51.7 மீட்டர் நீளம் கொண்ட உள்நாட்டிலேயே தயாரிக்கப்பட்ட ஜி.எஸ்.எல்.வி எப் 12 ராக்கெட், 2,232 கிலோ எடை கொண்ட என்.வி.எஸ் 01 என்ற செயற்கைக்கோள் உடன் இன்று காலை 10.42 மணிக்கு விண்ணில் ஏவப்பட்டது. முன்னதாக ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி ஏவுதளத்தில் இருந்து விஞ்ஞானிகள் செயற்கைக்கோளை மிகவும் தீவிரமாக கண்காணித்து வந்தனர்.
இந்த ஜி.எஸ்.எல்.வி எப் 12 என்பது ஜி.எஸ்.எல்.வி வரிசையில் இஸ்ரோ அனுப்பிய 15வது ராக்கெட் ஆகும். இது 420 டன் உந்துவிசை எடை கொண்டது. இதில் என்.வி.எஸ் 01 என்பது இரண்டாம் தலைமுறை செயற்கைக்கோள் மாடல் என்பது கவனிக்கத்தக்கது.
ஜி.எஸ்.எல்.வி எப் 12 ராக்கெட்
இதன் ஆயுட்காலம் 12 ஆண்டுகள் ஆகும். இதில் எல் 1, எல் 5, எஸ் ஆகிய பேண்ட்கள் இருக்கின்றன. இவை அதிக அலைவரிசை கொண்ட பேண்ட்கள் என்பது சிறப்புக்குரிய ஒன்றாக பார்க்கப்படுகிறது. இத்தகைய பேண்ட்களை பயன்படுத்தும் நாடுகளின் வரிசையில் இந்தியா தற்போது 5வது இடத்தை பிடித்திருக்கிறது.
என்.வி.எஸ் 01 செயற்கைக்கோள்
அதுமட்டுமின்றி என்.வி.எஸ் 01 செயற்கைக்கோளில் உள்நாட்டிலேயே தயாரிக்கப்பட்ட ரூபிடியம் அணு கடிகாரம் இடம்பெற்றுள்ளது. ராக்கெட், செயற்கைக்கோள் ஆகிய இரண்டும் முழுவதும் இந்திய விஞ்ஞானிகளால் தயாரிக்கப்பட்டது. ஜி.எஸ்.எல்.வி எப் 12 ராக்கெட்டை விண்ணில் செலுத்துவதற்கான கவுண்ட்டவுன் நேற்று காலை 7.12 மணிக்கு தொடங்கப்பட்டது.
சுற்றுவட்டப் பாதையில் நிலைநிறுத்தம்
இந்நிலையில் புவியின் சுற்றுவட்டப் பாதையில் சுமார் 36 ஆயிரம் கிலோமீட்டர் உயரத்தில் என்.வி.எஸ் 01 செயற்கைக்கோளை நிலைநிறுத்த திட்டமிடப்பட்டுள்ளது. முன்னதாக ராக்கெட்டில் இருந்த மூன்று பாகங்களும் ஒவ்வொன்றாக பிரிந்து சென்று கடலில் விழும் வகையில் வடிவமைக்கப்பட்டுள்ளது. என்.வி.எஸ் 01 செயற்கைக்கோள் நிலம் மற்றும் கடல் பரப்பில் இடம், தொலைவு ஆகியவற்றை மிகவும் துல்லியமாக கணிக்கக் கூடியது.
வழிகாட்டும் சேவை
இந்த என்.வி.எஸ் 01 செயற்கைக்கோள் ஆனது நமது நாட்டில் செல்போன்களுக்கான ரியல் டைம் நேவிகேஷன் வசதி, அரசு, நிதி, மின்துறை நிறுவனங்களுக்கு தரவுகளை பெறுதல், நேர அளவீடு உள்ளிட்ட சேவைகளை வழங்குகிறது. மேலும் கடல், வான்வழி, தரை வழி போக்குவரத்திற்கு வழிகாட்டும் சேவையை அளிக்கிறது. சுருக்கமாக சொல்ல வேண்டுமெனில் வழிகாட்டும் செயற்கைக்கோள் எனக் குறிப்பிடலாம்.