கூறுகிறது.

இக்கோவில் உருவானதற்கு பல காரண கதைகள் சொல்லப்படுகின்றன. அவற்றில் சில!

அரசனின் கனவில் அம்பிகை

தஞ்சையை ஆண்ட வெங்கோஜி மகாராஜா 1680ஆம் ஆண்டு திருத்தல யாத்திரை செய்து கண்ணபுரம் என்னும் சமயபுரத்தில் தங்கி வழிபாடு செய்தார். அன்றிரவு அம்பிகை அரசனின் கனவில் தோன்றி தஞ்சைக்கு கிழக்கே 5 கி.மீ. தூரத்தில் உள்ள புன்னைக்காட்டில் புற்று உருவாய் உள்ள தன்னை வந்து சேவிக்கும்படி கூறவே அவ்வரசன் தலைநகராகிய தஞ்சைக்கு வந்து புன்னைகாட்டிற்கு வழியமைத்து அம்பிகை இருப்பிடத்தைக் கண்டு சிறிய ஊர் அமைத்து புன்னைநல்லூர் என்று பெயரிட்டு அக்கிராமத்தை ஆலயத்திற்கு வழங்கினான்.

மராட்டிய மன்னர்கள்

மராட்டிய மன்னன் துளஜேந்திர ராஜாவின் புதல்விக்கு அம்மை நோயினால் கண் பார்வை போய்விட்டதாகவும் அவன் அன்னையை மனமுருக வேண்டி அவள் சந்நிதியில் மன்றாடியபோது அந்தப் பெண்ணுக்குக் கண் பார்வை வந்துவிட்டதாகவும் ஒரு வரலாறு உண்டு. மன்னன் துளஜேந்திர ராஜா அன்னைக்கு அழகிய கோயிலை எழுப்பினான். புன்னை வனத்தில் மறைந்திருந்ததால் அவள் புன்னைநல்லூராள் என்றே அழைக்கப்பட்டாள்.

தஞ்சையில் மராட்டிய மன்னர்கள் காலத்தில் ரெசிடெண்ட் என்ற அந்தஸ்த்தில் இருந்த ஒரு ஆங்கிலேய அதிகாரிக்கும் இந்த அம்மன் தனது சக்தியைக் காட்டியதாகவும் அதுமுதல் அந்த ஆங்கிலேயனும் அன்னையின் அடிபணிந்து பக்தனாக இருந்ததாகவும் தெரிகிறது. மராட்டிய மன்னர்களே இக்கோவிலை பெரிய கோவிலாக கட்டி இருப்பதாக வரலாறு கூறுகிறது.

சரபோஜி மன்னர்

இந்த வரலாறுகளை பார்க்கும் போது அம்மன் மிகவும் சக்தி வாய்ந்த அம்மன் என்பது தெரிகிறது. சரபோஜி மன்னர் தஞ்சையை ஆண்ட காலத்தில் மகா மண்டபம், நர்த்தன மண்டபம், கோபுரம், 2வது பெரிய சுற்றுச்சுவர் கட்டி பெரும் திருப்பணி செய்யப்பட்டது.

மன்னர் சிவாஜி

மராட்டிய மன்னரான சிவாஜி இக்கோயிலுக்கு 3வது திருச்சுற்றும் ராணி காமாட்சியம்பா பாயி சாகேப் உணவுக் கூடம் மற்றும் வெளிமண்டபமும் கட்டி கொடுத்துள்ளனர் என்பது குறிப்பிடத்தக்க தகவல்கள்.

இக்கோவிலில் காலை 5.30 மணி முதல் இரவு 9 மணி வரை நடை திறந்திருக்கும். ஆவணி ஞாயிற்றுக்கிழமைகளில் காலை 3 மணி முதல் இரவு 11 மணி வரை திறந்திருக்கும். நான்கு கால பூஜை நடைபெறுகிறது.

திருவிழாக்கள் :

ஆடி – கடைசி ஞாயிறு முத்துபல்லக்கு

ஆவணி – கடைசி ஞாயிறு “தேரோட்டம்”

புரட்டாசி – தெப்ப உற்சவம், நவராத்திரி.

முகவரி

அருள்மிகு மாரியம்மன் திருக்கோயில், புன்னைநல்லூர் – 613 501, தஞ்சாவூர் மாவட்டம்.

தொலைபேசி எண் : 04362- 267740

கடைக்கண்ணால் நீபார்த்தால் கடைத்தேறிப் போவேனம்மா

பாரளந்தோன் தங்கையரே பாலகனைக் காருமம்மா

பேரரசி மாரிமுத்தே பிள்ளைகளைக் காருமம்மா

மகமாயி மாரிமுத்தே மைந்தர்களைக் காருமம்மா

Leave a Comment

This site uses Akismet to reduce spam. Learn how your comment data is processed.