மேலும் 15 நாட்கள் 5,000 கன அடி நீர் தமிழகத்துக்கு திறக்க ஆணையம் உத்தரவு| The commission also ordered to release 5,000 cubic feet of water to Tamil Nadu for 15 days

‘மேலும், 15 நாட்களுக்கு, 5,000 கன அடி தண்ணீரை தமிழகத்துக்கு திறந்துவிட வேண்டும்’ என, காவிரி ஆணையக் கூட்டத்தில் முடிவெடுக்கப்பட்டுள்ளது.

காவிரி நதிநீர் மேலாண்மை ஆணையத்தின், 24 வது ஆலோசனை கூட்டம் நேற்று டில்லியில் நடந்தது. ஆணையத்தின் தலைவர் ஹல்தர் தலைமையில் நடந்த இந்த கூட்டத்தில் தமிழகம், கர்நாடகா, கேரளா, புதுச்சேரி மாநில அரசுகளின் பிரதிநிதிகள் பங்கேற்றனர்.

தமிழக அரசின் சார்பில், நீர்வளத்துறை கூடுதல் தலைமைச் செயலர் சந்தீப் சக்சேனா, காவிரி தொழில்நுட்பக் குழு தலைவர் சுப்ரமணியம் உள்ளிட்ட அதிகாரிகள் பங்கேற்றனர்

வழக்கம்போல தமிழகம் மற்றும் கர்நாடா அரசுகளுக்கு இடையில் வாத பிரதிவாதங்கள் நடந்தன. தமிழகம் சார்பில் 12,500 கன அடி தண்ணீரையாவது திறந்துவிட வேண்டுமென்று கேட்கப்பட்டது.

ஆனால், 3,000 கன அடி தண்ணீர் மட்டுமே திறக்க முடியுமென்றும், மழை பொழிவு குறைவு, தண்ணீர் இருப்பு இல்லை என்ற காரணங்களையும் கர்நாடகா தரப்பு அடுக்கியது.

இறுதியாக, காவிரியில் மேலும், 15 நாட்களுக்கு, 5,000 கன அடி தண்ணீரை தமிழகத்துக்கு கர்நாடகா திறந்து விட வேண்டுமென்று ஆணையத்தின் சார்பில் முடிவெடுக்கப்பட்டு அறிவுறுத்தப்பட்டது.

தமிழகத்துக்கு இதுவரை வழங்கப்பட்ட தண்ணீரின் அளவு, கர்நாடகா தரப்பில் தரப்பட வேண்டிய நிலுவைத் தண்ணீரின் அளவு என அனைத்து புள்ளிவிபரங்களும் சமர்ப்பிக்கப்பட்டது.

காவிரி ஒழுங்காற்றுக் குழுவின் அடுத்த ஆலோசனைக் கூட்டத்தை வரும், 26ம் தேதி நடத்துவது என்றும் தீர்மானிக்கப்பட்டுள்ளது.

– நமது டில்லி நிருபர் –