தமிழ்நாடு அரசுத் துறைகளில் காலியாக உள்ள கிராம நிர்வாக அலுவலர், இளநிலை உதவியாளர், தட்டச்சர் உள்ளிட்ட 11 வகையான பணிகளுக்கு 7301 பேரை தேர்வு செய்வதற்கான க்ரூப் 4 தேர்வை தமிழ்நாடு அரசுப் பணியாளர் தேர்வாணையம் கடந்த ஆண்டு மார்ச் மாதம் 30-ஆம் தேதி அறிவித்து, கடந்த ஜூலை 24-ஆம் தேதி நடத்தியது.
இதற்கு 2 லட்சத்திற்கும் மேலானவர்கள் விண்ணப்பம் செய்து அவர்களில் 18.50 லட்சம் பேர் எழுதினார்கள்.
தேர்வர்கள் குழப்பம்
தேர்வு நடந்து 7 மாதங்கள் ஆகியும் முடிவுகள் வராமல் இருந்து கடந்த மார்ச் 24 ஆம் தேதி முடிவுகள் வெளியாகின. இந்நிலையில் டிஎன்பிஎஸ்சி க்ரூப் 4 தேர்வில் தென்காசி ஆகாஷ் பிரெண்ட்ஸ் பயிற்சி மையத்தில் படித்த 2000 மாணவர்கள் தேர்ச்சி பெற்றதாக தகவல் வெளியாகியுள்ளது. மேலும், மாநில அளவில் முதலிடம் பெற்ற 11 தேர்வர்களில் முதல் 6 இடத்தை அதே நிறுவனத்தில் படித்தவர்கள் என்றும் அந்நிறுவனம் தெரிவித்துள்ளதாக கூறப்படுகிறது.
தேர்வானவர்களின் பட்டியலை வெளியிடுவதாகவும் அந்நிறுவனம் தெரிவித்துள்ளது. இதனால் ஒரு நிறுவனத்தில் பயின்ற 2000 ஆயிரம் பேர் எப்படி தேர்ச்சி பெற்றனர் என்ற சந்தேகம் தேர்வர்களுக்குள் எழுந்துள்ளது. முன்னதாக பாமக நிறுவனர் ராமதாஸ் இந்த விவகாரத்தை பற்றி கேள்வி எழுப்பியிருந்தார்.
ராமதாஸ் கேள்வி
அதில் அவர், அரசுத்துறையில் 1089 நில அளவர், வரைவாளர்களை தேர்வு செய்வதற்காக கடந்த நவம்பர் மாதம் நடத்தப்பட்ட TNPSC போட்டித்தேர்வில் ஒரே மையத்தில் தேர்வு எழுதிய ஏறக்குறைய 700 பேர் தேர்ச்சி பெற்றிருக்கின்றனர். வாய்ப்பில்லாத இந்த சாதனை ஐயத்தை ஏற்படுத்துகிறது. மொத்தமாக தேர்ச்சி பெற்ற 700 பேரும் காரைக்குடியில் உள்ள நடுவத்தில் தேர்வு எழுதியுள்ளனர். அவர்களின் பெரும்பான்மையினர் காரைக்குடியில் உள்ள தனியார் பயிற்சி நடுவத்தில் பயிற்சி பெற்றவர்கள் என்பது ஐயத்தின் அளவை உயர்த்தியிருக்கிறது.
வெற்றி பெற்றவர்கள் முறையாக பயின்று திறமையால் தேர்வில் வெற்றி பெற்றிருந்தால் மகிழ்ச்சி தான். ஆனால், மொத்த பணியிடங்களில் 70% இடங்களுக்கு ஒரே மையத்தைச் சேர்ந்தவர்கள் வெற்றி பெறுவது இயற்கைக்கு எதிரானது என்றும் இது குறித்து விசாரணை நடத்த தமிழ்நாடு அரசுப் பணியாளர் தேர்வாணையம் ஆணையிட வேண்டும் கூறியிருந்தார்.