1925-ம் ஆண்டு பிஜ்னோர் நகரத்தில் பிறந்தவர் சாந்தி பூஷன். வழக்கறிஞரான இவர், காங்கிரஸ் (ஓ) கட்சியிலும் பின்னர் ஜனதா கட்சியிலும் உறுப்பினராக இருந்தார். அவர் 1977 முதல் 1980 வரை மாநிலங்களவை உறுப்பினராக இருந்தார். 1980-ல் ஜனதா கட்சியில் இருந்து விலகி பாஜகவில் சேர்ந்தார். 1986-ல் தேர்தல் மனுவில் அவரது ஆலோசனையை பாஜக ஏற்காததால், அக்கட்சியில் இருந்து விலகினார். பின்னர் நன்கு அறியப்பட்ட NGO ‘Centre for Public Interest Litigation’ ஐ நிறுவினார். இந்த அமைப்பு அதன் தொடக்கத்திலிருந்து உச்ச நீதிமன்றத்தில் பல குறிப்பிடத்தக்க பொது நல வழக்குகளை சமர்ப்பித்துள்ளது.
இதனிடையே ராம் மனோகர் லோஹியாவின் எஸ்எஸ்பியின் தலைவரான ராஜ் நாராயணன், ரேபரேலி மக்களவைத் தொகுதியில் இந்திரா காந்தியிடம் தோல்வியடைந்தார், அதைத் தொடர்ந்து ஊழல் தேர்தல் நடைமுறைகளை மேற்கோள் காட்டி இந்திரா காந்தியின் தேர்தலை ரத்து செய்ய மேல்முறையீடு செய்தார். இந்த வழக்கில் சாந்தி பூஷன் வக்கீலாக இருந்தார்.
அலகாபாத் நீதிமன்றத்தில் ராஜ் நாராயணன் சார்பில் சாந்தி பூஷன் ஆஜரானார், இதன் விளைவாக அப்போதைய பிரதமர் இந்திரா காந்தி பதவி நீக்கம் செய்யப்பட்டார். பின்னர் மொரார்ஜி தேசாய் அரசில் 1977 முதல் 1979 வரை சட்ட அமைச்சராக பணியாற்றினார். இந்த நிலையில், சாந்தி பூஷன் உடல்நலக்குறைவால் புதுடெல்லியில் உள்ள அவரது இல்லத்தில் நேற்று காலமானார். அவரது மகன் பிரசாந்த் பூஷன் ஒரு வழக்கறிஞர் மற்றும் சமூக ஆர்வலராக உள்ளார். சாந்தி பூஷனின் மறைவுக்கு தலைவர்கள் பலர் இரங்கல்களை தெரிவித்து வருகின்றனர்.
இந்நிலையில் சாந்தி பூஷனின் மறைவுக்கு பிரதமர் மோடி தனது இரங்கலை தெரிவித்துள்ளார். இது தொடர்பாக அவர் வெளியிட்டுள்ள ட்விட்டர் பதிவில், “சட்டத் துறையில் அவர் ஆற்றிய பங்களிப்பிற்காகவும், தாழ்த்தப்பட்டவர்களுக்காகப் பேசுவதில் உள்ள ஆர்வத்திற்காகவும் ஸ்ரீ சாந்தி பூஷன் ஜி நினைவுகூரப்படுவார். அவரது மறைவு வேதனை அளிக்கிறது. அவரது குடும்பத்தினருக்கு இரங்கல். ஓம் சாந்தி” என்று பதிவிட்டுள்ளார்.