நடிகர் விஷால், ஹரி இயக்கத்தில் உருவாகியுள்ள திரைப்படம் `ரத்னம்’.
இப்படத்தில் பிரியா பவானி ஷங்கர், யோகி பாபு, சமுத்திரக்கனி, கௌதம் மேனன் உள்ளிட்ட பலர் நடித்து உள்ளனர். கார்த்திக் சுப்புராஜின் ‘ஸ்டோன் பென்ச் பிலீம்ஸ்’ நிறுவனம் இப்படத்தைத் தயாரித்துள்ளது. தேவி ஸ்ரீ பிரசாத் இசையமைத்துள்ளார். இத்திரைப்படம் நாளை (ஏப்ரல் 26ம் தேதி) திரையரங்குகளில் வெளியாகவுள்ளது. இந்நிலையில் திருச்சி, தஞ்சாவூர் ஏரியாவில் ‘ரத்னம்’ படத்தை வெளியிட விடாமல் கட்டப் பஞ்சாயத்து செய்வதாக நடிகர் விஷால் திடீர் குற்றச்சாட்டை முன்வைத்துள்ளார்.
இது குறித்துக் கூறும் விஷால், “எங்களுடைய ‘ரத்னம்’ திரைப்படம் நாளை (ஏப்ரல் 26ம் தேதி) திரைக்கு வரவிருக்கிறது. இதற்காக டிக்கெட் புக்கிங் தொடங்கிவிட்டது. இந்தக் கடைசி நேரத்தில் ‘ரத்னம்’ படத்தை வெளியிட விடாமல் சிலர் தடுக்கின்றனர். சம்பந்தம் இல்லாத நபர்கள் திருச்சி, தஞ்சாவூர் ஏரியா திரையரங்க உரிமையாளர் சங்கத்தில் கடிதம் கொடுத்துப் படத்தை வெளியிடவிடாமல் முடக்குகின்றனர். அச்சங்கத்தின் தலைவர் மீனாட்சி மற்றும் செயலாளர் சிதம்பரத்திற்கு நான் தொடர்ந்து தொலைபேசியில் அழைத்துக் கொண்டேயிருக்கிறேன். ஆனால், அவர்கள் என் அழைப்பை ஏற்க மறுக்கின்றனர்.
‘ரத்னம்’ படம் நாளை வெளியாகவிருக்கிறது. படத்திற்கான புக்கிங் தொடங்கிவிட்டது. இந்த நேரத்தில் இப்படி செய்வதன் பெயர் ‘கட்டப் பஞ்சாயத்து’. இன்றைய காலத்தில் ஒரு படம் திரையரங்கிற்கு வருவதே பெரிய விஷயமாக இருக்கிறது. திரையரங்கிற்கு வந்தாலும், அது ஓடுவது மிகப்பெரிய விஷயமாக இருக்கிறது. இப்படிப் பல சிக்கல்கள் இருக்கின்ற இந்த நேரத்தில் படத்தை வெளியிடவிடாமல் கட்டப் பஞ்சாயத்து செய்கின்றனர்.
நான் எத்தனையோ படங்களின் பிரச்னைகளைத் தீர்த்து வைத்திருக்கிறேன், படம் வெளியாக உதவியிருக்கிறேன். இத்தனை ஆண்டுகள் சினிமாவில் இருக்கிறேன். எனக்கே இந்த நிலைமை என்றால், சாதாரணமானவர்கள், சிறியப் படங்களை எடுத்து ரிலீஸ் செய்பவர்களின் நிலைமையை நாம் யோசித்துப் பார்க்க வேண்டும். இது குறித்துச் சம்பந்தப்பட்ட பகுதியின் கலெக்டர் மற்றும் எஸ்.பி.யிடம் புகாரளித்துள்ளேன். இப்பிரச்னையை நான் சும்மா விடப்போவதில்லை” என்று கூறியிருக்கிறார்.