அழைப்பு விடுத்த ஸ்டாலின்…நிராகரித்த ஓபிஎஸ்!

குடியரசு தினத்தை முன்னிட்டு ஜனவரி 26 ஆம் தேதி, தமிழக முதல்வரும், திமுக தலைவருமான
மு.க.ஸ்டாலின்
பல்வேறு மாநில கட்சிகளுடன் காணொலி வாயிலாக ஆலோசனை நடத்தினார்.

அப்போது, ‘சமூகநீதிக் கொள்கையை முன்னெடுத்து, பிற்படுத்தப்பட்ட, பட்டியலின மற்றும் பழங்குடியின மக்களின் இடஒதுக்கீடு உள்ளிட்ட நலன்களைப் பாதுகாத்திடும் வகையில் அனைத்திந்திய சமூகநீதிக் கூட்டமைப்பு தொடங்கப்படும்’ என்று அதிரடி அறிவிப்பு ஒன்றை வெளியிட்டிருந்தார்.

இந்த அறிவிப்பை வெளியிட்ட கையோடு, சோனியா காந்தி, அரவிந்த் கெஜ்ரிவால், ஓபிஎஸ் உள்ளிட்ட பல்வேறு மாநிலங்களை சேர்ந்த மொத்தம் 37 தலைவர்களுக்கு, தான் தொடங்கவுள்ள கூட்டமைப்பில் சேருமாறு அவர் அழைப்பு விடுத்து கடிதம் எழுதியிருந்தார்.

‘கவலைப்படாதீங்க.. நாங்க இருக்கோம்!’ – ஸ்டாலினுக்கு ஓபிஎஸ் ஆறுதல்!

முதல்வரின் கடிதத்துக்கு இன்று பதில் மடல் எழுதியுள்ள அதிமுக ஒருங்கிணைப்பாளர் ஓபிஎஸ், சமூகநீதி கூட்டமைப்பில் சேர்வது குறித்த தமது நிலைப்பாட்டை தமது கடிதத்தில் தெளிவுப்படுத்தியுள்ளார்.

அதில், ‘திமுக ஆட்சி மீது மக்களுக்கு ஏற்பட்டுள்ள அதிருப்தியை திசை திருப்பவே அனைத்திந்திய சமூகநீதிக் கூட்டமைப்பு என்ற அமைப்பு தங்களால் உருவாக்கப்பட்டு உள்ளதாக அனைவரும் கருதுகிறார்கள்.

அரசியல் ஆதாயத்திற்காக உருவாக்கப்பட்டுள்ள இந்த அமைப்பில் அதிமுக தன்னை ஈடுபடுத்திக் கொள்ள விரும்பவில்லை. ‘நீட் தேர்வு ரத்து’ போன்ற மக்கள் நலன் சார்ந்த பிரச்னைகளில் கவனம் செலுத்த வேண்டுமென்று மு.க.ஸ்டாலினை அன்புடன் கேட்டுக் கொள்கிறேன்’ என்று
ஓ.பன்னீர்செல்வம்
தமது கடிதத்தில் திட்டவட்டமாக தெரிவித்துள்ளார்.

Leave a Comment

This site uses Akismet to reduce spam. Learn how your comment data is processed.