பிரிட்டனை
யூனிஸ் புயல்
தாக்கியதையடுத்து, சிவப்பு எச்சரிக்கை விடுக்கப்பட்டுள்ளது. பொதுமக்கள் வீடுகளை விட்டு வெளியேற வேண்டாம் என்றும், பயண திட்டங்களை ரத்து செய்யுமாறும் அந்நாட்டு அரசாங்கம் கேட்டுக் கொண்டுள்ளது.
பிரிட்டனில் கடந்த 30 ஆண்டுகளில் இல்லாத அளவுக்கு யூனிஸ் புயல் வீசி வருவதாக அந்நாட்டு வானிலை ஆய்வு மையம் தெரிவித்துள்ளது. பிரிட்டனின் வைட் தீவை மணிக்கு 122 மைல் வேகத்தில் யூனிஸ் புயல் தாக்கியுள்ளதாக வானிலை ஆய்வு மையம் தெரிவித்துள்ளது. வானிலை மிகவும் மோசமாக உள்ள நிலையில் 10 கடுமையான வெள்ள அபாய எச்சரிக்கைகளை சுற்றுச்சூழல் அமைப்பு வெளியிட்டுள்ளது. அதேசமயம், மீட்பு பணிகளுக்கு ராணுவம் தயார் நிலையில் வைக்கப்பட்டுள்ளதாக அங்கிருந்து வரும் தகவல்கள் தெரிவிக்கின்றன.
யூனிஸ் புயல் காரணமாக கடுமையான காற்று வீசுவதுடன், புழுதி மற்றும் பல்வேறு கழிவுப்பொருட்கள் காற்றில் பறப்பதோடு, கடல் பெரும் சீற்றத்துடன் காணப்படுகிறது. மரங்கள் வேரோடு சாய்ந்து விழும் காட்சிகள் பதைபதைக்க வைக்கும் வகையில் உள்ளது. புயல் தாக்கியதையடுத்து பிரிட்டனின் பல்வேறு இடங்களிலும் மின் துண்டிப்பு செய்யப்பட்டுள்ளது. நாடு முழுவதும் ஆயிரக்கணக்கான வீடுகளில் மின்சாரம் துண்டிக்கப்பட்டுள்ளது. பள்ளிகள், வணிக வளாகங்கள் மூடப்பட்டுள்ளன. பேருந்து மற்றும் ரயில் சேவைகள், விமானங்கள் மற்றும் படகுப் பயணங்கள் தற்காலிகமாக நிறுத்தப்பட்டுள்ளன.
முன்னதாக, பிரிட்டனை தாக்கியுள்ள யூனிஸ் புயல் காரணமாக வீசிய அதிவேக காற்றுக்கு இடையே, உலகின் மிகப்பெரிய விமான நிலையங்களில் ஒன்றான லண்டனின் ஹீத்ரோ விமான நிலையத்தில் பிரிட்டிஷ் ஏர்வேஸ் முதல் எமிரேட்ஸ் வரை பல விமானங்கள் அதன் விமானிகளால் தரையிறக்கப்பட்டுள்ளது.
இதனை
பிக் ஜெட் டிவி
எனும் யூடியூப் சேனல் லைவ்ஸ்ட்ரீமில் ஒளிபரப்பியுள்ளது. பிக் ஜெட் டிவி தொகுப்பாளர் ஜெர்ரி டயர் இந்த காட்சிகளை படம் பிடித்துள்ளார். சுமார் 8 மணி நேரம் காட்சிப்படுத்தப்பட்ட அந்த லைவ்ஸ்ட்ரீமை 6.6 மில்லியனுக்கும் அதிகமானவர்கள் பார்த்துள்ளனர்.
ரஷ்யா – உக்ரைன் போர் மூண்டால்… – ஐ.நா., கடும் எச்சரிக்கை!
அதிவேக சூறாவளிக் காற்றுக்கு மத்தியில் விமானங்கள் அங்குமிங்கும் ஆடியாடி தரையிறங்கியது குறித்தும், விமானிகளின் திடீர் ஸ்வூப்கள் முதல் அவர்கள் திறமையாக தரையிறக்கியது வரை அனைத்தையும் பகுப்பாய்வு செய்த தொகுப்பாளரின் வேகமான வர்ணனை பார்வையாளர்களை ஆர்வமுடன் அதனை பார்க்க செய்ததாக கூறப்படுகிறது.