சிவமொக்கா-
சிவமொக்கா (மாவட்டம்) தாலுகா தாளகொப்பா நகரில் உள்ள கணினி மையங்களில் அனுமதி இன்றி ரெயில் டிக்கெட் விற்பனை செய்வதாக சிவமொக்கா ரெயில்வே போலீசாருக்கு ரகசிய தகவல் கிடைத்தது.
அதன்பேரில் ரெயில்வே போலீசார் தாளகொப்பா நகருக்கு சென்று சோதனை செய்தனர். 3 கணினி மையங்களில் அனுமதி இன்றி ரெயில் டிக்கெட் விற்பனை செய்வது கண்டுபிடிக்கப்பட்டது. இதுதொடர்பாக கணினி மையங்களின் உரிமையாளர்களான கணேஷ் (வயது 31), ரேவண்ணா (36), பிரசாந்த் (46) ஆகிய 3 பேரை ரெயில்வே போலீசார் கைது செய்தனர்.
அவர்களிடம் இருந்து ரூ.2½ லட்சம் மதிப்பிலான ரெயில் டிக்கெட்டுகள், கணினிகள், பிரிண்டர், செல்போன்கள் ஆகியவற்றை பறிமுதல் செய்தனர்.
விசாரணையில், ரெயில் டிக்கெட் வழங்குவதற்கு கணினி மையங்கள் ரெயில்வே நிர்வாகத்தினர் அனுமதி பெற வேண்டும். ஆனால் கைதான 3 பேரும் அனுமதி பெறாமல் டிக்கெட் விற்பனை செய்து வந்துள்ளனர்.
மேலும் அவர்கள் ரெயில்வேயிக்கு செலுத்த கூடிய தொகையை செலுத்தாமல், கூடுதல் விலைக்கு ரெயில் டிக்கெட்டுகளை விற்பனை செய்ததும் தெரியவந்தது. இதுகுறித்து சிவமொக்கா ரெயில்வே போலீசார் வழக்குப்பதிவு செய்து விசாரணை நடத்தி வருகிறார்கள்.