குஜராத் மாநில சட்டப்பேரவைத் தேர்தல் ஆதாயத்திற்காக எனது கருத்தை பாஜக தவறாக பயன்படுத்தி வருவதாக அகில் இந்திய காங்கிரஸ் கட்சித் தலைவர் மல்லிகார்ஜூன கார்கே தெரிவித்து உள்ளார்.
182 சட்டப்பேரவைத் தொகுதிகளைக் கொண்ட குஜராத் மாநிலத்தில், இரண்டு கட்டங்களாக, தேர்தல் நடக்கிறது. அதன்படி, 89 சட்டப்பேரவைத் தொகுதிகளுக்கு கடந்த 1 ஆம் தேதி முதற்கட்ட வாக்குப்பதிவு நடைபெற்றது. இதில், சுமார் 60 சதவீத வாக்குகள் பதிவாகி உள்ளதாக இந்தியத் தலைமைத் தேர்தல் ஆணையம் தெரிவித்து உள்ளது.
மீதம் உள்ள 93 சட்டப்பேரவைத் தொகுதிகளுக்கு, வரும் 5 ஆம் தேதி வாக்குப்பதிவு நடைபெற உள்ளது. இரண்டு கட்ட வாக்குப்பதிவில் பதிவாகும் வாக்குகள், 8 ஆம் தேதி எண்ணப்பட்டு முடிவுகள் அறிவிக்கப்பட உள்ளன. இந்தத் தேர்தலில் பாஜக – காங்கிரஸ் – ஆம் ஆத்மி என மும்முனை போட்டி நிலவுகிறது. இரண்டாம் கட்டத் தேர்தலுக்கு இரண்டு நாட்களே உள்ள நிலையில், அரசியல் கட்சிகள் தீவிர பிரசாரத்தில் ஈடுபட்டுள்ளன.
அண்மையில், அகமதாபாத்தில் நடந்த பேரணியில் பேசிய காங்கிரஸ் தலைவர் மல்லிகார்ஜூன கார்கே, “அனைத்துத் தேர்தல்களிலும் தனது முகத்தைப் பார்த்து வாக்களிக்க வேண்டும் என்று பிரதமர் மோடி கேட்டுக் கொண்டார். நீங்கள் ராவணனைப் போல் 100 தலைகளை கொண்டவரா?” என்று தெரிவித்தார். இந்தக் கருத்துக்கு பாஜகவினர் கடும் கண்டனம் தெரிவித்தனர். பிரதமர் நரேந்திர மோடியும், மல்லிகார்ஜூன கார்கேவின் கருத்துக்கு எதிர்ப்பும், கண்டனமும் தெரிவித்து இருந்தார்.
இந்நிலையில் இன்று, காங்கிரஸ் தலைவர் மல்லிகார்ஜூன் கார்கே கூறியதாவது:
காங்கிரஸ் கட்சியின் அரசியல் என்பது எந்த ஒரு நபருக்கும் எதிரானது அல்ல. நமது அரசியல், கொள்கைகள் சார்ந்தது. நாங்கள் செயல்திறன் அரசியலை நம்புகிறோம்; ஆனால் பாஜகவின் அரசியல் பாணி, பெரும்பாலும் ஜனநாயக உணர்வைக் கொண்டிருக்கவில்லை. நான் எந்த ஒரு தனி மனிதர் மீதும் கருத்து தெரிவிப்பதில்லை அல்லது தனிப்பட்ட கருத்துக்களை கூறுவதில்லை.
வளர்ச்சி, பணவீக்கம், வேலையில்லாத் திண்டாட்டம், வறுமை போன்ற பிரச்னைகளில் நான் (பாஜக அரசை) விமர்சித்தேன். பாஜகவின் அரசியல் எல்லா இடங்களிலும் ஒரு குறிப்பிட்ட நபரை மையமாகக் கொண்டுள்ளது. ஆம் ஆத்மி கட்சியை பாஜகவின் ‘பி டீம்’, யாரோ ஒருவரின் விருப்பத்தின் பேரில் காங்கிரஸ் வாக்குகளை வெட்ட ஆம் ஆத்மி முயற்சிக்கிறது.
இவ்வாறு அவர் கூறினார்.