துணிச்சலா சொல்றேன்.. லிஸ்ட் போட்டு அசத்திய முதல்வர் மு.க.ஸ்டாலின்

தமிழகத்தில் உள்ளாட்சி தேர்தலை முன்னிட்டு அரசியல் கட்சிகளும், வேட்பாளர்களும் தீவிர பிரச்சாரம் செய்து வருகின்றனர். இந்நிலையில்,
திமுக
தலைவரும், முதல்வருமான
மு.க.ஸ்டாலின்
இன்று
கடலூர்
மாவட்டத்தில் பல்வேறு பகுதிகளில் காணொலி வாயிலாக பிரச்சாரம் செய்தார்.

இதில் பேசிய முதல்வர் மு.க.ஸ்டாலின், “இன்றைய நாள் தமிழக வரலாற்றில் மட்டுமல்ல – என்னுடைய வாழ்க்கையிலும் மிக முக்கியமான நாள் ஆகும். இன்று காலையில் தமிழ்நாடு சட்டமன்றத்தின் சிறப்புக் கூட்டத்தைக் கூட்டி- நீட் விலக்கு மசோதாவை மீண்டும் நிறைவேற்றி இருக்கிறோம். அதை ஆளுநருக்கு இன்று மீண்டும் அனுப்பி வைத்திருக்கிறோம். அரியலூர் அனிதா தொடங்கி பல இளம் மாணவ, மாணவியரின் உயிரைப் பறிக்கக் காரணமாக இருந்த பலிபீடம்தான் நீட் தேர்வு.

ஏழை – எளிய மாணவர்கள் – கிராமப்புற மாணவர்கள் – பட்டியலின பழங்குடி மாணவர்கள் – பிற்படுத்தப்பட்ட – மிகவும் பிற்படுத்தப்பட்ட மாணவர்கள் மருத்துவக் கல்வியில் நுழைவதற்கு தடை போடக் கூடிய தடுப்பணையாக இந்த நீட் தேர்வு இருக்கிறது. இரண்டு ஆண்டு காலம் – மூன்று ஆண்டு காலம் – லட்சக்கணக்கில் பணம் கட்டி தனி பயிற்சி எடுக்க வசதி உள்ளவர்களது வசதிக்காக ஏற்படுத்தப்பட்டது அந்தத் தேர்வு.

இப்படி ஒரு தேர்வு தேவை என்று வழக்கு போட்டதே ஒரு தனியார் பயிற்சி நிறுவனம்தான். நீட் தேர்வு என்ற சதித் தேர்வை தலையாட்டி ஏற்றுக் கொண்டால் – அடுத்து பொறியியல் கல்லூரிகளுக்கும் இது மாதிரி தேர்வைக் கொண்டு வருவார்கள். கலைக் கல்லூரிகளுக்கும் கொண்டு வருவார்கள்.

தமிழக மீனவர்களை மீட்க வேண்டும்.. பிரதமர் மோடிக்கு முதல்வர் ஸ்டாலின் மீண்டும் கடிதம்!

அவர்கள் கொண்டுவரும் புதிய கல்விக் கொள்கை என்பதே மாணவர்களை வடிகட்டுவதற்காகக் கொண்டு வரும் திட்டம்தான். ஒட்டுமொத்தமாக ஏழை எளிய – ஒடுக்கப்பட்ட மக்களிடம் இருந்து கல்வி உரிமையைப் பறிப்பதற்காகத்தான் இது போன்ற கல்விக் கொள்கைகளை அமல்படுத்தத் துடிக்கிறார்கள். ஆயிரம் ஆண்டு அடிமைத்தனத்துக்குப் பின்னால் போராடிப் பெற்ற சமூகநீதியை நாம் யாருக்காகவும் – எதற்காகவும் விட்டுத் தர மாட்டோம் என்பதன் அடையாளமாகத்தான் இன்றைய தினம் நீட் விலக்கு சட்டமுன்வடிவை நிறைவேற்றி இருக்கிறோம்.

* கடலூர் மாவட்டமும் நாகை மாவட்டமும் இணையும் கொள்ளிடத்தில் 52 கோடி ரூபாய் மதிப்பில் பாலம் கட்டிய அரசுதான் திமுக அரசு!

* பண்ருட்டியில் அண்ணா பல்கலைக்கழகப் பொறியியல் கல்லூரி.

* சோனம் குப்பம், சொத்தி குப்பம், தாழங்குடா போன்ற பகுதிகளுக்கு ஆற்றின் மீது மேம்பாலங்கள்.

* உறையூரில் துணைமின் நிலையம்

* நெல்லிக்குப்பத்தில் புதிய பேருந்து நிலையம்

* பண்ருட்டியில் ஒருங்கிணைந்த நீதிமன்ற வளாகம்

* கடலூரில் மாவட்டக் காவல்துறை அலுவலகம், நீதிமன்றக் கட்டடம், வட்டாட்சியர் அலுவலகக் கட்டடம்.

* காட்டுமன்னார்கோவிலில் வட்டாட்சியர் அலுவலகம்

* குறிஞ்சிப்பாடி புதிய தாலுகா உருவாக்கம்!

* குறிஞ்சிப்பாடியில் புதிய மருத்துவமனை!

* திருப்பாதிரிப்புலியூர் சுரங்கப்பாதை, ரயில்வே மேம்பாலம் ஆகியவை திமுக ஆட்சியில்தான் தொடங்கப்பட்டது.

புதிதாக இப்போது ஆட்சிக்கு வந்துள்ளீர்களே, இந்த எட்டு மாத காலத்தில் என்ன சாதனையைச் செய்துள்ளீர்கள் சொல்லுங்கள் என்று கேட்பீர்களேயானால் அதற்கும் பெரிய பட்டியலை வைத்துள்ளேன்.

* நெய்வேலி சுரங்கம் 2-இல் இருந்து வெளியேற்றப்படும் நீரினை ஆதாரமாகக் கொண்டு திட்டக்குடி, பெண்ணாடம், மங்கலம்பேட்டை, வடலூர், குறிஞ்சிப்பாடி, கங்கைகொண்டான் பேரூராட்சிகளுக்கும் – விருத்தாசலம், மங்களூர், நல்லூர் ஒன்றியம் சார்ந்த 625 ஊர்க் குடியிருப்புகளுக்குமான கூட்டுக் குடிநீர்த் திட்டம் 479 கோடி ரூபாய் மதிப்பீட்டில் செயல்படுத்தப்பட்டு வருகிறது.

* சிதம்பரம் நகராட்சி மற்றும் அண்ணாமலை பேரூராட்சிக்கான கூட்டுக் குடிநீர்த் திட்டம் 127 கோடி ரூபாய் மதிப்பில் திட்டப்பணிகள் தீட்டப்பட்டு வருகிறது.

* கெடிலம் ஆற்றில் வெள்ளப்பாதிப்புகளைச் சரி செய்ய 80 கோடி ரூபாய் மதிப்பீட்டில் திட்டப்பணிகள் அரசின் பரிசீலனையில் உள்ளன.

* பெண்ணையாறு வெள்ளப் பாதிப்புகளைச் சரி செய்ய 135 கோடி ரூபாயில் திட்டப்பணிகள் அரசின் பரிசீலனையில் உள்ளது.

* வெள்ளாறு, மணிமுக்தாறு மற்றும் பெண்ணையாற்றில் மூன்று தடுப்பணைகள் கட்டப்பட்டுள்ளன.

* விழுப்புரம் – பாண்டி – நாகப்பட்டினம் சாலையில் தென் பெண்ணையாற்றின் குறுக்கே உயர்மட்டப் பாலம் அமைக்கும் பணி நடந்து வருகிறது.

* கடலூர் – விருத்தாசலம் – சேலம் நெடுஞ்சாலையில் உயர்மட்டப் பாலம் அமைக்கும் பணி நடந்து வருகிறது.

* பரங்கிப்பேட்டையில் நீர் விளையாட்டு வளாகம் கொண்டு வரப்பட்டது.

* குறிஞ்சிப்பாடியில் 81 உழவர் உற்பத்தியாளர் குழுக்களுக்கு 4.05 கோடி ரூபாய் மானியத்தில் வேளாண் இயந்திரங்கள், உபகரணங்கள் வழங்கப்பட்டன.

* காட்டுமன்னார்கோயில் தொகுதிக்கு உட்பட்ட நீர் ஆதாரமாகவும் மற்றும் சென்னைக்குக் குடிநீர் வழங்குவதுமான வீராணம் ஏரி தூர்வாரப்படும் என உறுதி தரப்பட்டுள்ளது.

* கடலூர் மாநகராட்சியில் மாபெரும் மழைநீர் வடிகால் மற்றும் தூய்மைப் பணி நகர் முழுவதும் துவங்கப்பட்டது.

* நெய்வேலி தொகுதியில் அரசு தொழிற்பயிற்சி நிலையம் துவங்கப்பட்டது.

* குறிஞ்சிப்பாடி, இந்திராநகர், பெருமாத்தூர் ஊராட்சி உட்பட்ட மாற்றுக்குடியிருப்பு பகுதியில் தனித்தனி வீட்டிற்கு பைப் லைன் என 4 கோடியே 60 லட்சம் ரூபாய் குடிநீர் திட்டம் அமல்படுத்தப்பட்டுள்ளது.

* பண்ருட்டி வட்டம், வேகாக்கொல்லையில் தண்ணீர் பந்தல் ஏரியில் கான்கிரீட் பாலம் விரைவாகத் தொடங்க உத்தரவிடப்பட்டுள்ளது.

* குறிஞ்சிப்பாடி மேற்கு ஒன்றியம், வடக்குமேலூர்- இந்திராநகர் இடையில் வரும் பாரதிநகர் முதல் வடக்குமேலூர் வரையிலான மண்சாலை தார்ச்சாலையாக மாற்ற உத்தரவிடப்பட்டுள்ளது.

* குறிஞ்சிப்பாடி ஒன்றியம் வடக்குத்து ஊராட்சி – மன்னன் நகரில் கனிம வளத்துறை மூலமாக 12.50 லட்ச ரூபாய் மதிப்பில் 30,000 லிட்டர் கொள்ளளவு கொண்ட புதிய மேல்நிலை நீர்த்தேக்கத் தொட்டி அமைக்க அடிக்கல் நாட்டப்பட்டது.

* நெய்வேலி தொகுதிக்கு உட்பட்ட இந்திரா நகர், அண்ணா கிராமம் விரிவாக்கம் மற்றும் ஜெயப்பிரியா நகர் பகுதிகளில் ரூபாய் ஒன்பது லட்சம் ரூபாய் மதிப்பில் புதிதாக மின் மாற்றிகள் அமைக்கப்பட்டன.

* விருத்தாச்சலம் சட்டமன்ற தொகுதிக்கு உட்பட்ட கொடுக்கூர் ஊராட்சியில் நேரடி நெல்கொள்முதல் நிலையம் துவங்கப்பட்டுள்ளது.

* திட்டக்குடி சட்டமன்றத் தொகுதி தொளார் கிராமத்தில் அமைந்துள்ள சிவன் கோயில் பராமரிப்பின்றி சேதமடைந்த நிலையில் அதனை ஆய்வு செய்து புனரமைப்பதற்கான பணியைத் துவக்கிட அறநிலையத்துறை அதிகாரிகளுக்கு உத்தரவிடப்பட்டுள்ளது.

* சில்வர் பீச் செல்லும் வழியில் எஸ்.பி.பங்களா அருகில் உள்ள செயிண்ட் டேவிட் கோட்டையினைச் சுற்றுலாத் தலமாக மேம்படுத்த நடவடிக்கை எடுக்கப்படும்.

* உப்பணாற்று முகத்துவாரத்தில் படகு குழாம் அமைக்கப்படும்.

* சிதம்பரத்தில் காய்கறிச் சந்தையை 6 கோடி ரூபாய் செலவில் புதிய சந்தை வளாகம்.

* சிதம்பரம் தேரோடும் வீதி முழுமையாக எல்.இ.டி பல்புகள் பொருத்தப்பட உள்ளன.

* சிதம்பரம் பகுதியில் மழைநீர் வடிகால்கள் அமைக்க 10 கோடி ரூபாயில் திட்டங்கள்.

– இப்படிப் பல்வேறு பணிகள் செய்யப்பட்டு வருகின்றன,

எம்.ஆர்.கே.பன்னீர்செல்வம் அவர்கள் ஏராளமான திட்டங்களைக் கடலூர் மாவட்டத்துக்கு கொண்டு போய்விட்டார் என்பதை நீங்கள் மட்டுமல்ல நானும் இப்போது நானும் நன்றாகத் தெரிந்துகொண்டேன்.

இவை அனைத்தும் எட்டு மாத காலத்தில் செய்யப்பட்டு வருகின்றன.

பாதாளச் சாக்கடை அமைக்கப்படாத கடலூரின் மற்ற வார்டுகளிலும் அதனை அமைக்க அரசு திட்டமிட்டுள்ளது. தமிழ்நாடு உள்கட்டமைப்பு நிதி மற்றும் மேலாண்மைக் கழகத்தின் மூலமாக 180 கோடி ரூபாய் மதிப்பில் இடைக்கால அறிக்கை தயாரிக்கப்பட்டுள்ளது. அதனை ஆய்வு செய்து விரைவில் பணிகள் தொடங்க இருக்கிறது.

வெள்ளத் தடுப்புப் பணிகளுக்காக மழைநீர் வடிகால் கட்டும் பணி கடலூர் மாநகராட்சிக்கு உட்பட்ட பகுதிகளில் 2 சிப்பங்களாகப் பிரிக்கப்பட்டுள்ளது. அதிகமாக மழை நீர் தேங்கும் இடங்கள் கண்டறியப்பட்டு கெடிலம் நதி மற்றும் தென் பெண்ணையாறு நதிகளுக்கு இடையில் 16 வார்டுகளில் 42 கோடி ரூபாய் மதிப்பீட்டில் பணிகள் முடிக்கப்பட்டுள்ளன. மார்ச் 31-ஆம் தேதிக்குள் அனைத்து பணிகளும் முடிவடையும். விடுபட்ட பகுதிகளில் வெள்ளத்தடுப்பு மழைநீர் வடிகால்களை 80 கிலோ மீட்டர் நீளத்துக்கு 78.85 கோடி ரூபாய் மதிப்பில் அமைக்க கருத்துரு அரசிடம் பரிசீலனையில் உள்ளது. இது போன்ற பணிகளை ஒருங்கிணைத்து நிரந்தரத் தீர்வைக் காண்போம். பேரிடர்கள் ஏற்படும்போது – மனித உயிரிழப்புகள், பொதுச்சொத்துக்கள் மற்றும் உட்கட்டமைப்புகளுக்கு ஏற்படும் பாதிப்புகளை வெகுவாகக் குறைத்து தமிழ்நாட்டை அனைத்து வகையான பேரிடர்களையும் திறம்பட எதிர்கொள்ளும் மாநிலமாக மாற்றுவதே அரசின் நோக்கம்.

மழை, வெள்ளம் காரணமாக தமிழகத்துக்கு ஏற்பட்ட சேதம் எவ்வளவு என்பதைத் தமிழ்நாட்டின் மற்ற மாவட்ட மக்களை விடக் கடலூர் மக்களாகிய நீங்கள் நன்கு அறிவீர்கள். தண்ணீரில் மூழ்கிய பயிர்கள் மூலம் விவசாயிகள் அடைந்த துயரமும் – குடியிருப்புகளை நீர் சூழ்ந்ததன் மூலமாக பொதுமக்கள் பட்ட துன்பமும்- யாராலும் மறக்க முடியாது. எந்தப் புயல் அடித்தாலும் அது மீனவ மக்களை மீளாத் துயரத்தில் ஆழ்த்திவிட்டுச் செல்கிறது. இதில் தமிழ்நாட்டின் அனைத்து மாவட்ட மக்களும் அதிகமாக பாதிக்கப்பட்டார்கள். தமிழ்நாட்டு மக்களுக்கு வெள்ள நிவாரணப் பணிகளைச் செய்வதற்காக 6500 கோடி ரூபாய் நிதி உதவி வேண்டும் என்று ஒன்றிய அரசிடம் கேட்டோம். இதுவரை கிடைக்கல. மூன்று மாதம் ஆகிவிட்டது. இதுதான் அவர்களுக்கு தமிழ்நாட்டின் மீதான அக்கறை. தமிழ்நாட்டுக்கு வந்தால் தமிழில் வணக்கம் என்றும் நன்றி என்றும் சொன்னால் போதுமா? அதனால்தான் தமிழ்நாட்டு மக்களும் பாஜகவுக்கு நன்றி வணக்கம் என்பதை மட்டுமே சொல்லிக் கொண்டு இருக்கிறார்களே தவிர வாக்களிப்பது இல்லை. நீங்கள் எங்களுக்கு வாக்களிக்காமல் போனாலும் பரவாயில்லை, தமிழ்நாட்டுக்கு எந்த நன்மையையும் செய்ய மாட்டோம் என்று அடம்பிடிக்கும் அரசாக ஒன்றிய பாஜக அரசு இருக்கிறது.

ஆட்சியை இழந்த ஆற்றாமையில் நித்தமும் ஏதேதோ பேசிக் கொண்டு இருக்கிறார் முன்னாள் முதலமைச்சர் பழனிசாமி. என்னைச் சர்வாதிகாரி என்கிறார் பழனிசாமி. அடுத்த நிமிடமே என்னை பொம்மை என்றும் சொல்கிறார். அவருக்கு சர்வாதிகாரி என்றால் என்ன என்பதும் தெரியவில்லை. பொம்மை எப்படி இருக்கும் என்பதும் தெரியவில்லை.

பழனிசாமியும் பன்னீர்செல்வமும் அடிமைச் சேவகம் செய்வதில் போட்டி போட்டவர்கள். இன்று பதவி பறிபோனதும் ஊருக்கு அறிவுரை சொல்லி வருகிறார்கள் இருவரும். அ.தி.மு.க.தான் மக்களாட்சியைக் கொடுத்தது என்கிறார் பழனிசாமி. மக்களாட்சியை அதிமுக கொடுத்தால், அதற்கு மக்கள் ஏன் தோல்வியைக் கொடுத்தார்கள்?

அதிமுக ஆட்சியில் கொடுத்த வாக்குறுதிகள் அனைத்தையும் நிறைவேற்றிவிட்டோம் என்று பன்னீர்செல்வம் சொல்லி இருக்கிறார். 2011 முதல் 2021 வரை பத்தாண்டு காலம் ஆட்சியில் இருந்தது அதிமுக. 2011 சட்டமன்றத் தேர்தலில் கொடுத்த வாக்குறுதியையும் அவர்கள் நிறைவேற்றவில்லை. 2016 சட்டமன்றத் தேர்தலிலும் கொடுத்த வாக்குறுதியையும் அவர்கள் நிறைவேற்றவில்லை.

* இரண்டாவது விவசாய புரட்சித் திட்டம் கொண்டுவருவோம் என்று அறிவித்தீர்களே! வந்ததா? இல்லை!

* விவசாயிகளின் வருமானத்தை இரண்டு அல்லது மூன்று மடங்கு உயர்த்துவோம் என்று அறிவித்தீர்களே? வருமானம் உயர்ந்ததா? இல்லை!

* எல்லா விவசாயக் கருவிகளையும் விவசாயிகளுக்கு இலவசமாகக் கொடுப்போம் என்று சொன்னீர்களே! கொடுத்தீர்களா? இல்லை!

* கரும்புவிலையைப் போல மற்ற விவசாயப் பொருள்களுக்கும் குறைந்தபட்ச ஆதார விலையை நிர்ணயிப்போம் என்றீர்களே! நிர்ணயித்துவிட்டீர்களா? அதுவும் கிடையாது!

* கரும்பு விவசாயிகளுக்குத் தரவேண்டிய பணத்துக்கு பாக்கி வைக்க மாட்டோம் என்று சொன்னீர்களே? அது நிறைவேற்றப்பட்டு இருக்கிறதா?

* சொட்டு நீர்ப் பாசனத்தை அரசு செலவில் அனைத்து விவசாயிகளுக்கும் இலவசமாகச் செய்து கொடுப்போம் என்றீர்களே? செய்து கொடுத்துவிட்டீர்களா?

இவை அனைத்தும் 2011 அதிமுகவின் தேர்தல் அறிக்கையில் உள்ளவை!

2016 தேர்தல் அறிக்கையில் – சொன்னது ஏதாவது உங்கள் இல்லத்துக்கு வந்ததா?

* இலவச செல்போன் உங்கள் இல்லத்துக்கு வந்ததா?

* ஆவின் பால் பாக்கெட் 25 ரூபாய்க்கு உங்கள் இல்லத்துக்குத் தரப்பட்டதா?

* ஏழை மக்களுக்கு அம்மா மினரல் வாட்டர் இலவசமாகத் தரப்பட்டதா?

* குறைந்த விலையில் அவசியமான மளிகைப் பொருள்கள் தரப்பட்டதா?

* வீடில்லா ஏழை மக்களுக்கு 3 செண்ட் இடம் தரப்பட்டதா?

* அனைவருக்கும் அம்மா வங்கி அட்டை தரப்பட்டதா?

* கல்விக் கடன் அடைக்கப்பட்டதா?

* கோ ஆப்டெக்ஸ் துணிகள் வாங்க 500 ரூபாய் கூப்பன் தரப்பட்டதா?

* பண்ணை மகளிர் குழுக்கள் அமைக்கப்பட்டதா?

* அனைத்து பழங்களுக்குமான சிறப்பு வணிக வளாகங்களை உருவாக்கி விட்டீர்களா?

* அனைத்து பொது இடங்களிலும் வைஃபை வசதி கொடுத்துவிட்டீர்களா?

* டாக்டர் அம்பேத்கர் பவுண்டேசன் அமைக்கப்பட்டுவிட்டதா?

* பட்டு ஜவுளிப் பூங்காவை உருவாக்கினீர்களா?

* சென்னையில் மோனோ ரயில் வந்ததா?

* கோவையில் மோனோ ரயில் ஓடுகிறதா?

* திருச்சியில் மோனோ ரயிலைப் பார்க்க முடிகிறதா?

– இவை அனைத்தும் 2016 அதிமுக தேர்தல் அறிக்கையில் உள்ளது.

எதையாவது செய்து கொடுத்துள்ளார்களா?

பழனிசாமி கொடுத்த செல்போன் உங்கள் ஊரில் யாரிடமாவது இருக்கிறதா? பெண்களுக்கு ஸ்கூட்டி கொடுப்பதாகச் சொல்லி 50 பேருக்குக் கொடுத்துவிட்டு கடையை மூடிய கம்பெனிதான் அதிமுக. திடீரென்று சீட்டுப் பிடிக்கும் கம்பெனிகள் உருவாகும். மக்களிடம் பணத்தை வசூல் செய்ததும் ஓடிவிடும். அப்படி ஓடும் கம்பெனிதான் பழனிசாமி – பன்னீர்செல்வம் கம்பெனி. அவர்கள் எங்களைப் பார்த்துக் குறை சொல்வதா? தேர்தல் வாக்குறுதிகளை அச்சிட்டுக் கொடுத்திருக்கிறேன். பெரும்பாலான வாக்குறுதிகளை எட்டே மாதத்தில் நிறைவேற்றிவிட்டதாகத் துணிச்சலாக நான் சொல்கிறேன்.

அந்தப் புத்தகத்தை வைத்துப் பாருங்கள். அதில் சொல்லாத பல வாக்குறுதிகளையும் நிறைவேற்றி இருக்கிறோம். அனைத்தையும் ஒன்று விடாமல் நிறைவேற்றுவோம்” என்று பேசினார்.

Leave a Comment

This site uses Akismet to reduce spam. Learn how your comment data is processed.