உ.பி. தேர்தல்: முறிகிறது காங்கிரஸ், சமாஜ்வாதி கூட்டணி – அகிலேஷ் சொன்ன தகவல்!

நாட்டின் மிகப்பெரிய மாநிலங்களில் ஒன்றான உத்தரப்பிரதேசத்தில் பாஜக ஆட்சி நடைபெற்று வருகிறது. இம்மாநிலத்தில் அடுத்த ஆண்டு சட்டமன்றத் தேர்தல் நடைபெறவுள்ளது. கடந்த 2017ஆம் ஆண்டு தேர்தலில் மொத்தமுள்ள 403 தொகுதிகளில் பாஜக 300க்கும் மேற்பட்ட இடங்களை கைபற்றியது. சமாஜ்வாதி கட்சியுடன் கூட்டணி அமைத்த
காங்கிரஸ்
படு தோல்வி அடைந்தது.

உத்தரப்பிரதேசத்தில் மீண்டும் ஆட்சியை கைபற்ற பாஜக, காங்கிரஸ், சமாஜ்வாதி, பகுஜன் சமாஜ் ஆகிய கட்சிகள் தீவிர முனைப்பு காட்டி வருகின்றன. ஒரு காலத்தில் காங்கிரஸ் கட்சியின் கோட்டையாக இருந்த உத்தரப்பிரதேசத்தை இம்முறை மீண்டும் கைபற்றும் நோக்கில் அம்மாநிலத்தின் பொறுப்பாளராக பிரியங்கா காந்தியை இரண்டு ஆண்டுகளுக்கு முன்பே காங்கிரஸ் மேலிடம் நியமித்து விட்டது. அவரும் தீவிரமாக பணியாற்றி வருகிறார்.

தேர்தலையொட்டி பாஜக, சமாஜ்வாதி, காங்கிரஸ் ஆகிய கட்சிகள் அதிகாரப்பூர்வமாக தேர்தல் பிரசாரத்தை தொடங்கியுள்ளன. வருகிற சட்டமன்றத் தேர்தலில் காங்கிரஸ் கட்சி கூட்டணி அமைத்துப் போட்டியிடத் தயாரான மனநிலையில் இருப்பதாகவும், கூட்டணி விவகாரத்தில் பரந்த மனப்பான்மையுடன் செயல்படுவோம் என்றும்
பிரியங்கா காந்தி
தெரிவித்துள்ளார்.

இந்த நிலையில், உத்தரப்பிரதேசத்தில் ஆட்சி மாற்றம் நடைபெற வேண்டுமென வலியுறுத்தி முன்னாள் முதல்வரும், சமாஜ்வாதி கட்சியின் தலைவருமான
அகிலேஷ் யாதவ்
, விஜய் ரத யாத்திரை என்ற பெயரில் மாநிலம் முழுதும் சுற்றுப்பயணம் செய்து மக்களை சந்தித்து வருகிறார்.

இந்த நிலையில், தேர்தல் பிரசாரத்திற்கிடையே செய்தியாளர்களை சந்தித்த அகிலேஷ் யாதவிடம் காங்கிரஸ் கட்சியுடனான கூட்டணி பற்றி கேள்வி எழுப்பப்பட்டது. அதற்கு பதிலளித்த அவர், கடந்த காலங்களில் சமஜ்வாதி கட்சி பெரிய தேசிய கட்சிகளுடன் கூட்டணி வைத்தபோது ஏற்பட்ட அனுபவங்கள் அவ்வளவு திருப்தியாக இல்லை. எனவே சிறிய மற்றும் மாநிலக் கட்சிகளை ஒன்றுதிரட்டி கூட்டணி ஏற்படுத்தவே முயற்சிப்பதாக தெரிவித்தார்.

இதன்மூலம்,
சமாஜ்வாதி கட்சி
– காங்கிரஸ் ஆகிய கட்சிகள் இடையேயான கூட்டணி முடிவுக்கு வந்துள்ளதாக அரசியல் நோக்கர்கள் கருத்து தெரிவித்துள்ளனர். அதேசமயம், தேர்தலுக்கு பின்னர் இந்த இரு கட்சிகளும் கூட்டணி அமைக்க வாய்ப்பிருப்பதாகவும் கூறப்படுகிறது. கடந்த தேர்தலில் கூட்டணி அமைத்து போட்டியிட்ட இந்த இரு கட்சிகளையும் மக்கள் ஏற்காததால், இம்முறை தனித்தனியே போட்டியிட்டு, தேர்தலுக்கு பின்னர் கூட்டணி அமைத்துக் கொள்ள வாய்ப்பிருப்பதாகவும் தெரிகிறது.

Leave a Comment

This site uses Akismet to reduce spam. Learn how your comment data is processed.