VLC Media player தெரியாத 90’s கிட்ஸ் இருக்கமுடியாது. ஒரு காலத்தில் சிஸ்டெமில் படம் பார்க்க வேண்டுமென்றால் VLC Media player தான் நமக்கு மினி தியேட்டர் அனுபவத்தை தரும். ஆனால் இனி 90’s கிட்ஸின் ஒரு ஆதாரமாக இருந்த VLC Media player இந்தியாவில் தடை செய்யப்பட்டதாக சமீபத்தில் தெரிய வந்துள்ளது..
இந்த ஆண்டு மார்ச் மாதத்திலிருந்து VLC Media playerஇன் அதிகாரபூர்வ இணையதளம் இந்தியாவில் தடை செய்யப்பட்டுள்ளதாக அறிவிக்கப்பட்டுள்ளது. இருப்பினும் VLC Media player-ஐ ஏற்கனவே இதை தங்களுடைய மொபைல் அல்லது PCயில் வைத்துள்ளவர்களுக்கு அது இன்னும் செயல்பட்டு வருவதாக கூறப்படுகிறது.
இது குறித்து IFF-(Internet Freedom Foundation) என்ற அமைப்பு தகவல் அறியும் உரிமை(RTI) சட்டத்தின் கீழ் பெட்டிஷன் ஒன்றை ஜூன் மாதத்தில் டெலிகாம் துறைக்கு அனுப்பியது. அந்த பெட்டிஷனை DOT தகவல் மற்றும் தொழில்நுட்ப அமைச்சகத்துக்கு மாற்றி விட்டதின் பேரில் கடந்த ஜூலை மாதம் தங்களிடம் தகவல் இல்லை என்று பதில் அனுப்பியுள்ளது அந்த துறை.
இந்நிலையில் IFF அமைப்பு தங்களுடைய அதிகாரபூர்வ ட்விட்டர் பக்கத்தில் இது குறித்து காட்டமாக பதிவு ஒன்றை பகிர்ந்துள்ளது. அந்த பதிவில், videolan[dot]org எந்த வித முன்னறிவிப்பும் இன்றி தடை செய்யப்பட்டுள்ளது. இது குறித்து கேட்டால் எந்த தகவலும் இல்லை என்று சொல்கிறார்கள் என்று பகிர்ந்திருந்தனர். மேலும் இது குறித்து அவர்கள் மேல்முறையீடும் செய்துள்ளனர்.
இது குறித்து VLC Media playerஇன் அதிகாரபூர்வ ட்விட்டர் பக்கத்திலும் பதிவுகள் இடப்பட்டுள்ளன. ஏன் தங்களின் இணையதளம் முடக்கப்பட்டுள்ளதாக தங்களுக்கு எந்த அறிவிப்பும் கிடைக்கவில்லை என்றும் அவர்கள் தரப்பில் இருந்து கூறப்பட்டுள்ளது.
தற்போதைக்கு அதன் இணையதளம் முடக்கப்பட்டிருந்தாலும் VLC Media player செயலியை google play store போன்றவற்றில் டவுன்லோட் செய்து பயன்படுத்தி கொள்ளலாம்.
– சுபாஷ் சந்திர போஸ்