தமிழ்நாடு ஆளுநராக பதவியேற்ற நாள் முதல் தினந்தோறும் சர்ச்சைக்குரிய கருத்துக்களை ஆர்.என்.ரவி கூறி வருவதாக திமுகவும் அதன் கூட்டணி கட்சிகளும் குற்றம் சாட்டி வருகின்றனர். மேலும், சனாதனம், ஆரியம், திராவிடம், பட்டியலின மக்கள், திருக்குறள் குறித்து ஆளுநர் கூறும் கருத்துக்கள் அபத்தமானவையாகவும், ஆபத்தானவையாகவும் இருப்பதாக குற்றசாட்டு முன் வைக்கப்படுகிறது. இந்த நிலையில், தமிழ்நாட்டை தமிழகம் என்று சொல்வதுதான் சரி என கூறி கொளுத்திப்போட்டது சட்டசபை வரைக்கும் பற்றி எரிகிறது.
தமிழ்நாடு சட்டசபை கூட்டத்தொடர் இன்று ஆளுநர் ஆர்.என்.ரவி உரையுடன் தொடங்கியது. திமுக அரசுக்கும் ஆளுநருக்கும் நீண்டநாட்களாக இருந்து வரும் பஞ்சாயத்துக்கு மத்தியில் இக்கூட்டத்தொடர் பெருத்த எதிர்பார்ப்பாக இருந்தது. ‘தமிழ்நாடு வாழ்க’, ‘எங்கள் நாடு தமிழ்நாடு’ என முழுக்கமிட்டு ஆளுநருக்கு கடும் எதிர்ப்பு தெரிவித்து சட்டப்பேரவையில் உறுப்பினர்கள் கோஷமிட்டனர். உறைய வாசித்த ஆளுநர், “தமிழகம்” என்று குறிப்பிடாமல் “தமிழ்நாடு” என்று குறிப்பிட்டு பேசினார்.
ஆனால், சமூகநீதி, சுயமரியாதை, திராவிட மாடல் என்ற வார்த்தைகள் இருந்ததால் உரையின் 65வது பக்கத்தை வாசிக்காமல் கடந்தார் ஆளுநர். அடுத்ததாக, தமிழ்நாடு சட்டம் ஒழுங்கை சிறப்பாக கையாள்கிறது, அமைதி பூங்காவாக திகழ்கிறது என்பதையும் வாசிக்காமல் கடந்தார். மேலும், 47 ஆவது பத்தியல் குறிப்பிட்டிருந்த பெரியார், அம்பேத்கர், காமராசர் , அண்ணா, கலைஞர் ஆகிய தலைவர்களின் பெயர்களையும் வாசிக்காமல் கடந்துவிட்டார்.
இந்நிலையில், அரசு தயாரித்த ஆளுநர் உரையில் தானாக சில விஷயங்களை தவிர்த்தும் சேர்த்தும் தமிழ்நாடு ஆளுநர் ஆர். என். ரவி தமிழ்நாடு சட்டமன்றத்தில் உரையாற்றிய நிலையில் உரையில் இல்லாத வார்த்தைகளை அவை குறிப்பில் இருந்து நீக்க முதல்வர் ஸ்டாலின் ஆளுநருக்கு முன்பாகவே தீர்மானம் கொண்டு வந்தார். அந்த தீர்மானம் நிறைவேறியது.
அப்போது, சில விமர்சனங்களை முதல்வர் ஸ்டாலின் முன் வைத்தபோது ஆளுநர் ரவி அவையில் இருந்து வெளியேறினார். முறைப்படி தேசிய கீதம் ஒலித்து சட்டசபை கூட்டம் முடிவதற்கு முன்பே ஒரு ஆளுநர் வெளியேறியது தமிழத்தில் இதுவே முதன்முறை. தமிழ்நாடு அரசியல் வரலாற்றில் எதிர்க்கட்சிகளைப் போல் அவையில் இருந்து வெளிநடப்பு செய்த முதல் ஆளுநர் ரவிதான் என்றும் ட்விட்டரில் விமர்சித்து வருகின்றனர்.