குழந்தைகள் இறப்பு: இருமல் மருந்து நிறுவனத்தின் தயாரிப்புக்கு தடை!

மேற்கு ஆப்பிரிக்க நாடான காம்பியாவில் 69 குழந்தைகள் சிறுநீரக செயலிழப்பு காரணமாக உயிரிழந்தனர். இதற்கு இந்தியாவில் தயாரிக்கப்பட்ட தரமற்ற 4 இருமல் மருந்துகள் காரணமாக இருக்கலாம் என்று உலக சுகாதார அமைப்பு எச்சரிக்கை விடுத்துள்ளது.

இந்தியாவில் உள்ள மெய்டன் பார்மாசூட்டிக்கல்ஸ் என்ற மருந்து நிறுவனத்தால் இருமல் மற்றும் சளி மருந்துகள் தயாரிக்கப்படுகின்றன. காம்பியா நாட்டில் ஏற்பட்ட சிறுநீரக பாதிப்பு மற்றும் 66க்கும் மேற்பட்ட குழந்தைகளின் உயிரிழப்புக்கு இந்த நிறுவனத்தின் 4 மருந்துகளுடனான தொடர்பு கண்டறியப்பட்டுள்ளது. அந்த நிறுவனத்தின் Promethazine Oral Solution, Kofexmalin Baby Cough Syrup, Makoff Baby Cough Syrup, Magrip N Cold Syrup ஆகிய மருந்துகளை அனைத்து நாடுகளும் பயன்பாட்டில் இருந்து அகற்றுமாறு கேட்டுக் கொள்ளப்படுவதாக உலக சுகாதார அமைப்பு எச்சரிக்கை விடுத்திருந்தது.

ஹரியானாவை சேர்ந்த மெய்டன் பார்மாசூட்டிக்கல்ஸ் நிறுவனத்தில் தயாரிக்கப்படும் இருமல் மருந்துகள் குறித்து இந்திய மருந்துக் கட்டுப்பாட்டாளர் ஜெனரலுக்கு (DCGI) உலக சுகாதார அமைப்பு எச்சரிக்கை விடுத்ததையடுத்து, ஹரியானா ஒழுங்குமுறை ஆணையத்திடம் மத்திய அரசு விளக்கம் கேட்டிருந்தது. மேலும், அந்த மருந்துகளின் மாதிரிகளும் சோதனைக்கு அனுப்பப்பட்டிருந்தன. அதன் முடிவுகளின் அடிப்படையில் அடுத்தக்கட்ட நடவடிக்கைகள் மேற்கொள்ளப்படும் என தெரிவிக்கப்பட்டிருந்தது.

இந்தநிலையில், காம்பியா நாட்டு குழந்தைகள் இறப்புடன் தொடர்புடையதாக குற்றச்சாட்டுக்கு ஆளான மெய்டன் பார்மாசூட்டிக்கல்ஸ் நிறுவனத்தின் இருமல் மருந்து தயாரிப்புகளுக்கு அதிகாரிகள் தடை விதித்துள்ளதாக ஹரியானா சுகாதாரத்துறை அமைச்சர் அனில் விஜ் தெரிவித்துள்ளார். ஹரியானா மாநிலம் சோனிபட் அருகே உள்ள அந்த நிறுவனத்தில் மேற்கொள்ளப்பட்ட சோதனையில் விதிமீறல்கள் கண்டறியப்பட்டதால் உற்பத்தியை நிறுத்த உத்தரவிடப்பட்டுள்ளதாக அவர் தெரிவித்துள்ளார்.

இந்த விவகாரம் தொடர்பாக காம்பியா நாட்டு போலீசார் மேற்கொண்ட முதற்கட்ட விசாரணை அறிக்கையில், இந்தியாவில் தயாரிக்கப்பட்டு அமெரிக்காவை தளமாகக் கொண்ட ஒரு நிறுவனம் மூலம் இறக்குமதி செய்யப்பட்ட இருமல் மருந்துகள் மூலம் கடுமையான சிறுநீரக பாதிப்பால் 69 குழந்தைகள் உயிரிழந்துள்ளதாக தெரிவிக்கப்பட்டுள்ளது.