சித்தி இப்படி பண்ணுவாங்கன்னு நினைச்சு கூட பாக்கல: டிடிவி தினகரன் அப்செட்!

அதிமுகவில் ஈ-பி-எஸ் – ஓ.பி.எஸ். இணைப்புக்கு பின்னர்
சசிகலா
,
டிடிவி தினகரன்
உள்ளிட்ட மன்னார்குடி குடும்பத்தினர் கட்சியில் இருந்து முழுவதுமாக ஓரங்கட்டப்பட்டனர். அதன்பின்னர் ஆர்.கே.நகர் இடைத்தேர்தலில் சுயேச்சையாக போட்டியிட்டு வெற்றி பெற்ற டிடிவி தினகரன்,
அமமுக
எனும் கட்சியை நடத்தி வருகிறார். அதிமுகவை கைபற்றுவது தான் தனது ஒரே நோக்கம் எனவும், அதற்காகவே அமமுகவை ஆரம்பித்ததாகவும் டிடிவி தினகரன் உள்ளிட்ட அக்கட்சியினர் கூறி வருகின்றனர்.

இதனிடையே, சிறையில் இருந்து சசிகலா வெளியே வந்ததும்
அதிமுக
அவரை நோக்கி வரும் என பல்வேறு ஆருடங்கள் சொல்லப்பட்டது. ஆனால், அரசியலில் இருந்து ஒதுங்கியிருக்கப் போவதாக தடாலடியாக அறிவித்தார் சசிகலா. இதனால், அவரது ஆதரவாளர்கள் குறிப்பாக டிடிவி தினகரன் பெரிதும் அப்செட் ஆனார். வெளிப்படையாகவே தனது வருத்ததையும் டிடிவி தினகரன் பதிவு செய்தார். அதேசமயம், அரசியலில் மீண்டும் இறங்குவதற்கான முயற்சிகளையும் சசிகலா தொடர்ந்து மேற்கொண்டு வருகிறார்.

ஆனாலும், டிடிவியின் செயல்பாடுகளில் சசிகலா அண்மைக்காலமாக அதிருப்தியில் இருப்பதாக தகவல்கள் வந்த வண்ணம் உள்ளன. அரசியலில் இருந்து ஒதுங்கியிருக்கப் போவதாக அறிவித்தாலும், கடந்த சட்டமன்றத் தேர்தலில் அமமுகவுக்கு சசிகலா ஆதரக்கரம் நீட்டுவார் என்று எதிர்பார்க்கப்பட்டது. ஆனால், சசிகலா அதனை மறுத்து விட்டார். அதிமுகவை கட்டுக்குள் கொண்டு வரும் முயற்சிகளில் ஈடுபட்டிருக்கும் போது, அமமுகவுக்கு ஆதரவாக செயல்பட்டால் எதிர்விளைவுகளை ஏற்படுத்தி விடும் என்பதால் சசிகலா மறுத்து விட்டதாக செய்திகள் வெளியாகின. இதையடுத்து, தேமுதிகவுடன் கூட்டணி அமைத்து தேர்தலை சந்தித்த அமமுக படு தோல்வியடைந்தது.

இந்த சூழலில் தமிழ்நாட்டில் மாநகராட்சி, நகராட்சி, பேரூராட்சி பகுதிகளுக்கு வருகிற பிப்ரவரி மாதம் 19ஆம் தேதி ஒரே கட்டமாக
நகர்ப்புற உள்ளாட்சித் தேர்தல்
நடைபெறவுள்ளது. ஊரக உள்ளாட்சித் தேர்தலில் போட்டியிட்டு கணிசமான இடங்களை பெற்ற அமமுக, நகர்ப்புற உள்ளாட்சித் தேர்தலில் தனித்து போட்டியிடுகிறது.

அனைத்துக் கட்சி கூட்டம்: அதிமுக புறக்கணிக்க என்ன காரணம்?

இதனிடையே, சென்னை தி.நகர் இல்லத்தில் செய்தியாளர்களை சந்தித்த சசிகலா, நகர்ப்புற உள்ளாட்சி தேர்தலில் மக்கள் ஆதரவுடன் அதிமுக வெற்றி பெறும் என்றும், தேர்தலுக்கு பிறகு மாவட்ட வாரியாக சுற்றுப்பயணம் மேற்கொள்ள உள்ளதாகவும் தெரிவித்தார்.

இதன்மூலம், நகர்ப்புற உள்ளாட்சி தேர்தலில் மக்கள் ஆதரவுடன் அதிமுக வெற்றி பெறும் என்று அதிமுகவுக்கான தனது ஆதரவை சசிகலா வெளிப்படையாக தெரிவித்துள்ளார். இதன் மூலம் டிடிவி தினகரனின் அமமுகவுக்கு தனது ஆதரவு இல்லை என்பதையும் சசிகலா வெளிப்படுத்தியுள்ளார்.

முன்னதாக, நகர்ப்புற தேர்தலையொட்டி தனக்கு ஆதரவளிக்குமாறு சசிகலாவை சந்தித்து டிடிவி தினகரன் கேட்டபோது, அதற்கு அவர் மறுப்பு தெரிவித்து விட்டதாகவும், இதனால் கோபமடைந்த டிடிவி தினகரன், அமமுக நிர்வாகிகள் ஆலோசனை கூட்டத்தில் சசிகலாவிற்கு ஆதரவாக செயல்பட்ட நிர்வாகிகளை கண்டித்ததாகவும் தகவல்கள் வெளியாகின.

அதன் தொடர்ச்சியாக, கடந்த 2021ஆம் ஆண்டு சட்டமன்ற தேர்தல் மற்றும் ஊரக உள்ளாட்சித் தேர்தல்களில் சசிகலாவின் புகைப்படங்கள் பெரியளவில் இடம்பெற்ற நிலையில், நகர்ப்புற உள்ளாட்சித் தேர்தலுக்காக ஒட்டப்பட்டுள்ள அமமுக போஸ்டர்களில் சசிகலாவின் புகைப்படங்கள் இடம்பெறாதது சலசலப்பை ஏற்படுத்தியது.

இந்த நிலையில், அதிமுகவுக்கு ஆதரவளிக்கும் சசிகலாவின் பேட்டி தொடர்பாக டிடிவி தினகரன் மிகவும் மன வருத்தத்தில் இருப்பதாக அவருக்கு நெருக்கமான வட்டாரங்கள் தெரிவித்துள்ளன. ‘சித்தி இப்படி பண்ணுவாங்கன்னு நினைச்சு கூட பாக்கல; நமக்கு ஆதரவு கொடுக்கலன்னாலும் பரவாயில்ல; கடந்த முறை மாதிரி யாருக்கும் ஆதரவு தெரிவிக்காம இருந்திருக்கலாம். ஆனா, அதிமுகவுக்கு இப்படி வெளிப்படையா ஆதரவு தெரிவிச்சுட்டாங்களே,” என்று டிடிவி தினகரன் புலம்பித் தள்ளி விட்டாராம்.

Leave a Comment

This site uses Akismet to reduce spam. Learn how your comment data is processed.