சுசீந்திரன் இயக்கத்தில் 5 மொழி படத்தில் விஜய் ஆண்டனி
வெண்ணிலா கபடிகுழு, பாண்டியநாடு, நான் மகான் அல்ல, அழகர்சாமியின் குதிரை என கவனிக்க வைத்த படங்களை இயக்கிய சுசீந்திரன் சமீபகாலமாக அடுத்தடுத்து படங்களை எடுத்து வெளியிட்டு வருகிறார். ஆனால் அந்த படங்கள் பெரிதாக கவனம் பெறவில்லை. ஈஸ்வரன், வீரபாண்டிபுரம் சமீபத்தில் வெளிவந்த குற்றம் குற்றமே படங்கள் அதற்கு உதாரணங்கள்.
இந்த நிலையில் அவர் அடுத்து இயக்கும் படம் வள்ளிமயில். இந்த படத்தில் விஜய் ஆண்டனி, ஜதிரத்னலு தெலுங்கு படத்தில் நடித்த பிரியா அப்துல்லா ஹீரோ, ஹீரோயின்களாக நடிக்கிறார்கள். இவர்களுடன் பாரதிராஜா, சத்யராஜ், சுனில், தம்பி ராமய்யா, சிங்கம்புலி, ரெடின் கிங்ஸ்லி உள்பட பலர் நடிக்கிறார்கள்.
தமிழ், தெலுங்கு, மலையாளம், கன்னடம், இந்தி உள்ளிட்ட 5 மொழிகளில் தயாராகிறது. 1980களில் நடக்கிற மாதிரியான கதை. முதல்கட்ட படப்பிடிப்புகள் திண்டுக்கல்லில் தொடங்குகிறது. இது ஓடிடிக்கான படம் என்ற தகவலும் வெளியாகி உள்ளது.