“குஜராத் மாநில சட்டப்பேரவைத் தேர்தலில் பாஜக பெரும்பான்மையுடன் மீண்டும் வெற்றி பெறும் பட்சத்தில், பூபேந்திர படேல் முதலமைச்சராக தொடர்வார்,” என, மத்திய உள்துறை அமைச்சர் அமித் ஷா தெரிவித்து உள்ளார்.
குஜராத் மாநிலத்தில், முதலமைச்சர் பூபேந்திர படேல் தலைமையிலான பாரதிய ஜனதா கட்சியின் ஆட்சி நடைபெற்று வருகிறது. பிரதமர் நரேந்திர மோடியின் சொந்த மாநிலமான இங்கு, கடந்த 24 ஆண்டுகளாக, பாஜக ஆட்சிக் கட்டிலில் உள்ளது. 182 சட்டப்பேரவைத் தொகுதிகளைக் கொண்ட குஜராத் மாநிலத்திற்கு, டிசம்பர் 1 ஆம் தேதி முதல் கட்டத் தேர்தலும், 5 ஆம் தேதி, இரண்டாம் கட்டத் தேர்தலும் நடைபெற உள்ளது. இரண்டு கட்டத் தேர்தலிலும் பதிவாகும் வாக்குகள், டிசம்பர் மாதம் 8 ஆம் தேதி எண்ணப்பட்டு முடிவுகள் அறிவிக்கப்பட உள்ளன.
குஜராத் மாநிலத்தில், மீண்டும் வெற்றி பெற்று ஆட்சியை தக்க வைக்க, ஆளும் பாஜக தீவிரமாக செயல்பட்டு வருகிறது. பிரதமர் நரேந்திர மோடி, மத்திய உள்துறை அமைச்சர் அமித் ஷா ஆகியோரது சொந்த மாநிலம் என்பதால், இங்கு மீண்டும் வெற்றி பெற, பாஜக பல்வேறு வியூகங்களை வகுத்துள்ளது. பிரதான எதிர்க்கட்சியான காங்கிரசும், பாஜகவுக்கு கடும் போட்டி அளிக்க தயாராக உள்ளது. டெல்லி முதலமைச்சர் அரவிந்த் கெஜ்ரிவாலின் ஆம் ஆத்மி கட்சியும், பாஜகவும் டஃப் கொடுக்கும் என கூறப்படுகிறது.
இந்நிலையில், தனியார் ஆங்கில செய்தி நிறுவனம் ஒன்றிற்கு பாஜக மூத்தத் தலைவரும், மத்திய உள்துறை அமைச்சருமான அமித் ஷா கூறுகையில், “குஜராத் மாநில சட்டப்பேரவைத் தேர்தலில் பாஜக பெரும்பான்மையுடன் மீண்டும் வெற்றி பெறும் பட்சத்தில், பூபேந்திர படேல் முதலமைச்சராக தொடர்வார்,” என, தெரிவித்து உள்ளார்.
குஜராத் மாநில முதலமைச்சராக இருந்த, விஜய் ரூபானி மீது, அக்கட்சி எம்எல்ஏக்கள் மற்றும் அமைச்சர்களுக்கு அதிருப்தி ஏற்பட்டதன் காரணமாகவும், மக்களுக்கு அதிருப்தி நிலவியதன் காரணமாகவும், 2021 ஆம் ஆண்டு செப்டம்பர் மாதம், அவர் முதலமைச்சர் பதவியை ராஜினாமா செய்தார். இதைத் தொடர்ந்து குஜராத் மாநில முதலமைச்சராக பூபேந்திரபாய் படேல் பதவி ஏற்றுக் கொண்டார் என்பது குறிப்பிடத்தக்கது.