கோவை மாவட்டம், சூலூர் தொகுதியில் அ.தி.மு.க செயல்வீரர்கள் கூட்டம் நடந்தது. இதில் முன்னாள் அமைச்சர் எஸ்.பி.வேலுமணி கலந்துகொண்டார். அப்போது பேசிய அவர், “சிங்கை ராமச்சந்திரன் ரூ.15 லட்சம் ரூபாய் சம்பளத்தை விட்டு மக்களுக்கு சேவையாற்ற அரசியலுக்கு வந்துள்ளார். கடந்த 5 ஆண்டுகளில் தி.மு.க கூட்டணி கட்சி எம்.பி-யை கோவை நாடாளுமன்ற தொகுதியில் எங்கும் பார்க்க முடியவில்லை.
சிங்கை ராமச்சந்திரன் வெற்றி பெற்றால் தொகுதி மக்களின் குரலாக நாடாளுமன்றத்தில் எதிரொலிப்பார். சிங்கை ராமச்சந்திரனுக்கு நிகரான வேட்பாளர் கோவை நாடாளுமன்ற தொகுதியில் யாரும் கிடையாது.
அ.தி.மு.க-வுக்கு துரோகம் செய்து விட்டு ஓடிப்போன நபர் தி.மு.க-வில் வேட்பாளராக நிறுத்தப்பட்டுள்ளார். வெறும் 4% ஓட்டுகளை மட்டுமே வைத்துக் கொண்டு அண்ணாமலை ட்விட்டர் மற்றும் ஃபேஸ்புக்கில் அரசியல் செய்து கொண்டிருக்கிறார். களத்தில் இல்லாத அண்ணாமலை அ.தி.மு.க-வுக்கு போட்டியில்லை.
அதனால் அவர் குறித்து பேச வேண்டிய அவசியம் இல்லை. அ.தி.மு.க-வுடன் போட்டியிட முதலில் அனைத்து பூத்களிலும் பா.ஜ.க ஏஜென்ட்களை நியமிக்க வேண்டும். கோவையில் சிங்கை ராமச்சந்திரன் 3 லட்சம் வாக்குகள் வித்தியாசத்தில் வெற்றி பெறுவார்.” என்றார்.
கோவை அ.தி.மு.க வேட்பாளர் சிங்கை ராமச்சந்திரன் பேசும்போது, “அ.தி.மு.க-வில் மேயர் உள்ளிட்ட பல்வேறு பொறுப்புகளில் இருந்துவிட்டு, எதிரிகளுடன் கைகோர்த்த துரோகியை கோவை மண்ணில் வெற்றி பெற செய்யவிடக் கூடாது.
மேலும் அ.தி.மு.க-வைப் பயன்படுத்தி 4 சட்டமன்றத் தொகுதிகளில் வென்றுவிட்டு, அ.தி.மு.க-வின் முன்னணி தலைவர்களை விமர்சித்து முதுகில் குத்திய அண்ணாமலையையும் வெற்றி பெறவிடக் கூடாது.” என்றார்.