போனி கபூர் தயாரிப்பில், அஜய் தேவ்கன், பிரியாமணி நடிப்பில் சமீபத்தில் வெளியாகி பலத்த வரவேற்பைப் பெற்றது ‘மைதான்’ திரைப்படம். 50, 60களில் கால்பந்தாட்டத்தில் கலக்கிய இந்திய அணியையும், அதன் கோச் எஸ்.ஏ. ரஹீமின் வாழ்க்கையைப் பேசியது.
கொரோனாவுக்கு முன்பே தொடங்கிய படப்பிடிப்பு பல தடைகளைத் தாண்டி இப்போது தியேட்டருக்கும் வந்துள்ளது. பலரும் கொண்டாடும் இந்தப் படத்தில் வரும் கால்பந்து அணியில் நம்மூர் ஆட்டக்காரர் ஒருவரும் இடம் பிடித்துள்ளார் என்பதே இங்கு ஹைலைட். ‘ஜோடி நம்பர் ஒன்’ 5ம் சீசனின் டைட்டில் வின்னரும் ‘உங்களில் யார் அடுத்த பிரபுதேவா ஷோவில் பைனலிஸ்டுகளில் ஒருவராக வந்தவருமான ஜெயந்த் தான் அவர். ‘மைதான்’ பட அனுபவம் குறித்து ஜெயந்த்திடம் பேசினோம்.
“டான்ஸ்ல சாதிக்கணும்னுதான் மீடியா பக்கம் வந்தேன். அது என்னுடைய அம்மாவின் ஆசை. விஜய் டிவி ஷோக்கள் மூலம் ஓரளவு கவனமும் சினிமா தொடர்பான ஆட்களின் நட்பும் கிடைச்சது. அந்தத் தொடர்பில் ‘சூப்பர் டீலக்ஸ்’ படத்துல ஒரு கேரக்டர்ல வந்தேன். சினிமா முயற்சிகள், தியேட்டர்னு ஓடிட்டிருந்தப்பதான் ‘மைதான்’ ஆடிஷன் கேள்விப்பட்டுப் போனேன். அங்க தேர்வானது என் அதிர்ஷ்டம்னுதான் சொல்லணும். தேர்வானதுமே ஒரு ஆண்டு கால்பந்துப் பயிற்சி முழுமையா தந்தாங்க. பஞ்சாப், குஜராத்னு பல மாநிலங்களிலிருந்து ஆர்ட்டிஸ்டுகள் வந்திருந்தாங்க. கிட்டத்தட்ட ஒரு காலேஜ் படிக்கிற ஃபீலிங் இருந்தது. ஆனால், படப்பிடிப்பு தொடங்கிய கொஞ்ச நாள்ல கோவிட் லாக்டவுன். ஆனாலும் சளைக்கவே இல்லை எங்க டீம்.
கூட நடிச்ச பலருக்கு கோவிட் தொற்று வர, வீட்டுல பயந்தாங்க. பாலிவுட் வாய்ப்பெல்லாம் ஓகே. ஆனால், உயிரோட இருக்க வேணாமாங்கிறது அவங்க தவிப்பு. ஒருவழியா கோவிட் முடிய, மும்பையில் வரலாறு காணாத வெள்ளம். பிரமாண்டமாகப் போடப்பட்டிருந்த ஃபுட்பால் கிரவுண்ட் ஓவர் நைட்ல சின்னாபின்னமாயிருச்சு. இதுக்கிடையில் நான் உட்பட அணியில் இருந்த பலருக்கும் ஷீட்டிங்கின்போது காயம் வேற.
எல்லாத்தையும் கடந்து இப்ப படம் ரிலீஸாகிடுச்சு. அதோட நல்ல வரவேற்பும் கிடைச்சதுல ரொம்பவே ஹாப்பியா இருக்கு” என்கிற ஜெயந்த், படிக்கும் போதே பள்ளியில் கால்பந்தாட்டத்தில் சிறப்பாக ஆடியவர்தானாம். பெரிய பெரிய ஆர்ட்டிஸ்டுகளோட ஏ.ஆர்.ரஹ்மான் மியூசிக்ல பாலிவுட்ல நடிச்சிட்டாலும் தமிழ் சினிமாவுல கவனிகப்படற மாதிரி நடிக்க வேண்டும் என்பதே ஜெயந்தின் விருப்பமாம்.