Doctor Vikatan: என் 15 வயது மகளுக்கு சமீபத்தில் கழுத்தைச் சுற்றி வீக்கமும், காய்ச்சலும், வலியும் வந்தன. அக்கம்பக்கத்தினர் அதை ‘பொன்னுக்கு வீங்கி’ என்று சொல்லி, கழுத்தில் தங்கச் சங்கிலி அணிவிக்கச் சொன்னார்கள். இது எந்த அளவுக்குச் சரியானது? பொன்னுக்கு வீங்கி என்பது என்ன…. அதற்கான சிகிச்சை என்ன?
பதில் சொல்கிறார் சென்னையைச் சேர்ந்த தொற்றுநோய் சிகிச்சை சிறப்பு மருத்துவர் விஜயலட்சுமி பாலகிருஷ்ணன்
ஆங்கிலத்தில் ‘மம்ப்ஸ்’ ( Mumps ) என்று அழைக்கப்படும் தொற்றுநோய்க்கு தமிழில் ‘பொன்னுக்கு வீங்கி’ என்றொரு பெயரும் இருக்கிறது. இது ஒருவகையான அம்மை நோய். ‘பரோடிட் சப்மாண்டிபுலர் கிளாண்ட்ஸ்’ (parotid submandibular glands) எனப்படும் சுரப்பிகள் நமக்குத் தேவையான உமிழ்நீர் சுரப்பைக் கொடுப்பவை. உணவு உள்ளே போனதும் அதை மென்று உள்ளே தள்ள உதவும். இந்தச் சுரப்பிகள் வீங்கிப்போவதைத்தான் ‘மம்ப்ஸ்’ (Mumps) என்கிறோம். அதன் விளைவாக காய்ச்சல், வலி போன்றவை வரும்.
இது ஒருவரிடமிருந்து இன்னொருவருக்கு கபம், சளி மற்றும் நெருக்கமான தொடர்பு மூலம் பரவும் வைரஸால் ஏற்படுகிறது. பெரும்பாலும் இந்தத் தொற்றானது தானாகவே சரியாகிவிடும். அரிதாகச் சிலருக்கு இது மூளைக்காய்ச்சலாகவோ, விரை வீக்கமாகவோ தீவிரமாகலாம். அதாவது 100 பேர் இந்தத் தொற்றால் பாதிக்கப்பட்டிருந்தால், அவர்களில் ஒருவர் அல்லது இருவருக்கு மட்டும்தான் இதுபோன்ற பிரச்னைகள் வரும்.
தொற்று பாதிப்புக்குள்ளானவர்கள் உடலில் நீர்வறட்சி ஏற்படாமல் பார்த்துக்கொள்ள வேண்டும். நிறைய தண்ணீரும், திரவ உணவுகளும் எடுத்துக்கொள்ள வேண்டும். மருத்துவரின் பரிந்துரையின் பேரில் வைட்டமின் மாத்திரைகள் எடுத்துக்கொள்ள வேண்டும். ஆரோக்கியமான உணவு எடுத்துக்கொள்ள வேண்டும். வேறு ஏதேனும் பிரச்னைகள், அறிகுறிகள் இருந்தால் மருத்துவரை அணுக வேண்டும். மற்றபடி இந்தப் பிரச்னைக்கென்று தனி ஆன்டிவைரல் அல்லது ஆன்டிபயாடிக் மருந்துகள் கிடையாது.
இந்தத் தொற்று வராமலிருக்க, குழந்தைகளுக்கு எம்எம்ஆர் (MMR Vaccine ) என்ற பெயரில் 12-13 வயதில் தடுப்பூசி ஒன்று போடுவார்கள். குடும்பத்தில் யாருக்காவது மம்ப்ஸ் தொற்று வந்தால், அந்தக் குடும்பத்தில் தடுப்பூசி போடாதவர்களும் போட்டுக்கொள்ள வேண்டும். அப்படிப் போடாத பட்சத்தில் அடுத்தடுத்த வாரங்களில் குடும்பத்தில் ஒவ்வொருவருக்கும் இந்த வைரஸ் தொற்று பரவும்.
மம்ப்ஸ் பாதிக்கும்போது கழுத்தைச் சுற்றி வீக்கம் காணப்படும். பொன்னுக்கு வீங்கி என்ற பெயருடன் அதைத் தொடர்புபடுத்தி கழுத்தில் தங்க ஆபரணம் அணிவிப்பதை ஒரு சிகிச்சையாக இன்றும் சிலர் பின்பற்றி வருகிறார்கள். தங்கத்துக்கும் இந்தத் தொற்றுக்கும் அப்படி எந்தத் தொடர்பும் இல்லை. எனவே, இதுபோன்ற தவறான நம்பிக்கைகளைப் பின்பற்றாமல் விஞ்ஞானம் சொல்வதைக் கேட்டு நடப்பதுதான் பாதுகாப்பானது.
உங்கள் கேள்விகளை கமென்ட் பகுதியில் பகிர்ந்து கொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.