நாடாளுமன்ற மழைக்கால கூட்டத்தொடர் துவங்கி இரண்டு வாரங்களுக்கு மேலாகியும், விலைவாசி உயர்வு உள்ளிட்ட பிரச்னைகளை முன்வைத்து எதிர்க்கட்சிகள் நாள்தோறும் அமலில் ஈடுபட்டு வருவதால் மக்களவை, மாநிலங்களவை என இரண்டும் பெரும்பாலான நாட்கள் ஒத்திவைக்கப்பட்டே வருகின்றன.
அத்துடன் தொடர் அமளியில் ஈடுபட்டதாக திமுக, காங்கிரஸ், ஆம் ஆத்மி உள்ளிட்ட பல்வேறு எதிர்க்கட்சிகளை சேர்ந்த 25க்கும் மேற்பட்ட எம்பிக்கள் இந்த கூட்டத்தொடர் முழுவதும் சஸ்பெண்ட் செய்யப்படுவதாகவும் மக்களவை சபாநாயகர ஓம் பிர்லா அதிரடி நடவடிக்கை மேற்கொண்டுள்ளார்.
இப்படி நாளொரு சர்ச்சை, பொழுதொரு சஸ்பெண்ட் என்று நாடாளுமன்ற நிகழ்வுகள் போய்க் கொண்டிருக்கும் நிலையில், இவையெல்லாம் போதாதென்று இன்று அவை கூடியதும் மற்றொரு சர்ச்சை வெடித்தது.
நாட்டின் ஜனாதிபதியான திரௌபதி முர்முவை காங்கிரஸ் எம்பி ஆதிர் ரஞ்சன் சவுத்ரி வேறொரு வார்த்தையை குறிப்பிட்டு கூறிய விவகாரத்தை எழுப்பிய பாஜக எம்பிக்கள், குடியரசுத் தலைவரை அவமதிக்கும் வித்தில் காங்கிரஸ் எம்பி பேசியதற்காக சோனியா காந்தி சபையில் பகிரங்க மன்னிப்பு கேட்க வேண்டும் என்று அவர்கள் வலியுறுத்தினர்.
பதிலுக்கு விலைவாசி உயர்வு, எம்பிக்கள் சஸ்பெண்ட் ஆகிய விவகாரங்களை முன்வைத்து எதிர்க்கட்சிகளின் எம்பிக்களும் முழங்கங்களை எழுப்பினர். இதனால் தொடர்ந்து கூச்சல், குழப்பம் நிலவியதால் அவை பிற்பகல் 2 மணி வரை ஒத்திவைக்கப்பட்டது.
இந்நிலையில், இந்த விவகாரம் தொடர்பாக குடியரசுத் தலைவர் திரௌபதி முர்முவை நேரி்ல் சந்தித்து மன்னிப்பு கேட்கவும் தான் தயார் என்று ஆதிர் ரஞ்சன் சவுத்ரி தெரிவித்துள்ளார்.
இதுதொடர்பாக அவர் நாடாளுமன்ற வளாகத்தில் செய்தியாளர்களிடம் கூறும்போது, ” ஊடகங்களுக்கு பேட்டி அளித்தபோது. ராஷ்டிரபதி என்பதற்கு பதிலாக வாய் தவறி, ராஷ்டிரபுத்ரி என்று அழைத்துவிட்டேன். இதில் ஜனாதிபதியை அவமதிக்க வேண்டும் என்ற எண்ணம் எனக்கு துளியும் இல்லை. அவ்வாறு என்னால் கற்பனை செய்து கூட பார்க்க இயலவில்லை. ஆனால் இந்த விஷயத்தை பாஜகவினர் தான் பெரிதாக்குகின்றனர்.
இதனால் ஜனாதிபதியின் மனம் புண்பட்டிருந்தால் அதற்காக அவரை நேரில் சந்தித்து மன்னிப்பு கோரவும் தயார். அதற்காக இந்த விஷயத்தில் காங்கிரஸ் தலைவர் சோனியா காந்தியை யாரும் இழுக்க வேண்டாம்” என்று ஆதிர் ரஞ்சன் சவுத்ரி தெரிவித்துள்ளார்.