Railway Minister Vaishnav informs CBI that there may be a conspiracy in the Odisha train accident | ஒடிசா ரயில் விபத்தில் சதி இருக்கலாம் சி.பி.ஐ., விசாரணைக்கு பரிந்துரை

சி.ஏ.ஜி., அறிக்கை கூறுவது என்ன?

ரயில்வே பாதுகாப்பு தொடர்பாக, சி.ஏ.ஜி., எனப்படும் மத்திய தலைமை தணிக்கையாளர் அறிக்கை, கடந்தாண்டு செப்.,ல் பார்லிமென்டில் தாக்கல் செய்யப்பட்டது. அதில், ரயில்வே பாதுகாப்பில் பல குளறுபடிகள் உள்ளதாக கூறப்பட்டுள்ளது. அந்த அறிக்கையில் கூறப்பட்டுள்ளதாவது: ரயில்கள் தடம் புரள்வது மற்றும் நேருக்கு நேர் மோதிக் கொள்வதை தடுப்பதற்கு சரியான நடைமுறைகள் உருவாக்கப்படவில்லை. ரயில் பாதைகள் பராமரிப்பு தொடர்பாக ஆய்வுகள் நடத்தப்படுவதில்லை. இதற்கு முந்தைய தடம் புரள்வது மற்றும் விபத்து குறித்த விசாரணை அறிக்கைகளில் கூறப்பட்டுள்ள எந்த ஒரு பரிந்துரையும் ஏற்கப்படவும் இல்லை; செயல்படுத்தப்படவும் இல்லை.முக்கிய மற்றும் அவசர பணிகளுக்கான நிதி முறையாக பயன்படுத்தவில்லை. ரயில் பாதைகளை மாற்றி அமைப்பதற்கான நிதி தொடர்ந்து குறைக்கப்பட்டுள்ளது. பாதுகாப்பு நடைமுறைகளை செயல்படுத்த போதிய ஊழியர்கள் இல்லை.ரயில் பாதைகள் கண்காணிப்புக்கான ஆய்வுகள் நடத்தப்படுவதில், 30 – 100 சதவீத குறைபாடுகள் உள்ளன.இவ்வாறு அந்த அறிக்கையில் குறிப்பிடப்பட்டுள்ளது.

‘டிரைவர் மீது தப்பில்லை’

விபத்து குறித்து ரயில்வே வாரியத்தின் சிக்னல் பிரிவின் முதன்மை செயல் இயக்குனர் சந்தீப் மாத்துார், செயல்பாடு மற்றும் வர்த்தக மேம்பாட்டு பிரிவின் உறுப்பினர் ஜெயா வர்மா சின்ஹா ஆகியார் நேற்று கூறியுள்ளதாவது:இந்த விபத்தில் மூன்று ரயில்கள் சிக்கியுள்ளன. ஆனால், கோரமண்டல் எக்ஸ்பிரஸ் ரயிலால் தான் இந்த விபத்து ஏற்பட்டுள்ளது. அந்த ரயில், மாற்றுப் பாதையில் சென்று, அங்கு நிறுத்தப்பட்டிருந்த சரக்கு ரயில் மீது மோதியுள்ளது.இந்த விஷயத்தில், ரயில் டிரைவர் மீது எந்தக் குற்றமும் இல்லை. சிக்னல் கிடைத்ததால்தான் அவர் சென்றுள்ளார். மேலும், இந்த மார்க்கத்தில் அனுமதிக்கப்பட்ட வேகம், மணிக்கு 130 கி.மீ., ஆகும். இந்த ரயில், 128 கி.மீ., வேகத்தில் சென்றுள்ளது. அதனால், வேகக் கட்டுப்பாட்டையும் கோரமண்டல் ரயில் டிரைவர் மீறவில்லை.இன்டர் லாக்கிங் முறை என்பது சிறப்பான ஒன்று. ஒருவேளை இதில் பிரச்னை ஏற்பட்டால், உடனடியாக அனைத்து சிக்னல்களும் சிவப்பாக மாறிவிடும். இதையடுத்து அனைத்து ரயில்களும் நிறுத்தப்படும். சிக்னல் செயல்பாட்டில், ‘பாயின்ட் மெஷின்’ என்பது மிகவும் முக்கியமாகும். அது காட்டும் வழியில்தான், ரயில் டிரைவர், ரயிலை இயக்குவார். எதிரே உள்ள பாதையில் வேறு எந்த ரயிலும் இல்லை, நேராக செல்லலாம் என்பதை குறிக்க, பச்சை நிற சிக்னல் கொடுக்கப்படும். ஒருவேளை எதிரே உள்ள பாதையில் மற்றொரு ரயில் நிறுத்தப்பட்டிருந்தால், ‘லுாப் லைன்’ எனப்படும் மாற்றுப் பாதையில் செல்ல, ஆரஞ்ச் நிற சிக்னல் கொடுக்கப்படும்.ஆனால், சிக்னல் பாயின்ட் இயந்திரத்தில் சில தவறுகள் நடந்துள்ளன. பாயின்ட் மெஷின் தவறான பாதையை காட்டியுள்ளது. இதற்கான காரணம் குறித்து விசாரிக்கப்படும்.இவ்வாறு அவர்கள் கூறினர்.

‘இன்டர் லாக்கிங்’ என்றால் என்ன?

‘எலக்ட்ரானிக் இன்டர் லாக்கிங்’ என்பது ரயில்களை பாதுகாப்பாக இயக்க, ரயில்வே கையாளும் இயந்திர தொழில்நுட்ப கட்டமைப்பு. இது இயந்திரவியல், மின்னியல் மின்சாரவியல் தொடர்புடையது. ஒரு ரயிலை உள்ளே வரவழைப்பதற்கு அல்லது அனுப்புவதற்கு தேவைப்படும் பாய்ன்டுகள், போக்குவரத்துக்கு ஏற்ற வகையில், ரயில் பாதையை மாற்ற வேண்டிய இடத்தில் பாதையைப் பூட்டி, ரயில்கள் அதன் மீது செல்ல அனுமதிக்கும் சிக்னல் முறை. இதுவே இன்டர்லாக்கிங் என அழைக்கப்படுகிறது.இதில், 1, 2, 3 என பல வகைகள் உள்ளன. ரயில்களின் வேகத்தை அதிகரிக்கும்போது. அதற்கு ஏற்றார்போல், இந்த இன்டர் லாக்கிங் தரமும் உயர்த்தப்படுகிறது.