காங்கிரஸ் முன்னாள் தலைவர் சோனியா காந்தி உடல்நலக்குறைவு காரணமாக மருத்துவமனையில் அனுமதிக்கப்பட்டுள்ளார்.
காங்கிரஸ் தலைவராகவும், ஐக்கிய முற்போக்குக் கூட்டணியின் தலைவராகவும் 20 வருடங்களுக்கு மேல் இருந்தவர் சோனியா காந்தி. காங்கிரஸ் தலைவராக 2017ஆம் ஆண்டு ராகுல் காந்தி பொறுப்பேற்ற பிறகு தன்னை கொஞ்சம் கொஞ்சமாக அரசியல் பணிகளில் இருந்து விடுவித்துக்கொண்டார். எனினும், 2019 தேர்தலுக்குப் பிறகு ராகுல் தலைவர் பதவியை ராஜினாமா செய்ததால் மீண்டும் இடைக்காலத் தலைவராக பொறுப்பேற்றார்.
எனினும், இடையிடையே சோனியா காந்திக்கு உடல்நலக் குறைவு ஏற்படுவதால் மருத்துவமனைக்கு சென்று சிகிச்சை பெற்றுவிட்டு வீடு திரும்பி வருகிறார். உடல்நிலை காரணமாக தவிர்க்க முடியாத காரணங்களைத் தவிர வெளியூர் பயணங்களை முற்றிலும் தவிர்த்துவிடுகிறார். சமீபத்தில் ஜம்மு தலைநகர் ஸ்ரீநகருக்கு தனிப்பட்ட பயணமாக சென்றிருந்த அவர், மும்பையில் நடைபெற்ற இந்தியா கூட்டணியின் ஆலோசனைக் கூட்டத்திலும் கலந்துகொண்டார். தற்போது காங்கிரஸ் கட்சியின் நாடாளுமன்ற குழுத் தலைவராகவும், முக்கிய முடிவுகளை எடுக்கும் காரியக் கமிட்டியிலும் இருந்து வருகிறார்.
இந்த நிலையில் சோனியா காந்தி உடல்நலக்குறைவு காரணமாக நேற்று மாலை டெல்லி சர் கங்கா ராம் மருத்துவமனையில் திடீரென அனுமதிக்கப்பட்டார். லேசான காய்ச்சல் காரணமாக மருத்துவமனையில் அனுமதிக்கப்பட்டதாகவும், மருத்துவர்கள் கண்காணிப்பில் அவரது உடல்நிலை சீராக இருப்பதாகவும் தகவல்கள் வெளிவந்தன. ராகுல் காந்தி தனது தாயாரின் உடல்நிலை குறித்து அக்கறையோடு கவனித்து வருகிறார்.
இந்த நிலையில் மருத்துவமனை நிர்வாகம், சோனியா காந்தி சிறிது காலமாக மார்பு தொற்றால் அவதிப்பட்டு வருவதாகவும், அதனால் வழக்கமான மருத்துவ பரிசோதனைக்காகவே மருத்துவமனையில் அனுமதிக்கப்பட்டுள்ளதாக தெரிவித்துள்ளது. சோனியா நலம்பெற நாடு முழுவதும் உள்ள காங்கிரஸ் நிர்வாகிகள் வாழ்த்து தெரிவித்து வருகின்றனர்.
பி.எல்.சந்தோஷ்: என்னது 50 எம்.எல்.ஏக்கள் டீலிங்கா? கொஞ்சம் பாஜகவை பாருங்க… காங்கிரஸ் விட்ட பளார்!
முன்னதாக சோனியா காந்தி சுவாசத் தொற்று காரணமாக கடந்த ஜனவரி மாதம் மருத்துவமனையில் அனுமதிக்கப்பட்டு சிகிச்சை பெற்று வீடு திரும்பினார். அதேபோல கடந்த மார்ச் மாதமும் மருத்துவமனையில் தங்கி சிகிச்சை பெற்றார் என்பது குறிப்பிடத்தக்கது.