நீ்ட்: அரசியல் செய்கிறதா மத்திய பாஜக அரசு?

முதல்வர் ஸ்டாலின் தலைமையிலான திமுக அரசு மீண்டுமொரு முறை நீட் விலக்கு மசோதாவை இயற்றி தமிழக ஆளுநர் ஆர்.என்.ரவி வசம் அளித்துள்ளது. இரண்டாவது முறை மசோதா நிறைவேற்றப்பட்டுள்ளதால் ஆளுநர் மனம் இறங்கி ஒப்புதல் அளித்துவிடுவாரா என்று யாருக்கும் தெரியாது. ஆனால், இந்த முறை மசோதாவை மாதக்கணக்கில் தன்னுடைய மாளிகையிலேயே அவரால் வைத்திருக்க முடியாது என்பது மட்டும் நிச்சயம்.

ஆளுநர் மசோதாவை குடியரசுத் தலைவரின் ஒப்புதலுக்கு கூடிய விரைவில் அனுப்பி வைத்தாலும் அதற்கு ஜனாதிபதி உடனே ஒப்புதல் அளித்துவிடுவாரா அல்லது தற்போது போலவே முந்தைய அதிமுக ஆட்சியில் சட்டமன்றதத்தில் ஒருமனதாக நிறைவேற்றப்பட்ட நீட் விலக்கு மசோதா மத்திய அரசின் வசம் ஆண்டுக்கணக்கில் பத்திரமாக இருந்தது போன்றே தற்போதும் இருக்குமா என்பதெல்லாம் கல்வி கடவுளான அந்த சரஸ்வதிக்கே வெளிச்சம்.

சட்டமன்றத்தில் மசோதா நிறைவேற்றம், ஆளுநருக்கு அனுப்புதல், அதனை அவர் திருப்பி அனுப்புதல், மீண்டும் மசோதா நிறைவேற்றம் என ஆட்சிக்கு ஆட்சி இந்த விஷயம் ரிப்பீட் ஆவதை தவிர்க்கவும், மாணவர்களின் கல்வி விஷயத்தில் மத்திய அரசுடன் தொடர்ந்து மல்லுக்கட்டும் போக்கிற்கு முற்றுப்புள்ளி வைக்கவும் கல்வியை மீண்டும் மாநிலப் பட்டியலுக்கு கொண்டுவர வேண்டும் என்ற குரல்கள் தமிழகத்தில் கடந்த சில ஆண்டுகளாக அவ்வபோது ஒலித்து கொண்டிருக்கின்றன.

அதாவது அரசியலமைப்பு சட்டப்படி, அடிப்படை உரிமைகளில் ஒன்றான கல்வி தற்போது பொது பட்டியலில் உள்ளதால், நீட் போன்ற முக்கியமான விஷயங்களில் சட்டத்துககுட்பட்டும் மாநில அரசுகள் அவற்றின் விருப்பப்படி முடிவெடுக்க முடிவதில்லை. சட்ட உரிமையின்படி எந்த மாநிலமாவது நீட்டில் இருந்து விலக்கு கோரினால், அதே சட்டம் தமக்கு அளித்துள்ள உரிமையின் அடிப்படையில் மத்திய அரசு முட்டுக்கட்டை போடும் நிலை நீடித்து வருகிறது.

நீட் விஷயத்தில் பாஜக அண்ணாமலை அந்தர் பல்டி: ரகசியத்தை உடைத்த அமைச்சர் மா.சு!

இந்த மல்லுக்கட்டும் போராட்டத்துககு முடிவுகட்டும் விதத்தில் கல்வியை முழுமையாக மாநில அரசு பட்டியலுக்கு மாற்றிவிட்டால், நீட் போன்ற மாணவர்களின் எதிர்காலம் சம்பந்தமான முக்கிய விஷயங்களில் மாநில அரசுகளே முழு சுதந்திரத்துடன் முடிவெடுக்கும் நிலை ஏற்படும்.

ஆனால் தற்போதைய நிலையில், தமிழகம் உள்ளிட்ட சில மாநிலங்கள் விரும்புவதை போல, கல்வியை மாநிலப் பட்டியலில் கொண்டு வருவது அவ்வளவு எளிதான விஷயமல்ல. காரணம், இதற்கான சட்டத் திருந்த மசோதா நாடாளுமன்றங்களில் இரு அவைகளிலும் முதலில் நிறைவேற்றப்பட்டாக வேண்டும். ஆனால் மக்களவையில் மத்தியில் ஆளும் பாஜக அரசு பலத்துடன் உள்ளதுடன், பெரும்பாலான மாநிலங்களிலும் இக்கட்சியே ஆட்சி புரிந்து வருவதால் மாநிலங்களவையிலும் பாஜக பலமாகவே இருக்கிறது.

ஒரே நாடு ஒரே தேர்வு என்ற ஒற்றை நோக்கத்துடன் இருக்கும் ஒரு கட்சி, இரு அவைகளிலும் பலத்துடன் இருக்கும்போது, கல்வி விஷயத்தை போனால் போகட்டும் என்று மாநிலங்களுக்கு விட்டு கொடுக்கும் என்று எதிர்பார்க்க முடியாது.

பதவி விலகும் தமிழக ஆளுநர்?; கிண்டி ராஜ்பவனில் பரபரப்பு!

ஆனால், அதுவே மாநில சுயாட்சி உரிமை குறித்து உரக்க பேசும் மாநிலங்களின் வாயை மூடச்செய்ய, கல்வியை பொதுப் பட்டியலில் இருந்து மொத்தமாக மத்திய பட்டியலுக்கு கொண்டு போக மத்திய பாஜக அரசு நினைத்தால் அதற்கான சட்டத்திருத்த மசோதாவை நாடாளுமன்ற இருஅவைகளிலும் பெரும்பான்மையாக உள்ள தங்களது கட்சி மற்றும் கூட்டணி கட்சிகளின் ஆதரவுடன் எளிதாக நிறைவேற்றி விடலாம்.

ஆனால் இந்த விஷயத்தை மத்திய பாஜக அரசு ஆர்வம் காட்டாமல், நீட் விலக்கு கோரும் மாநில அரசுடன் ஆளுநர்களை வைத்து நீயா, நானா என போட்டியிட்டு கொண்டிருப்பது ஏன் என்ற கேள்வி எழுந்துள்ளது.

கலைஞர் பாணியில் ஃபோன் போட்ட ஸ்டாலின்; அமைச்சர் வார்னிங்!

‘பொதுப் பட்டியலில் உள்ள கல்வியை முழுமையாக மத்திய பட்டியலுக்கு கொண்டு சென்றால் நாடு முழுவதும் கல்விக்கான செலவு மொத்தத்தையோ, பெரும் பங்கை மத்திய அரசே ஏற்க வேண்டி வரலாம்.

இந்த முயற்சியை முன்னெடுத்தால் அதற்கு பாஜக ஆளும் மாநில அரசுகள் மற்றும் கூட்டணி கட்சிகள் ஆட்சி செய்யும் மாநிலங்களின் முதல்வர்கள் அனைவரும் ஒருமனதாக ஆதரவு அளிப்பது சந்தேகமே. அவ்வாறு முழுமையான ஆதரவு கிடைக்காதபட்சத்தில் அது அரசியல்ரீதியாக பாஜகவுக்கு பின்னடைவை ஏற்படுத்தலாம்.

முக்கியமாக, கல்வியை பொதுப் பட்டியலில் இருந்து சட்டென மத்திய பட்டியலுக்கு கொண்டு சென்றுவிட்டால், தமிழ்நாடு போன்ற பாஜக இன்னும் காலுன்ற வேண்டியுள்ள மாநிலங்களில் அக்கட்சி அரசியல் செய்வதற்கு இதைவிட வெயிட்டான விஷயம் கிடைக்காமல் போகலாம்.

இதுபோன்ற காரணங்களால்தான் நீட் விஷயத்தில் ஆளுநர்களை வைத்து, மத்திய பாஜக அரசு மறைமுகமாக விளையாடிக் கொண்டிருக்கிறது’ என்பதே கல்வி ஆர்வலர்கள், அரசியல் விமர்சகர்கள் ஒரு சாரரீன் கருத்தாக உள்ளது.

Leave a Comment

This site uses Akismet to reduce spam. Learn how your comment data is processed.