தினகரன்

சென்னை: நன்னிலம் தொகுதி வாஞ்சிநாத சுவாமி கோயிலுக்கு விரைவில் குடமுழுக்கு நடத்தப்படும் என்று பேரவையில் அமைச்சர் சேகர்பாபு அறிவித்துள்ளார். வாஞ்சிநாத சுவாமி கோயிலில் குடமுழுக்கு பணிகள் மந்தமாக நடப்பதாக அதிமுக உறுப்பினர் காமராஜ் கூறினார். ரூ.1.40 கோடியில் 5 பணிகள் நடைபெற்று வருவதாகவும் விரைவில் குடமுழுக்கு நடைபெறும் என்று அமைச்சர் சேகர்பாபு தெரிவித்தார். அவளிவநல்லூர் சட்டநாதர் கோயிலுக்கு குடமுழுக்கு நடத்த அதிமுக உறுப்பினர் காமராஜ் வலியுறுத்தினார்.

நீலகிரி: நீலகிரி மாவட்டம் கோத்தகிரி அருகே ஆய்வுக்குச் சென்ற வருவாய்த்துறையினரை தாக்கிய புகாரில் 2 இளைஞர்கள் கைது செய்யப்பட்டனர். நிலச்சரிவு அபாயம் உள்ளதால் அனுமதியின்றி பொக்லைன் இயந்திரங்களை பயன்படுத்த தடை விதிக்கப்பட்டுள்ளது. தடையை மீறி கோத்தகிரி அருகே பொக்லைன் இயந்திரத்தை கொண்டு பணிகள் மேற்கொள்ளப்பட்டு வந்ததாக புகார் வந்தது. புகாரை அடுத்து நேரில் ஆய்வு செய்யச் சென்ற வருவாய்த்துறையினரை தாக்கிய வேம்புராஜ், தினேஷ் ஆகியோர் கைது செய்யப்பட்டனர்.

சென்னை: திருவள்ளூரில் ஜல் ஜீவன் திட்டம் மூலம் குடிநீர் இல்லாத பகுதிகளுக்கு குடிநீர் வழங்க நடவடிக்கை எடுக்கப்படும் என்று ஊரக வளர்ச்சித்துறை அமைச்சர் ஐ.பெரியசாமி தெரிவித்துள்ளார். மாதவரம் தொகுதி பரத் நகரில் ஆழ்துளை கிணறு, மேல்நிலை நீர்த்தேக்க தொட்டி அமைக்க அரசு முன் வருமா என கேள்வி எழுப்பப்பட்டது. மாதவரம் சட்டமன்ற உறுப்பினர் சுதர்சனம் எழுப்பிய கேள்விக்கு அமைச்சர் பதில் அளித்தார். திருவள்ளூர் மாவட்டத்தில் 1,069 குடிநீர்த் திட்டப்பணிகள் ரூ.58 கோடி மதிப்பீட்டில் செயல்படுத்தப்படுகிறது.

சென்னை: 8 மாவட்டங்களை உருவாக்குவது குறித்து முதலமைச்சரின் கவனத்துக்கு கொண்டு சென்று நடவடிக்கை எடுக்கப்படும் என்று பேரவையில் அமைச்சர் கே.கே.எஸ்.எஸ்.ஆர். ராமச்சந்திரன் தெரிவித்துள்ளார். 8 மாவட்டங்களை புதிதாக உருவாக்க எம்.எல்.ஏ.க்கள், எம்.பி.க்கள் கோரிக்கை வைத்துள்ளார்கள். அதிமுக எம்.எல்.ஏ. சேவூர் ராமச்சந்திரன் கேள்விக்கு அமைச்சர் கே.கே.எஸ்.எஸ்.ஆர். ராமச்சந்திரன் பதில் அளித்தார். ஆரணியை தலைமையிடமாகக் கொண் புதிய மாவட்டம் உருவாக்க வேண்டும் என்ற கோரிக்கைக்கு அமைச்சர் பதில் கூறினார்.