தமிழ்நாட்டைப் பொறுத்தவரை அதிமுக, திமுக ஆகிய திராவிட கட்சிகளின் உதவியுடன் தான் பாஜக சட்டமன்றத்தில் காலடி எடுத்துவைத்துள்ளது. இதனால் அதிமுக உடனான கூட்டணி என்பது பாஜகவுக்கு அத்தியாவசியம் என்று பார்க்கப்பட்டது. ஆனால் இம்முறை பாஜகவோ வேறு ஒரு பிளானில் களமிறங்குகிறது. அந்த திட்டத்தின் படி முதல் தாக்குதலையே அதிமுகவை நோக்கி தொடுத்துள்ளது.
பாஜக வகுக்கும் திட்டம்!அதிமுகவுடன் கூட்டணி வைத்து 4 சட்டமன்றத் தொகுதிகளை கைப்பற்றிய பாஜக 20 ஆண்டுகளுக்குப் பின்னர் சட்டப் பேரவைக்குள் காலடி எடுத்து வைத்தது. இதனால் அந்த கூட்டணி தொடர்ந்தாலே பாஜக மக்களவைத் தேர்தலில் வெற்றி பெறும் என்று அரசியல் விமர்சகர்கள் சிலர் கருத்து தெரிவித்து வந்த நிலையில் பாஜக அதற்கு நேர்மாறாக புதிய திட்டத்தை கையில் எடுத்துள்ளது.
அண்ணாமலையின் அஜெண்டாதமிழ்நாடு பாஜக தலைவராக அண்ணாமலை பதவியேற்றதிலிருந்தே கட்சிக்குள் சலசலப்புகளுக்கும் சர்ச்சைகளுக்கும் குறைவில்லாமல் உள்ளது. தமிழ்நாட்டில் பாஜகவை கால் ஊண்ற வைக்க வேண்டுமென்றால் தனித்துப் போட்டியிட வேண்டும் என்பதை ஆரம்பம் முதலே தலைமையிடம் வலியுறுத்தி வருகிறார். அண்ணாமலை அவசரப்படுகிறார், இன்னும் ஐந்து ஆண்டுகள் கழித்து அப்படியான முடிவை எடுக்கலாம் என்று தான் ஆரம்பத்தில் அங்கிருந்து ஆலோசனைகள் வந்தன.
ஜெயலலிதாவை விமர்சிப்பது ஏன்?அண்ணாமலை தனது முடிவில் உறுதியாக இருந்த நிலையில் தனித்துப் போட்டியிடுவதற்கான சூழல் கனிந்து விட்டது என்றும் அதற்கான காரணங்களையும் அடுக்கியுள்ளாராம். டெல்லிக்கும் அந்த காரணங்கள் ஏற்றுக் கொள்ளும் வகையில் இருந்ததால் அண்ணாமலைக்கு ஓகே சொல்லிவிட்டதாக சொல்கிறார்கள். அதன்பின்னரே ஜெயலலிதாவை குறித்து அண்ணாமலை விமர்சிக்கத் தொடங்கியுள்ளாராம்.
திமுக Vs பாஜகடெல்லி தலைமையிடம் அண்ணாமலை சொன்ன காரணங்கள் என்ன என்பது குறித்து விசாரித்தோம். தமிழ்நாட்டு அரசியல் களம் திமுக Vs அதிமுக என்பது போய் தற்போது திமுக Vs பாஜக என்ற நிலைக்கு வந்துவிட்டது. அதிலும் தற்போது மக்களவைத் தேர்தல் என்பதால் மோடி ஆதரவு Vs மோடி எதிர்ப்பு என்ற ரீதியில் தான் தமிழக அரசியல் களம் இருக்கும்.
மோடி ஆதரவு Vs மோடி எதிர்ப்புதிமுக 2019 மக்களவைத் தேர்தலில் இருந்தே மோடி எதிர்ப்பில் உறுதியாக உள்ளது. அதுமட்டுமல்லாமல் அப்போது அமைத்த கூட்டணியை இன்னும் வலுவாகத் தொடர்ந்து வருகிறது. மோடி எதிர்ப்பு வாக்குகளை பிரித்தால் மட்டுமே திமுகவை பலவீனமடையச் செய்து பாஜகவை கால் ஊண்ற வைக்க முடியும். இந்த அடிப்படையில் தான் அண்ணாமலை தனது தேர்தல் வியூகத்தை முன்வைத்திருக்கிறார்.
உடையும் அதிமுக – பாஜக கூட்டணி?அதிமுக, பாஜக இணைந்திருக்கும் பட்சத்தில் மோடி எதிர்ப்பு வாக்குகள் திமுகவுக்கு முழுதாக சென்றுவிடும். அதிமுகவும் பாஜகவும் தனித்தனியாக போட்டியிட்டால் மோடி எதிர்ப்பு வாக்குகள் பாதி அதிமுகவுக்கும் செல்ல வாய்ப்பு உள்ளது. அப்போது பாஜக ஒரு சில தொகுதிகளில் வெற்றி பெற முடியும். இதற்கு உதாரணமாக 2014 தேர்தலை எடுத்துப் பார்க்கலாம்.
2014 பிளாஷ் பேக்!திமுக அந்த சமயம் பலவீனமாக இருந்தது. இப்போது அதிமுக இருக்கும் நிலை என்று சொல்லலாம். அந்த சமயம் பாஜக தேமுதிக, பாமக, மதிமுக உள்ளிட்ட கட்சிகள் கூட்டணி அமைத்து போட்டியிட்டன. அந்த சமயம் திமுகவுக்கு ஒரு சீட் கூட கிடைக்கவில்லை. மூன்றாவது அணியான பாஜகவுக்கு 2 இடங்கள் கிடைத்தன. இப்போது திமுக பெரும்பாலான இடங்களை வென்றாலும் தனித்து நின்றால் இரண்டாவது இடத்தை பாஜக கூட்டணி பெறலாம்.
கிளை பரப்பும் பாஜக2014ஐவிட தற்போது பாஜக தமிழ்நாட்டின் பல்வேறு ஊர்களில் கிளைபரப்பி வளர்ந்துள்ளது. மோடி ஆதரவு வாக்குகள் அதிகரித்துள்ளன. அதை பாஜக கைப்பற்ற வேண்டும், பாஜக மட்டுமே அதற்கு உரிமை கொண்டாட வேண்டும் என்றால் அதிமுக கூட்டணிக்குள் இருக்க கூடாது. வேண்டுமென்றால் ஓபிஎஸ், டிடிவி தினகரன் ஆகியோரை இணைத்துக் கொண்டால் அதிமுக சார்பு வாக்குகளும் கிடைத்துவிடும்.
அண்ணாமலையின் கணக்கு சரி வருமா?
அதிமுகவுடன் கூட்டணி அமைத்தால் 2019 நிலையே மீண்டும் வரவே வாய்ப்பு உண்டு. மொத்தமும் திமுக கைக்கு சென்றுவிடும். எனவே அதிமுகவும், பாஜகவும் எதிரும் புதிருமாக இருந்தால் திமுகவுக்கு லட்டு போல் செல்லும் வாக்குகள் தடுக்கப்படும் என்பது தான் அண்ணாமலையின் கணக்கு. இதற்கு செயல்வடிவம் கொடுக்க டெல்லி ஒப்புதல் அளித்துவிட்டதாக சொல்கிறார்கள் விவரம் அறிந்தவர்கள்.