'ஏசி யூஸ் பண்ணாதீங்க!' – மின் பற்றாக்குறையால் அரசு அறிவுறுத்தல்!

நிலக்கரி தட்டுப்பாடு காரணமாக, இந்தியாவின் பல மாநிலங்களில் மின்வெட்டு ஏற்பட வாய்ப்பு இருப்பதாக கூறப்படும் நிலையில், இரவு நேரங்களில், யாரும் ஏசி போட வேண்டாம் என, ஆந்திர மாநில அரசு அறிவுறுத்தி உள்ளது.

இந்தியாவில், நிலக்கரி மூலம் மின்சாரம் உற்பத்தி செய்யும் 135 மின் ஆலைகள் உள்ளன. நாட்டின் மொத்த மின் தேவையில் இந்த ஆலைகள் 70 சதவீதம் பூர்த்தி செய்கின்றன. ஆனால், இந்த ஆலைகளில் அடுத்த 2 நாட்களுக்கு தேவையான நிலக்கரி மட்டுமே இருப்பில் உள்ளதாகவும், இதனால், டெல்லி, பஞ்சாப், தமிழகம்,
ஆந்திரா
உள்ளிட்ட பல்வேறு மாநிலங்களில் மின் தடை ஏற்பட வாய்ப்பு உள்ளதாகவும் செய்திகள் வெளியாகி உள்ளன. மின் தடை ஏற்படும் அபாயம் உள்ளதால், ஆந்திர மாநிலத்திற்கு உதவும்படி, பிரதமர் நரேந்திர மோடிக்கு அம்மாநில முதலமைச்சர் ஜெகன் மோகன் ரெட்டி அண்மையில் கடிதமும் எழுதி இருந்தார்.

இந்நிலையில், ஆந்திர மாநில எரிசக்தி துறை செயலாளர் ஸ்ரீகாந்த் நகுலப்பள்ளி வெளியிட்டுள்ள செய்திக் குறிப்பில் தெரிவிக்கப்பட்டு உள்ளதாவது:

நாடெங்கிலும் நிலக்கரி பற்றாக்குறை ஏற்பட்டு உள்ளதால் மின் பற்றாக்குறை காரணமாக மின் நுகர்வை குறைத்துக் கொள்ளும்படி கேட்டுக் கொள்ளப்படுகிறது. காலை 6 மணி முதல், 9 மணி வரை மற்றும் மாலை 6 மணி முதல் இரவு 10 மணி வரை என, பீக் ஹவர்ஸ் (PEAK HOURS) நேரங்களில், மின் பயன்பாடு அதிகமாக இருப்பதன் காரணமாக அந்த நேரத்தில் பொது மக்கள் ஏசி பயன்பாட்டை நிறுத்திக் கொள்ள வேண்டும் அல்லது குறைத்துக் கொள்ள வேண்டும்.

இந்த நேரங்களில் ஏசி பயன்பாட்டை குறைப்பதன் மூலம் 10 மில்லியன் யூனிட் மின்சாரம் வரை சேமிக்க முடியும். இதனால் மின்வெட்டை தவிர்க்கலாம்.

இவ்வாறு அதில் குறிப்பிடப்பட்டு உள்ளது.

ஆந்திர மாநில அரசின் அறிவுறுத்தலால், அம்மாநில மக்கள் அதிர்ச்சி அடைந்துள்ளனர். இதனால் மாநிலத்தில் விரைவில் பல மணி நேரம் மின்சார தடை ஏற்பட வாய்ப்பு இருப்பதாகவும் கூறப்படுகிறது.

Leave a Comment

This site uses Akismet to reduce spam. Learn how your comment data is processed.