பாலி: ஜி20 மாநாட்டின் துவக்கத்தில் பிரதமர் மோடியை, அமெரிக்க அதிபர் ஜோ பைடன் தேடிச்சென்று கைகுலுக்கி வரவேற்றார். இந்த வீடியோ வைரலாகியுள்ளது.
ஜி20 நாடுகளின் 17வது உச்சி மாநாடு இந்தோனேஷியாவின் பாலி நகரில் இன்று (நவ.,15) துவங்கியது. இதில் இந்திய பிரதமர் மோடி, அமெரிக்க அதிபர் ஜோ பைடன், பிரிட்டனின் புதிய பிரதமராக தேர்ந்தெடுக்கப்பட்ட ரிஷி சுனக் உள்ளிட்ட பல நாட்டு தலைவர்கள் பங்கேற்றனர்.
மாநாட்டின் துவக்கத்தில் தலைவர்கள் இருக்கையில் அமர தயாராகினர். அப்போது பிரதமர் மோடி அருகே வேகமாக சென்ற அமெரிக்க அதிபர் ஜோ பைடன் தனிப்பட்ட முறையில் கைகுலுக்கி, கட்டித்தழுவி வரவேற்றார்.
இருவரும் சில வினாடிகள் உரையாடினர். அதன் பின்னர் மற்ற நாட்டு தலைவர்கள் பைடன் இருக்கை அருகே வந்து அவரை வரவேற்றனர். இதனைத்தொடர்ந்து பைடன், மோடியின் இருக்கை அருகே அமர்ந்தார்.
முன்னதாக ஜெர்மனியில் ஜி7 நாடுகள் உச்சி மாநாட்டின்போதும், புகைப்படம் எடுக்கும் நிகழ்வில் பிரதமர் மோடி, கனடா பிரதமர் ஜஸ்டின் ரூடோவுடன் பேசிக் கொண்டிருந்தபோது, மோடியை தேடி சென்று அவரது தோளை தட்டி அழைத்த பைடன், தனது வாழ்த்துகளை தெரிவித்தார். பைடனை கண்டவுடன் மகிழ்ச்சியுடன் அவரை வரவேற்ற மோடி கைகுலுக்கி பதிலுக்கு வாழ்த்து கூறியது குறிப்பிடத்தக்கது.
தலைவர்களுடன் சந்திப்பு
மாநாட்டின் இடையே பிரிட்டன் பிரதமர் ரிஷி சுனக்கும், இந்திய பிரதமர் நரேந்திர மோடியும் சந்தித்து பேசினர். இருவரும் சில நிமிடங்கள் உரையாடினர். இந்திய வம்சாவளியை சேர்ந்தவரான ரிஷி சுனக், பிரதமராக பதவியேற்றப்பின் இருவரும் முதன்முறையாக சந்தித்து பேசியுள்ளனர்.
அதேபோல், மாநாட்டில் பங்கேற்ற பிரான்ஸ் அதிபர் இமானுவேல் மேக்ரான், நெதர்லாந்து பிரதமர் மார்க் ரூட்டையும், பிரதமர் மோடி சந்தித்து பேசினார். ஜி20 மாநாட்டில் பங்கேற்ற 8 நாட்டு தலைவர்களுடன் தனித்தனியாக சந்தித்து ஆலோசனை நடத்த உள்ளார்.
இதனைத்தொடர்ந்து உலக சுகாதார அமைப்பின் தலைவர் டெட்ரோஸ் அதானோம் கெப்ரேயஸ் பிரதமர் மோடியை சந்தித்து உரையாடினார்.
புதிய செய்திகளுக்கு தினமலர் சேனலை Subscribe செய்யுங்கள்
Advertisement