தொலைக்காட்சி, யூடியூப் போல தியேட்டர்களிலும் விளம்பரங்கள் அதிகரித்துவிட்டன.
திரையரங்குகளில் படம் போடுவதற்கு முன்பும், இடைவேளை சமயத்திலும் முன்பெல்லாம் ஒரு சில விளம்பரங்கள், அடுத்தப் படத்திற்கான டிரெய்லர்கள்தான் திரையரங்குகளில் போடப்படும். ஆனால், இப்போது விளம்பரங்களே அதிகமாகப் போடப்படுகின்றன. இதனால் சில திரையரங்குகளில் படம் குறித்த நேரத்துக்கு ஆரம்பமாகாமல் 20, 30 நிமிடங்கள் வரை தாமதமாகத் தொடங்குகின்றன.
இந்நிலையில் இந்த விளம்பரங்களைக் குறைப்பதன் மூலம் நேரத்தை மிச்சம் பிடித்து இன்னொரு காட்சியைத் திரையிட முடிவு செய்திருக்கிறது ‘பிவிஆர் ஐநாக்ஸ்’. இதுவரை 35 நிமிடமாக இருக்கும் விளம்பர நேரத்தை 10 நிமிடங்களாகக் குறைக்கவுள்ளதாக கூறியுள்ளது.
இது குறித்து கூறும் ‘பிவிஆர் ஐநாக்ஸ் லிமிடெட்’டின் தலைமை அதிகாரிகளுள் ஒருவரான ரெனாட் பாலியர், “35 நிமிடமாக இருக்கும் விளம்பர நேரத்தை 10 நிமிடங்களாகக் குறைக்கவுள்ளோம். இந்த நேரத்தை மிச்சம் செய்து இன்னொரு காட்சியைத் திரையிடலாம் என்று முடிவு செய்துள்ளோம்.
குறிப்பாக விளம்பர நேரங்களில் நாங்கள் திரையிடப் போகும் அடுத்தப் படத்திற்கான டிரெய்லரை மட்டுமே போடவுள்ளோம். இதன் மூலம் மற்ற படங்கள் இங்கு திரையிடப்படுவதைப் பார்வையாளர்களுக்குத் தெரியப்படுத்தி, பார்வையாளர்கள் திரையரங்குக்கு வருவதை அதிகரிக்கலாம். இப்படி விளம்பரத்தைக் குறைப்பது எந்த வகையிலும் நஷ்டத்தை ஏற்படுத்தாது. அந்த நேரத்தைப் பயன்படுத்தி இன்னொரு காட்சியை அதிகப்படுத்துவதன் மூலம் நல்ல வருமானத்தைப் பெறலாம்.
இதன் மூலம் இடைவேளை நேரத்தை அதிகப்படுத்தி அதில் விற்கப்படும் உணவுப் பொருள்களின் வருமானத்தையும் அதிகப்படுத்தலாம். விளம்பரங்களில் இருந்து வரும் வருமானத்தை இப்படிச் சரிக்கட்டிக் கொள்ளலாம். இவ்வாறு விளம்பரங்களைக் குறைப்பதன் மூலம் பார்வையாளர்களுக்கு இடையூறுயில்லாமல் படம் பார்ப்பதற்கு நல்ல திரை அனுபவத்தைக் கொடுக்கலாம். இதன் மூலம் திரையரங்கிற்கு வருபவர்களையும் அதிகரிக்க முடியும்” என்று கூறியுள்ளார்.
இது சரியான முடிவுதானா? இதன் மூலம் மக்களின் வருகை அதிகரிக்குமா? கமென்ட்டில் சொல்லுங்கள்.