வம்பில் சிக்கிய மகன்: வருத்ததுடன் விஜயகாந்த் அட்வைஸ்!

தேமுதிகவை கடந்த 15 ஆண்டுகளுக்கு முன்பு
விஜயகாந்த்
தொடங்கிய போது, அவரது கட்சிக்கு மக்கள் மத்தியில் பெரும் செல்வாக்கு இருந்தது. ஆனால்,
தேமுதிக
பொதுச் செயலாளர் விஜயகாந்த் கடந்த சில ஆண்டுகளாகவே உடல்நலக் குறைவால் பாதிக்கப்பட்டுள்ளார். அமெரிக்கா, சிங்கப்பூர் உள்ளிட்ட நாடுகளுக்கு சென்று சிகிச்சை பெற்று திரும்பிய அவர், தீவிர அரசியலில் இருந்து ஒதுங்கி வீட்டிலேயே தங்கி ஓய்வெடுத்து வருகிறார்.

இதனால், தேமுதிகவின் அரசியல் நடவடிக்கைகளை அவரது மனைவியும் தேமுதிகவின் பொருளாளருமான பிரேமலதா விஜயகாந்த், மைத்துனன் சுதீஷ், மகன்
விஜய பிரபாகரன்
உள்ளிட்டோரே கவனித்து வருகின்றனர். ஆனாலும், விஜயகாந்த் ஆக்டிவாக இல்லாதது அக்கட்சியினரை வருத்ததிலேயே ஆழ்த்தியுள்ளது.

தேமுதிக பொதுச்செயலாளர் விஜயகாந்துக்கு விஜய பிரபாகரன், சண்முக பாண்டியன் என்று இரண்டு மகன்கள் உள்ளனர். இதில் சண்முக பாண்டியன் அப்பா வழியில் நடிகராகி விட்டார். மற்றொருவரான விஜய பிரபாகரன் அரசியலில் இருக்கிறார். விஜயகாந்துக்கு என்று தனி மரியாதையும் மக்கள் மனதில் அபிமானமும் உண்டு. ஆனால், அதனை சிதைக்கும் வகையில் பல்வேறு அரசியல் மேடைகளில் விஜய் பிரபாகரன் பேசுவதாக ஏற்கனவே விமர்சனங்கள் உள்ளன.

தூத்துக்குடி கடம்பூர் பேரூராட்சி தேர்தல் ரத்து: தேர்தல் ஆணையம் அதிரடி உத்தரவு!

சண்முக பாண்டியன் அப்பா வழியில் அமைதியாக இருக்க, விஜய பிரபாகரனோ, பத்திரிகையாளர்களை தரக்குறைவாக பேசிய அவரது அம்மா பிரேமலதா போன்று பண்ணையார் தோரணையில் கருத்துகளை கூறுவதாகவும் கடுமையான விமர்சனங்கள் முன் வைக்கப்பட்டு வருகின்றன.

அந்த வகையில், கும்பகோணம் அருகே தேமுதிக நிர்வாகி இல்ல திருமண விழாவில் கலந்து கொண்ட விஜய பிரபாகரன், தேமுதிகவுக்கு கூட்டமே வருவதில்லை. தேமுதிகவுக்கு கூட்டம் குறைவு. இப்படியெல்லாம் பேசுகிறவர்களின் கண்ணத்திலேயே அடியுங்கள் என்று சர்ச்சைக்குரிய வகையில் பேசியுள்ளார்.

மேலும், “தேமுதிகவின் வாக்கு சதவீதம் குறைந்துள்ளது. அதனை நாங்கள் ஒப்புக் கொள்கிறோம். அதற்கு காரணம் அரசியல் சூழ்ச்சிதான். ஆனாலும், தமிழக அரசியல் களம் தேமுதிகவை சுற்றித்தான் ஓடிக் கொண்டிருக்கிறது. அப்பாவுக்கு உடல்நலம் சரியில்லை என்பதால் வீட்டில் இருக்கிறார். விஜயகாந்த் வெளியே வராமல் இருக்கலாம். ஆனால் குகையில் இருந்தாலும் சிங்கம் சிங்கம்தான். எல்லோரும் என்னுடன் இருங்கள். உங்களால் தேமுதிக மீண்டும் எழும்.” என்றும் விஜய பிரபாகரன் பேசியுள்ளார்.

விஜய பிரபாகரன், விஜயகாந்த்

தேமுதிகவுக்கு புதிய ரத்தம் பாய்ச்சும் பொருட்டு, விஜயகாந்தின் மகன் விஜய பிரபாகரனுக்கு புதிய பதவி கொடுக்கப்பட வேண்டும் அதாவது, இளைஞரணியை அவரிடம் ஒப்படைக்க வேண்டும் என்ற குரல்கள் கட்சிக்குள் ஒலிக்கத் தொடங்கியுள்ள நிலையில், விஜய பிரபாகரன் இவ்வாறு அடிக்கடி சர்ச்சையில் பேசி சிக்கிக் கொள்வது விஜயகாந்தை வருத்தத்தில் ஆழ்த்தியுள்ளதாம், இதனால், விஜய பிரபாகரனை அழைத்து, ‘இதுபோன்றெல்லாம் பொது வெளியில் பேசக் கூடாது; உனக்கு வயது ஆகிறது அரசியலில் முதிர்ச்சி வேண்டும்’ என்று அறிவுரை வழங்கியுள்ளாராம்.

Leave a Comment

This site uses Akismet to reduce spam. Learn how your comment data is processed.