கர்நாடக மாநிலத்தில் வரும் ஏப்ரல் – மே மாதம் சட்டமன்ற தேர்தல் நடக்கவுள்ளது. இதுதொடர்பான அறிவிப்பு மார்ச் மாதம் வெளியாகும் என எதிர்பார்க்கப்படுகிறது. கர்நாடக சட்டமன்றத்தில் மொத்தம் 224 சீட்கள் இருக்கின்றன. இதில் 113 இடங்களில் வெல்லும் கட்சியே ஆட்சியை பிடிக்க முடியும். தேர்தல் களத்தை பொறுத்தவரை
காங்கிரஸ்
, பாஜக, மதச்சார்பற்ற ஜனதா தளம் என மும்முனை போட்டியாக அமைந்துள்ளது.
கருத்துக்கணிப்பு முடிவுகள்
இதில் தேர்தலுக்கு பிந்தைய கூட்டணி கணக்குகளும் இருக்கின்றன. இந்நிலையில் கர்நாடக சட்டமன்ற தேர்தலில் யாருக்கு வெற்றி? என பல்வேறு ஏஜென்சிகள் சார்பில் கருத்துக்கணிப்புகள் நடத்தப்பட்டு வருகின்றன. அந்த வகையில் டெல்லியை சேர்ந்த மூத்த பத்திரிகையாளர் ஒருவர் நடத்திய கருத்துக்கணிப்பின் முடிவுகள் தற்போது வெளியாகியுள்ளன. அதில், பாஜக 60 முதல் 80 தொகுதிகள் வரை வெற்றி பெறக்கூடும்.
காங்கிரஸ் கட்சிக்கு பெரும்பான்மை
காங்கிரஸ் 80 முதல் 90 தொகுதிகளில் வெல்ல வாய்ப்புள்ளது. மதச்சார்பற்ற ஜனதா தளம் 25 இடங்களில் வெல்லக்கூடும். அதேசமயம் காங்கிரஸ் கட்சி 120 இடங்களை கூட தாண்டலாம். ஆனால் பாஜகவிற்கு மட்டும் தனிப் பெரும்பான்மை கிடைக்காது எனக் குறிப்பிட்டுள்ளார். இதன்மூலம் காங்கிரஸ் ஆட்சியை கைப்பற்றும் என எதிர்பார்க்கப்படுகிறது. பாஜகவை பொறுத்தவரை தனிப் பெரும்பான்மை என்பது எட்டாக் கனியாகவே காணப்படுகிறது.
பாஜக உள்குத்து அரசியல்
2008ஆம் ஆண்டு 110 இடங்களிலும், 2018ஆம் ஆண்டு 104 இடங்களிலும் வென்றது. ஆனால் காங்கிரஸ், மதச்சார்பற்ற ஜனதா தளம் ஆகிய கட்சிகளிடம் இருந்து எம்.எல்.ஏக்களை கபளீகரம் செய்து ஆட்சிக் கட்டிலில் அமர்ந்தது. இதனால் மாற்று கட்சிகளில் இருந்து பாஜக முகாமிற்குள் படையெடுக்கும் நபர்களின் எண்ணிக்கை தொடர்ந்து அதிகரித்து வருகிறது. இவர்கள் ஒரு கோஷ்டியாகவே மாறிவிட்டனர்.
உட்கட்சி பூசல்
தற்போது பாஜகவிற்காக தொடக்கம் முதலே செயல்பட்டு வரும் மூத்த தலைவர்கள் மற்றும் புதிய கோஷ்டிகளுக்கு இடையில் உட்கட்சி பூசல் நிலவி வருவதாக சொல்லப்படுகிறது. இதுதவிர முதல்வர் பசவராஜ் பொம்மை தலைமையிலான பாஜக ஆட்சியில் அரசு டெண்டர்களில் ஊழல், ஹிஜாப் சர்ச்சை, மதமாற்ற தடைச் சட்டம், பெங்களூரு நகர உள்கட்டமைப்பு வசதிகளில் குளறுபடிகள் என சச்சரவுகள் நீண்டு கொண்டே வந்துள்ளன.
டெல்லிக்கு வந்த சிக்கல்
இந்த விஷயங்கள் அனைத்தும் பாஜக தேசிய தலைமைக்கும் பெரிய சிக்கலாக மாறியுள்ளது. இது தேர்தலுக்கு முந்தைய கருத்துக்கணிப்பு முடிவுகளிலும் எதிரொலித்து வருவதாக தகவல்கள் தெரிவிக்கின்றன. மற்றொரு கருத்துக்கணிப்பில் பாஜகவிற்கு 65 முதல் 75 இடங்களே கிடைக்கும் எனக் கூறப்பட்டுள்ளது.
இதனால் உஷாரான பாஜக தலைமை கடைசி நேர ட்விஸ்ட்களுக்கு தயாராகி கொண்டிருக்கிறது. அது தேர்தல் அறிக்கையில் எதிரொலிக்குமா? இல்லை காங்கிரஸ் கட்சிக்கு எதிரான அஸ்திரமாக இருக்குமா? என்பதை பொறுத்திருந்து பாருங்கள் என கர்நாடக அரசியல் பார்வையாளர்கள் தெரிவித்துள்ளனர்.