உக்ரைன் மீது போர் தொடுத்துள்ள ரஷ்யா பல்முனை தாக்குதலை நடத்தி வருகிறது. சர்வதேச கண்டனம், எதிர்ப்பு என எதையும் கண்டு கொள்ளாமல் ரஷ்யா தாக்குதல் நடத்தி வருகிறது. ரஷ்ய படைகள் வேகமாக முன்னேறி வருவதாகவும் தகவல்கள் வெளியாகியுள்ளன.
தலைநகர் கீவ்-யை குறித்து வைத்து ரஷ்ய படைகள் தாக்கி வருகின்றன. மேலும், சில பகுதிகளை ரஷ்ய ராணுவம் கைபற்றியுள்ளதாகவும் அங்கிருந்து வரும் செய்திகள் கூறுகின்றன. உக்ரைனின் ராணுவத் தளங்கள், விமான நிலையங்கள் உள்ளிட்ட அரசு அமைப்புகள் மீது தாக்குதல் நடத்தி அதனை அழிப்பதே எங்கள் இலக்கு என்று ரஷ்ய அரசு முதலில் தெரிவித்தது. ஆனால், குழந்தைகள், பொதுமக்கள் என ரஷ்ய படைகளின் தாக்குதலில் ஆயிரக்கணக்கானோர் உயிரிழந்துள்ளதாக உக்ரைன் அரசு தெரிவித்துள்ளது.
இது தவிர ராணுவ வீரர்களும் உயிரிழந்துள்ளனர். அதேபோல், ரஷ்ய வீரர்களும் சுமார் 4000க்கும் மேற்பட்டோர் உயிரிழந்துள்ளதாக தகவல்கள் வெளியாகியுள்ளன. ஆனால், இவை அனைத்துமே போர் காலங்களில் வழக்கமாக சொல்லப்படும் எண்ணிக்கையே தவிர இந்த எண்ணிக்கையில் மாற்றங்கள் இருக்கலாம் என்றும் கூறப்படுகிறது.
சரிதான் ஏதோ சம்பவம் இருக்கு… ரஷியாவில் உள்ள அமெரிக்கர்களுக்கு போன அலர்ட் மெசேஜ்!
உக்ரைனை காக்க அந்நாட்டு மக்கள் ஆயுதம் ஏந்த வேண்டும் என வேண்டுகோள் விடுத்துள்ள அந்நாட்டு அரசு, அவ்வாறு வருபவர்களுக்கு ஆயுதங்களையும் வழங்கி வருகிறது. மேலும், ராணுவ அனுபவம் கொண்டவர்கள் சிறையில் இருப்பின் அவர்களை விடுதலை செய்யவும் உக்ரைன் அரசு உத்தரவிட்டுள்ளது. அவர்கள் நாட்டுக்காக போராட வேண்டும் என்ற நிபந்தனையுடன் விடுதலை செய்யப்பட்டு வருகின்றனர்.
இந்த நிலையில், உக்ரைன் தலைநகர் கீவ்-இல் மார்ச் 1ஆம் தேதி (இன்று) முதல் மது விற்பனைக்கு தடை விதித்து அந்நகர மேயர் உத்தரவிட்டுள்ளார். “தலைநகரில் மதுபானங்கள் விற்பனை கண்டிப்பாக தடை செய்யப்பட்டுள்ளது. கடைகள் மற்றும் மருந்தகங்களில் உரிமையாளர்கள் கவனம் செலுத்த வேண்டும். உணவுப்பொருட்கள், அத்தியாவசிய பொருட்கள் மற்றும் மருந்துகளின் விலையை உயர்த்தி, சூழ்நிலையைப் பயன்படுத்தி, கொள்ளையடிப்பதை விட போர் சிறந்தது அல்ல.” என்று கீவ் மேயர் விட்டலி கிளிட்ச்கோ தெரிவித்துள்ளார்.
முன்னதாக, பெலாரஸ் நாட்டில் உக்ரைன் – ரஷ்யா ஆகிய நாடுகள் இடையே பேச்சுவார்த்தை நடைபெற்று முடிந்துள்ளது என்பது குறிப்பிடத்தக்கது.