இந்தியாவில், ஊரடங்கு கட்டுப்பாடுகள் மிகவும் கடுமையாக வாய்ப்பு உள்ளதாக தகவல் வெளியாகி உள்ளது.
ஒமைக்ரான்
இந்தியாவில், கடந்த 2021 ஆம் ஆண்டு டிசம்பர் மாதம், தென் ஆப்பிரிக்க நாட்டில் கண்டுபிடிக்கப்பட்ட, புதிய வகை
கொரோனா
தொற்றான, ஒமைக்ரான் தொற்று பரவியது. இந்த வைரஸ் தொற்று காரணமாக, தமிழகம், மத்திய பிரதேசம், உத்தர பிரதேசம், குஜராத், மகாராஷ்டிரா, ஆந்திரா, கர்நாடகா, டெல்லி உள்ளிட்ட பெரும்பாலான மாநிலங்களில், கொரோனா பரவல் அதிகரித்தது. இதன் காரணமாக, இரவு நேர ஊரடங்கு, வார இறுதி நாட்களில்
முழு ஊரடங்கு
போன்ற நடவடிக்கைகளை மாநில அரசுகள் மேற்கொண்டன.
தளர்வுகள்
இதை அடுத்து கடந்த ஜனவரி மாத இறுதி வாக்கில், கொரோனா மூன்றாவது அலையின் தாக்கம் குறைந்ததை அடுத்து இரவு நேர ஊரடங்கு ரத்து செய்யப்பட்டு பல்வேறு தளர்வுகள் அளிக்கப்பட்டு உள்ளன. இதன் ஒரு பகுதியாக, தமிழகம் உள்ளிட்ட மாநிலங்களில் பள்ளி, கல்லூரிகள் திறக்கப்பட்டு முழு முன்னெச்சரிக்கை நடவடிக்கைகளுடன் வகுப்புகள் நடத்தப்பட்டு வருகின்றன.
சீனாவுக்கு ஆபத்து
இதற்கிடையே, கொரோனா தொற்றின் பிறப்பிடமாகக் கருதப்படும் அண்டை நாடான சீனாவில், கடந்த சில நாட்களாக, கொரோனா பரவலின் வேகம் அதிகரித்து வருகிறது. சுமார் இரண்டு ஆண்டுகளுக்கு பிறகு அந்நாட்டில் கொரோனா தினசரி பாதிப்பு அதிகரித்து வருகிறது. இதன் காரணமாக, சாங்சுன், ஷாங்காய் உள்ளிட்ட நகரங்களில், முழு ஊரடங்கு பிறப்பிக்கப்பட்டு உள்ளது.
நான்காவது அலை
இந்நிலையில், சீனாவில் பரவும் கொரோனா வைரஸ் தொற்று காரணமாக, இந்தியாவில், மீண்டும் கொரோனா விஸ்வரூபமெடுக்க வாய்ப்பு உள்ளதாகக் கூறப்படுகிறது. சீனாவில் இருந்து
இந்தியா
வரும் பயணிகளை, தீவிரமாக கண்காணிக்க வேண்டும் என்ற கோரிக்கை மேலெழுந்துள்ளது. சீனாவில் பரவி வரும் வைரஸ் தொற்று, இந்தியாவுக்கு பரவும் பட்சத்தில், கொரோனா தொற்றின் நான்காவது அலை வீசக் கூடும்.
கடுமையாகும் கட்டுப்பாடுகள்
இதனால், முன்னெச்சரிக்கை நடவடிக்கையாக, ஊரடங்கில் கடுமையான கட்டுப்பாடுகளை விதிக்க மத்திய அரசு முடிவு செய்துள்ளதாக தகவல் வெளியாகி உள்ளது. இது குறித்த அறிவிப்பு வரும் நாட்களில் வெளியாகலாம் என எதிர்பார்க்கப்படுகிறது. முன்னதாக, ஜூன் மாதத்தில், இந்தியாவில் கொரோனா நான்காவது அலை வீச வாய்ப்பு உள்ளதாக ஐஐடி கான்பூர் ஆராய்ச்சியாளர்கள் கணித்திருந்தது குறிப்பிடத்தக்கது.