தமிழ், தெலுங்கில் நடிப்பது பற்றி ஜான்வி கபூர்
தமிழில் அடுத்தடுத்து அஜித்தை வைத்து படங்களைத் தயாரித்து வருபவர் போனி கபூர். இவரது மூத்த மகள் ஜான்வி கபூர் தெலுங்கு, தமிழில் அறிமுகமாவது பற்றி அடிக்கடி செய்திகள் வரும். இதுவரை பல முறை இப்படியான செய்திகள் வந்துவிட்டன. அனைத்திற்கும் அவ்வப்போது மறுப்புகளைத் தெரிவிப்பார் ஜான்வி.
அந்த விதத்தில் தற்போது மீண்டும் ஒரு மறுப்பு தெரிவித்துள்ளார். விஜய் தேவரகொண்டா அடுத்து நடிக்க உள்ள 'ஜனகனமண' படத்தில் ஜான்வி கதாநாயகியாக நடிக்கப் போவதாக செய்திகள் வந்தன. அவற்றிற்கு மறுப்பு தெரிவித்து ஒரு பேட்டியில், “நான் எந்த ஒரு தமிழ், தெலுங்குப் படங்களிலும் நடிக்க ஒப்பந்தமாகவில்லை. அப்படி ஏதாவது ஒன்று நடந்தால் அதை நானோ அல்லது படத்தயாரிப்பு நிறுவனமோ அது பற்றி அறிவிப்பார்கள்,” என்று தெரிவித்துள்ளார்.
ஜான்வியின் அம்மாவான மறைந்த நடிகை ஸ்ரீதேவி, தமிழ், தெலுங்கில் முன்னணிக்கு வந்து பின்னர்தான் ஹிந்தியில் அறிமுகமாகி அங்கும் நம்பர் 1 இடத்தில் இருந்தார். ஆனால், ஜான்வி ஹிந்தியில் இன்னும் முன்னணி அந்தஸ்து நடிகையாகக் கூட உயராமல் இருக்கிறார்.