கொங்கு கலாட்டா: திமுக கூடாரத்தில் வேலுமணி; ஸ்வீட் பாக்ஸ் நம்பிக்கையில் செந்தில் பாலாஜி!

கோவை
எப்போதுமே முதல்வர் ஸ்டாலின் திமுகவின் பிரஸ்டிஜ் பிராப்ளமாகவே பார்த்து வருகிறார். கடந்த சட்டமன்றத் தேர்தல் இதற்கு மற்றொரு உதாரணம். மாநிலம் முழுவதும் கணிசமான இடங்களை
திமுக
வென்றாலும், கோவையில் உள்ள 10 தொகுதிகளில் 9இல் அதிமுகவும், 1இல் அதன் கூட்டணி கட்சியான பாஜகவும் வெற்றி வாகை சூடியது. இந்த வெற்றிக்கு அப்போதைய அமைச்சர்
எஸ்.பி.வேலுமணி
முக்கிய காரணமாக இருந்தார்.

இந்த சூழலில்
நகர்ப்புற உள்ளாட்சித் தேர்தல்
வருகிற 19ஆம் தேதி நடைபெறவுள்ளது. கோவை மாநகரத்தில் மொத்தம் 100 வார்டுகள் உள்ளன. ஆட்சிக்கு வந்ததும் கோவைக்கு சிறப்பு கவனம் செலுத்தி வரும் ஸ்டாலின், கோவை மாவட்ட பொறுப்பாளராக செந்தில் பாலாஜியை நியமித்தார். அவரும் அன்றிலிருந்து கோவையில் வீடு எடுத்து தங்கி தீவிரமாக களப்பணியாற்றி வருகிறார்.

கொங்கை திமுகவின் கோட்டையாக மாற்றி காட்டுவேன் என்றும், நகர்ப்புற உள்ளாட்சித் தேர்தலில் பெருவாரியான இடங்களை கோவை மாநகரில் திமுக கைபற்றும் என்ற உறுதியையும் முதல்வரிடத்தில் கொடுத்து விட்டுத்தான் கோவைக்கே அவர் வந்தார் என்கிறார்கள் அவருக்கு நெருக்கமானவர்கள்.

முன்னாள் அமைச்சரும், கோவை மண்ணின் மைந்தருமான எஸ்.பி.வேலுமணி, திமுக கூடாரத்துக்குள்ளேயே ஊடுருவும் ஆற்றல் படைத்தவர். வேலுமணியால் பலன் பெற்ற விசுவாசமான சில நிர்வாகிகள் மாவட்ட திமுகவில் முக்கியமான பொறுப்புகளில் இருக்கிறார்கள். இவர்கள் மூலம்தான் கடந்த தேர்தலில் அதிமுகவுக்கு அவர் வெற்றியை தேடித்தந்துள்ளதாக கூறப்படுகிறது. அவர்கள் அனைவரும் தற்போதும் வேலுமணிக்கு விசுவாசமாக இருப்பதும், முக்கிய ஒப்பந்தகாரர்கள் கரன்சிகளை இறக்குவதும் வேலுமணிக்கு கூடுதல் பலமாக பார்க்கப்படுகிறது.

மேலும், கடந்த முறை செய்ததை போன்றே இந்த முறையும் செய்யுங்கள்; மாற்றான் தோட்டத்து மல்லிகையையும் கவனிக்க வேண்டும் என்று கூறி விட்டாராம். அத்துடன், தற்போதே பூத் கமிட்டிக்கு பணம், வாக்காளர்களுக்கு பணப்பட்டுவாடா என்று கச்சிதமாக காய் நகர்த்தி வருகிறார் எஸ்.பி.வேலுமணி.

கலைஞர் பாணியில் ஃபோன் போட்ட ஸ்டாலின்; அமைச்சர் வார்னிங்!

திமுகவின் இந்த கருப்பு ஆடுகள் பற்றி கட்சித் தலைமைக்கு கடந்த தேர்தலின்போதே புகார்கள் சென்றபோது எவ்வித நடவடிக்கையும் எடுக்காமல் ஸ்டாலின் அமைதி காத்து வருகிறார். இதன் காரணமாகவே நம்பிக்கைக்கு உரிய ஒருவரை கோவைக்கு பொறுப்பாளராக நியமிக்க வேண்டும் என்று அவர் விருப்பம் காட்டினார். பல்வேறு தேடல்களுக்கு பிறகு அவரது சாய்ஸாக இருந்தது செந்தில் பாலாஜிதான். அவரும் அதற்கேற்ற வகையில் பணியாற்றி வருகிறார். தேர்தலுக்கு பிறகு திமுகவின் கருப்பு ஆடுகளுக்கு கச்சேரி இருக்கிறது என்கிறார்கள் செந்தில் பாலாஜிக்கு நெருக்கமானவர்கள்.

எஸ்.பி.வேலுமணி போல், செந்தில் பாலாஜிக்கு ஸ்லீப்பர் செல் இல்லையென்றாலும், ஆளுங்கட்சியின் அமைச்சர் என்ற முறையில் உளவுத்துறை ரிப்போர்ட், மேலிடத் தகவல்கள் என அனைத்தையும் பெற்று காய்களை நகர்த்தி வருகிறார்
செந்தில் பாலாஜி
என்கின்றனர் அரசியல் விவரம் அறிந்தவர்கள். மேலும், எஸ்.பி.வேலுமணிக்கு நானும் சலைத்தவன் இல்லை என்பது போல, வாக்குக்குப் பணம் கொடுக்கும் விஷயத்திலும் தனது நேர்த்தியான சிஸ்டத்தையும் செந்தில் பாலாஜி ஃபாலோ செய்து வருவதாக கூறுகிறார்கள். ஸ்வீட் பாக்ஸ் விநியோகத்திற்காக கரூரில் இருந்து ஸ்பெஷல் டீம் ஒன்று இறக்கப்பட்டுள்ளதாம்.

இப்போதே பூத் கமிட்டிகளுக்கு ரூ.10,000 வரை கொடுக்கப்படுகிறதாம். இந்த தொகை இன்னும் அதிகரிக்கும் என்கிறார்கள். அதுதவிர, வார்டு செயலாளர்களுக்கு ஏற்கனவே தனியாக ஒரு பெரும் தொகை சென்று விட்டதாம். திமுகவினரின் பொருளாதாரத் தேவைகளையும் அவர் பூர்த்தி செய்து வருகிறாராம். நகர்புற உள்ளாட்சித் தேர்தல் முடிவுகளின்போது வெற்றி, தோல்வி தெரிந்து விடும் என்றாலும், தற்போதைக்கு கோவையில் இவர்கள் இருவருக்கும் இடையேதான் போட்டாபோட்டி என்கிறார்கள்.

Leave a Comment

This site uses Akismet to reduce spam. Learn how your comment data is processed.