ஆண் உறுப்பு இருக்கும் பெண்ணை, தனக்கு ஏமாற்றி திருமணம் செய்து வைத்து விட்டதால், விவாகரத்து அளிக்க வேண்டும் எனக் கோரி, வாலிபர் ஒருவர், உச்ச நீதிமன்றத்தில் மனு தாக்கல் செய்த சம்பவம் பெரும் பரபரப்பை ஏற்படுத்தி உள்ளது.
மத்திய பிரதேச மாநிலத்தைச் சேர்ந்த வாலிபர் ஒருவருக்கு, கடந்த 2016 ஆம் ஆண்டு ஜூலை மாதம் திருமணம் நடந்தது. திருமணத்துக்கு பிறகு, தனது மனைவிக்கு பெண்மை இல்லை என்றும், அவர் ஒரு பெண் அல்ல என்றும் அவருக்கு தெரிய வந்தது. பரிசோதனையில், அவர் மனைவிக்கு பாலுறுப்பில் குறைபாடு இருப்பதும் தெரிய வந்தது.
மூன்று ஆண்டுகளுக்கு முன்பு இதனை சரி செய்ய மருத்துவமனையில் அவர் ஹார்மோன் சிகிச்சை செய்து கொண்டதும் தெரிய வந்தது. மருத்துவர் கூற்றுப்படி, அவருக்கு பெண் பாலின உறுப்பு இருந்தாலும், தாம்பத்ய வாழ்க்கையோ, குழந்தை பிறப்போ சாத்தியமில்லை என்று தெரிய வந்தது. இதை அடுத்து தனது மனைவியை அழைத்துச் செல்லுமாறு அவரது தந்தையிடம் கணவன் கூறினார். ஆனால் அதற்கு அந்தப் பெண்ணின் தந்தை ஒப்புதல் தெரிவிக்கவில்லை. அதோடு அந்த பெண்ணுக்கு அறுவை சிகிச்சையும் செய்யப்பட்டது.
இதற்கிடையே, தனது மனைவி பெண் அல்ல என்றும், இதனால் தனக்கு விவாகரத்து அளிக்க வேண்டும் என்றும் கோரி, மத்திய பிரதேச மாநிலத்தில் உள்ள கீழமை நீதிமன்றத்தில், கணவன் மனு தாக்கல் செய்தார். இந்த மனு தள்ளுபடி செய்யப்பட்டது. இதே போல், கடந்த ஆண்டு ஜூலை மாதம் 29 ஆம் தேதி, மத்திய பிரதேச மாநில உயர் நீதிமன்றமும் இந்த மனுவை நிராகரித்து உத்தரவிட்டது.
இந்நிலையில், மத்திய பிரதேச மாநில உயர் நீதிமன்றத்தின் உத்தரவை எதிர்த்து, உச்ச நீதிமன்றத்தில், கணவன் மேல் முறையீடு மனு தாக்கல் செய்தார். அந்த மனுவில், “தனது மனைவியிடம் பெண்மை இல்லை என்றும், பெண்ணுக்குரிய குணாதிசயங்கள் இல்லை என்றும், அவர் பெண்ணே இல்லை என்றும், தன்னை ஏமாற்றி திருமணம் செய்து விட்டதாகவும், இதனால் தனக்கு விவாகரத்து வழங்க வேண்டும்” என்றும் குறிப்பிட்டு இருந்தார். அதோடு மனைவியின் மருத்துவ தகவல்களையும் சமர்ப்பித்து இருந்தார்.
இந்த மனுவை பரிசீலித்த உச்ச நீதிமன்ற நீதிபதிகள் சஞ்சய் கிஷான் கவுல் மற்றும் எம்.எம்.சுந்தரேஷ் ஆகியோர், விசாரணைக்கு ஏற்றுக் கொண்டனர். அதன் அடிப்படையில் சம்பந்தப்பட்ட பெண்ணுக்கு நோட்டீஸ் அனுப்ப நீதிபதிகள் உத்தரவிட்டனர். இது தொடர்பாக மனைவி பதில் அளிக்க வேண்டும் என்று அந்த நோட்டீசில் தெரிவிக்கப்பட்டு உள்ளது.