தேர்தல் களம்: திருநங்கைகளின் புது அவதாரம்!

ஆண், பெண் என்ற இரு பாலினம் தவிர, ‘திருநங்கை, திருநம்பி’ என மாற்றுப் பாலினம் இருப்பதையே பொதுவாக சமூகம் உணர்வதில்லை. பொதுக்கழிப்பறை முதல் வேலைவாய்ப்புவரை அவர்களை கணக்கில் கொள்வதில்லை என்பதே பெரும்பாலும் உண்மை.

பெரும்பாலும் குடும்பத்தினர் உள்ளிட்ட சமூகத்தின் புறக்கணிப்பு, புரிதலற்ற மனிதர்களின் கேலிப்பேச்சு, வேலை வாய்ப்பு கிடைப்பதில் சிக்கல் என வாழ்வதே சாதனை என்கிற நிலையில் இருப்பவர்கள் திருநங்ககைள்.

அரசியலில் களத்தில் திருநங்கைகள்

சமீபகாலமாகத்தான் காவல்துறை, நீதித்துறை என பல துறைகளிலும் தங்கள் திறமையை நிரூபித்து, போராடி நுழைந்திருக்கிறார்கள். அரசியலையும் அவர்கள் விட்டுவைக்கவில்லை. கடந்த காலங்களில் வெற்றி தோல்வி குறித்து கவலைப்படாமல், தங்களது சொந்த முயற்சியில் சுயேச்சையாகப் போட்டியிட்ட திருநங்கைகள் உண்டு. தங்கள் இருப்பை வெளிப்படுத்தவும், உரிமைகளுக்காகக் குரல் கொடுக்கவும் தேர்தலைப் பயன்படுத்தினர்.

அதே நேரம், “ எங்களை அரசியல் கட்சிகள் அங்கீகரிக்க வேண்டும். அப்போதுதான் முழுமையான பலன் கிடைக்கும்” என்று தொடர்ந்து திருநங்கைகள் குரல் கொடுத்து வந்தனர். இதற்கு சமீப காலமாக பலன் கிடைத்து வருகிறது.

குறிப்பாக, வரும் 19ஆம் தேதி நடக்க இருக்கும் நகர்ப்புற ஊராட்சி தேர்தலில் முக்கிய கட்சிகள், பல வார்டுகளில் திருநங்களை வேட்பாளராக நிறுத்தியிருக்கின்றன.

ஜெயா

வேலூர் கங்கா அம்மா நாயக் (திமுக), சென்னை ஜெயதேவி (அதிமுக), சேலம் ராதிகா (தேமுதிக) சென்னை ரதி (பாஜக) குத்தாலம் சிநேகா (சிபிஎம்), வேலூர் ரஞ்சிதா, சபீணா (நாம் தமிழர்) என்று பட்டியல் நீள்கிறது. இவர்களைத் தவிரப் பல இடங்களில் சுயேச்சைகளாகவும் திருநங்கைகள் களம் இறங்கியிருக்கிறார்கள்.

2019 உள்ளாட்சித் தேர்தலிலேயே, திருச்செங்கோட்டில் திமுக சார்பாகப் போட்டியிட்ட ரியா வென்றார். திருநங்கைளுக்கான ‘சகோதரன்’ என்ற அமைப்பில் செயல்படும் ஜெயா, “இது நல்ல முன்னேற்றம். சில வருடங்களுக்கு முன்பாகவே நாங்கள் தேர்தலில் கவனம் செலுத்தினாலும் கட்சிகளில் எங்களுக்கு வாய்ப்பு இல்லை. இப்போது பெரிய கட்சிகளே சீட் அளித்திருப்பது மகிழ்ச்சி அளிக்கிறது” என்கிறார்.

சமுதாயத்தில் ஏற்பட்டுவரும் மாற்றம்

பல காலம் முன்பே, பலவித போராட்டங்களைக் கடந்து நடனம் பயின்று, சிறந்து விளங்குபவர் திருநங்கை
நர்த்தகி நட்ராஜ்
. தமிழ்நாடு அரசின் மாநில திட்டக்குழு உறுப்பினராக இருக்கிறார்.

இவர், “எல்லாருக்கும் எல்லாமும் கிடைக்கக வேண்டும். மனிதர்களில் வேறுபாடு இன்றி அனைவரும் சம உரிமையுடன் வாழ வேண்டும். இதற்குத் தற்போது திருநங்கைகளுக்கு அளிக்கப்பட்டுள்ள அரசியல் அங்கீகாரம் மிகுந்த பயனுள்ளதாக இருக்கும். எங்கள் திருநங்கை சமூக மக்கள் அனைவருமே அறிவாற்றல் மிக்கவர்கள். திறமை உள்ளவர்கள். ஆனால் அவர்களது அறிவை, திறமையை சமூகம் புறக்கணிக்கும் போக்கே நீடிக்கிறது. இது தற்போது மாறிவருகிறது. இதன் வெளிப்பாடுதான் அரசியல் அங்கீகாரம்” என்கிறார்.

பல வருடங்கள் முன்பே, சென்னையில் ராதா என்ற திருநங்கை தொடர்ந்து பல தேர்தல்களில் போட்டியிட்டதை நினைவுகூரும் நர்த்தகி நட்ராஜ், வெற்றியோ, தோல்வியோ அது நல்ல அனுபவத்தைத் தரும். மேலும், சமுகத்தோடு ஒன்றியணைய விரும்பும் எங்கள் சமூகத்தினருக்கு இது ஒரு நல் வாய்ப்பு என்றும் சொல்கிறார்.

நர்த்தகி நட்ராஜ்

வேலூர் மாநகராட்சியில் 37ஆவது வார்டில் திமுக. வேட்பாளராக திருநங்கை கங்கா, “இந்த பகுதியில் ஏற்கெனவே நான் அனைவரிடமும் இயல்பாக பழகி வருகிறேன். வீடு வீடாகச் சென்று பிரச்சாரம் செய்கிறேன். எங்கள் சமூகத்தை ஒதுக்கி வைத்த மக்கள் இப்போது நாங்களும் இயல்பான மனிதர்கள் என்பதை உணர்ந்து பழக ஆரம்பிக்கிறார்கள். இந்தப் போக்கு பரவலாவதற்கு இந்தத் தேர்தல் களம் மேலும் உதவும்” என்கிறார்.

சென்னை திரு.வி.க. நகரில் பாஜக சார்பாக போட்டியிடும் ராஜம்மாள் என்னும் திருநங்கை, “நான் கடந்த பத்துப் வருடங்களாக பாஜக கலை மற்றும் கலாசார பிரிவில் மாவட்டத் துணைத் தலைவியாக இருந்தேன்.. இதற்கு முன் சமூக சேவை செய்து வந்தவள்தான் நான். ஆனால் தேர்தலில் வெற்றி பெற்றால் கவுன்சிலர் என்ற அங்கீகாரத்துடன் மக்கள் பணியாற்றுவேன்” என்கிறார்.

ஹிஜாப் தடை: ஆதரிக்கும் இஸ்லாமியர்கள்!

2019 உள்ளாட்சித் தேர்தலில் நாமக்கல் மாவட்டம் திருச்செங்கோடு ஊராட்சி ஒன்றியத்தில் ஒன்றியக் குழு உறுப்பினர் பதவிக்கு திமுக சார்பாக திருநங்கை ரியா போட்டியிட்டார். வெற்றியும் கண்டார். அங்கீகரிக்கப்பட்ட கட்சி சார்பாக இப்படி வென்றது இந்தியாவிலேயே முதன் முறை என்பது குறிப்பிடத்தக்கது.

ஒடுக்கப்பட்டவர்களுக்கான உரிமைக் குரல்

நாம் தமிழர் கட்சியில்தான் திருநங்களுக்கென்றே தனி அணி உள்ளது. அதே போல ஒவ்வொரு தேர்தலிலும் திருநங்களுக்கு சீட் ஒதுக்கி போட்டியிட வைக்கிறார்கள். அக்கட்சியின் செய்தித் தொடர்பாளர் கே.பாக்யராசன், “எந்த வகையில் ஒரு சமுதாயம் ஒடுக்கப்பட்டாலும், அவர்களுக்கான உரிமைக்காக குரல் கொடுப்பதோடு, அவர்களுக்கு அரசியல் அங்கீகாரம் தரவும் செய்கிறோம். ஆர்.கே நகர் இடைத் தேர்தலில் ஜெயலலிதா போட்டியிட்டபோது அவரை எதிர்த்து தேவி என்கிற திருநங்கையை நிறுத்தினோம். இதன் மூலம் திருநங்கை சமுதாயம் கவனத்தைப் பெற்றது. மேலும்
திருநங்கை பாசறை
என்கிற பிரிவும் எங்கள் கட்சியில் உண்டு” என்கிறார்.

கே.பாக்யராசன்

நாம் தமிழர் போலவே இதர கட்சிகளும் சட்டமன்ற, நாடாளுமன்றத் தேர்தல்களில் திருநங்கைகளுக்கு வாய்ப்பு அளிக்க வேண்டும். திருநங்கைகள் பலர், தங்களுக்கென தனித்தொகுதி ஒதுக்கப்பட வேண்டும் என்ற கோரிக்கையை வைக்கிறார்கள்.

அதுவும் பரிசீலிக்கப்பட வேண்டும். திருநங்கைகள் குறித்த பொதுச் சமூகத்தின் பார்வை முழுமையாக மாறும்வரை காத்திருக்காமல் இத்தகைய நடவடிக்கைகள் முன்னெடுக்கப்படும்போது சமுதாய மாற்றமும் வேகமாக நிகழும்.

Leave a Comment

This site uses Akismet to reduce spam. Learn how your comment data is processed.