குடியரசுத் தலைவர் மாளிகைத் தோட்டங்கள் ‘முகல்’ (முகலாய) தோட்டங்கள் என்று அழைக்கப்பட்டு வந்தன. இந்திய சுதந்திரத்தின் 75ஆவது ஆண்டு விழாவை அமிர்தப் பெருவிழாவாக கொண்டாடி வருவதையொட்டி, குடியரசுத் தலைவர் மாளிகைத் தோட்டங்களுக்கு ‘அம்ரித் உத்யன்’ என்று பொதுவான பெயர் சூட்டப்பட்டுள்ளதாக மத்திய அரசு அறிவித்துள்ளது.
இதற்கு பலரும் கண்டனம் தெரிவித்து வருகின்றனர். அந்த வகையில், முகலாயர் தோட்டம் பெயர் மாற்றம் செய்யப்பட்ட விவகாரத்தை சு.வெங்கடேசன் எம்.பி., விமர்சித்துள்ளார்.
இதுகுறித்து அவர் தனது ட்விட்டர் பக்கத்தில், “நேற்றைய தினம் குடியரசுத் தலைவர் மாளிகையில் இருக்கும் மொகல் கார்டன் (முகலாயர் தோட்டம்) பெயர் “அம்ருத் உத்யான்” என மாற்றப்பட்டுள்ளது. நாளைய தினம் குடியரசு தலைவர் நிகழ்த்தப்போகும் உரையில் “ரோஜா” வின் பெயரை மாற்றும் செய்தி இடம்பெறலாம். நேற்றின் தொடர்ச்சிதான் நாளை.” என பதிவிட்டுள்ளார்.
குடியரசுத் தலைவர் மாளிகை வளாகத்தில் பல்வேறு தோட்டங்கள் உள்ளன. கிழக்குப் புல்வெளி, மத்திய புல்வெளி, நீண்ட தோட்டம் மற்றும் வட்ட தோட்டம் ஆகியவை ஏற்கெனவே இருந்தன. முன்னாள் குடியரசுத் தலைவர்கள் ஏ.பி.ஜே. அப்துல் கலாம் மற்றும் ராம்நாத் கோவிந்த் பதவிக் காலங்களில், மூலிகை-I, மூலிகை-II, தொட்டுணரக்கூடிய தோட்டம், போன்சாய் தோட்டம் மற்றும் ஆரோக்கிய வனம் என பல தோட்டங்கள் உருவாக்கப்பட்டன.
இந்த நிலையில், சுதந்திரத்தின் 75ஆவது ஆண்டு விழாவை அமிர்தப் பெருவிழா என கொண்டாடும் போது, குடியரசுத் தலைவர் மாளிகைத் தோட்டங்களுக்கு ‘அம்ரித் உத்யன்’ என்று பொதுவான பெயர் சூட்டப்பட்டது. அதற்கு பலரும் எதிர்ப்பு தெரிவித்து வருகின்றனர் என்பது குறிப்பிடத்தக்கது.
முன்னதாக, குடியரசுத் தலைவர் மாளிகை தோட்டங்கள் ஜனவரி 31ஆம் தேதி முதல் பொது மக்களின் பார்வைக்காக அனுமதிக்கப்படும். இந்தத் தோட்டங்கள் வருகிற மார்ச் 26 ஆம் தேதி வரை திறந்திருக்கும் என தெரிவிக்கப்பட்டுள்ளது. அதன் தொடர்ச்சியாக, மார்ச் 28 முதல் 31ஆம் தேதி வரை சிறப்புப் பிரிவினருக்குத் தோட்டங்கள் திறந்திருக்கும் எனவும் தெரிவிக்கப்பட்டுள்ளது.
பராமரிப்புப் பணிகள் நடைபெறும் நாட்களான திங்கள் கிழமைகள் மற்றும் ஹோலியை முன்னிட்டு மார்ச் 8 ஆம் தேதி தோட்டங்கள் பொதுமக்கள் பார்வைக்கு அனுமதிக்கப்படமாட்டாது எனவும் தெரிவிக்கப்பட்டுள்ளது.