விருதுநகர் மாவட்டம் ராஜபாளையம் அருகே, ரூ.15,000 கடனை திருப்பித்தராததால் ஆத்திரமடைந்த நபர் தன் நண்பர்களுடன் சேர்ந்து பிரபல ரெளடியை காரில் கடத்தி கொலை செய்த சம்பவம் பரபரப்பை ஏற்படுத்தியுள்ளது. இதுகுறித்து போலீஸ் தரப்பில் தெரிவிக்கையில், “விருதுநகர் மாவட்டம் ராஜபாளையம் அருகே சுந்தரராஜபுரத்தை சேர்ந்தவர் ஆனந்தகுமார். பிரபல ரெளடியான இவர் மீது விருதுநகர் மாவட்ட காவல் நிலையங்களில் பல்வேறு வழக்குகள் பதிவு செய்யப்பட்டுள்ளது. இவரின் நண்பர், சேத்தூர் பாரதி நகரை சேர்ந்த மருதுபாண்டி.
இந்நிலையில், மருதுபாண்டியிடம் கடந்த ஒரு மாதத்திற்கு முன்பாக ஆனந்தகுமார் ரூ.15 ஆயிரம் கடன் வாங்கியதாக கூறப்படுகிறது. ஒருவாரத்தில் வாங்கியக் கடனை திருப்பித்தருவதாக கூறிய நிலையில், ஒருமாதம் கடந்தும் மருதுபாண்டியிடம் வாங்கிய கடனை திருப்பிக் கொடுக்காமல் ஆனந்தகுமார் ஏமாற்றி வந்துள்ளார். இதனால் ஆத்திரம் அடைந்த மருதுபாண்டி கடனை திருப்பித் தரவில்லை எனில் கொன்றுவிடுவதாக மிரட்டியுள்ளார். ஆனால் இந்த மிரட்டலை பெரிதாக கண்டுக்கொள்ளாத ஆனந்தகுமார், வழக்கம்போல் தனது வேலைகளை கவனித்து வந்துள்ளார். இந்தநிலையில், ஆனந்தக்குமாரை செல்போனில் தொடர்புக்கொண்ட மருதுபாண்டி அவரிடம் நைசாக பேசி மெயின்ரோட்டுக்கு வரவழைத்துள்ளார்.
அந்நேரம், எதிர்பாராத திருப்பமாக காரில் தன்னுடைய 4 நண்பர்களுடன் வந்த மருதுபாண்டி, ஆனந்தக்குமாரை வளைத்து காருக்குள் இழுத்துப்போட்டு கடத்தி சென்றுள்ளார். இந்த தகவலையறிந்த ஆனந்தகுமாரின் தந்தை ஆனந்தராஜ், சேத்தூர் ஊரக காவல் நிலையத்தில் புகார் அளித்தார். அதன்பேரில் போலீஸ் வழக்கு பதிவு செய்து கடத்தப்பட்ட ஆனந்தக்குமாரை தேடிவந்தனர். இந்நிலையில், சேத்தூரில் அருகே உள்ள செங்கல் சூளையில் ஆண் ஒருவர் பல இடங்களில் கத்தியால் குத்தப்பட்ட நிலையில் இறந்துகிடப்பதாக சேத்தூர் போலீஸூக்கு தகவல் கிடைத்தது. அதன்பேரில் அங்குச்சென்ற போலீஸார், இறந்துக்கிடத்த நபர் குறித்து விசாரணை நடத்தியதில் அவர், கடத்திச் செல்லப்பட்ட ஆனந்தக்குமார் என்பது தெரியவந்தது. இதைத்தொடர்ந்து அவரின் உடல் மீட்கப்பட்டு உடற்கூராய்வுக்காக அரசு மருத்துவமனைக்கு அனுப்பி வைக்கப்பட்டது. மேலும் இந்தச்சம்பவம் குறித்து சேத்தூர் காவல் துறையினர் வழக்கு பதிவு செய்து மருதுபாண்டி மற்றும் அவரின் நண்பர்கள் 4 பேரை தேடி வருகின்றனர்” என்றனர்.