இயக்குநராக எஸ்.ஜே.சூர்யா பிரபலமானதைவிட பல மடங்கு நடிகரான பிறகு அவர் புகழின் உச்சத்தில் இருக்கிறார் என்றே சொல்லலாம்.
அதிலும் குறிப்பாக அவரது இரண்டாவது இன்னிங்ஸில் வெளிவந்த ‘இறைவி’, ‘ஸ்பைடர்’, ‘மெர்சல்’, ‘மான்ஸ்டர்’, ‘நெஞ்சம் மறப்பதில்லை’, ‘மாநாடு’, ‘டான்’ என எஸ்.ஜே.சூர்யா இருக்கிற படங்களெல்லாம் ஹிட் ரகம் தான் என கோலிவுட்டில் சொல்லி வருகிறார்கள். 2023 ஆம் ஆண்டிலும் ‘மார்க் ஆண்டனி’, ‘ஜிகர்தண்டா டபுள் எக்ஸ்’ போன்ற படங்களின் மூலம் அதனை உறுதிப்படுத்தியும் இருக்கிறார். 2024 ஆம் ஆண்டிற்கும் இப்படி ஒரு ஹிட் லிஸ்ட்டைத் தயார் செய்து வருகிறார். அதில் தற்போது புதுப்படத்தை ஒன்றையும் கமிட் செய்திருக்கிறார் எஸ்.ஜே.சூர்யா.
சிவகார்த்திகேயனை வைத்து ‘ரெமோ’ படத்தை இயக்கிய பாக்கியராஜ் கண்ணன், இரண்டாவதாக கார்த்தியை வைத்து ‘சுல்தான்’ படத்தை இயக்கினார். சிவகார்த்திகேயனுக்கு லேடி கெட்டப்பை நேர்த்தியாக போட்டுவிட்டது, கார்த்தியை வித்தியாசமான கேங் லீடராகக் காட்டியது என அவரது இரண்டு படங்களிலும் பல சுவாரஸ்யங்கள் இருக்கும். இவரும் எஸ்.ஜே.சூர்யாவும் தான் இப்போது புதுப்படம் ஒன்றில் மூலம் இணைந்திருக்கிறார். இந்தப் படத்தின் ஷூட்டிங்கை ஏப்ரல் மாதத்தில் ஆரம்பிக்கவும் திட்டமிட்டிருக்கிறார்கள்.
நடிகர் கார்த்தியை வைத்து அவர்களின் இரண்டாவது படத்தை இயக்கும் இயக்குநர்களின் லைன் -அப்களில் பிளாக் பஸ்டர் படங்கள் வரிசை கட்டியிருக்கின்றன. ‘மெட்ராஸ்’ படத்தை இயக்கிய பா.ரஞ்சித்திற்கு ‘கபாலி’, ‘தீரம் அதிகாரம் ஒன்று’ படத்தை இயக்கிய ஹெச்.வினோத்திற்கு ‘நேர்கொண்ட பார்வை’, ‘கைதி’ படத்தை இயக்கிய லோகேஷ் கனகராஜிற்கு ‘மாஸ்டர்’ என ‘சுல்தான்’ படத்தை இயக்கிய பாக்கியராஜ் கண்ணனின் இந்த புதிய படத்தின் மீதான எதிர்பார்ப்பு இப்போதே அதிகரித்து வருகிறது.