கர்நாடக மாநிலத்தில் கல்வி நிலையங்களில் மாணவிகள் ஹிஜாப் அணிவது தொடர்பாக சர்ச்சை வெடித்தது. பள்ளி, கல்லூரிகளுக்கு வரும் போது சீருடையில் மட்டுமே வர வேண்டும் என்று கோரிக்கைகள் முன்வைக்கப்பட்டன. ஆனால் ஹிஜாப் எங்கள் உரிமை என்று சிலர் தெரிவித்தனர். இதுதொடர்பாக மாநில உயர் நீதிமன்றத்தில் வழக்கு தொடரப்பட்டது. அதில், கல்வி நிலையங்களில் மாணவிகள் ஹிஜாப் அணிய தடை விதித்து கடந்த பிப்ரவரி 5ஆம் தேதி உத்தரவு பிறப்பிக்கப்பட்டது.
இந்த உத்தரவிற்கு எதிராக மாணவிகள் சிலர் உச்ச நீதிமன்றத்தில் மனு தாக்கல் செய்தனர். இந்த வழக்கை இரு நீதிபதிகள் கொண்ட அமர்வு விசாரித்து வந்தது. 10 நாட்கள் தொடர்ந்து விசாரணை நடைபெற்ற நிலையில் தீர்ப்பு ஒத்திவைக்கப்படுவதாக செப்டம்பர் 22ஆம் தேதி அறிவிக்கப்பட்டது.
இந்நிலையில் இன்றைய தினம் (அக்டோபர் 13) ஹிஜாப் மேல்முறையீட்டு வழக்கில் உச்ச நீதிமன்ற நீதிபதிகள் ஹேமந்த் குப்தா, சுதான்சு துலியா ஆகியோர் தீர்ப்பு வழங்கவுள்ளதாக தெரிவிக்கப்பட்டது. இதனால் நாடு முழுவதும் பெரும் எதிர்பார்ப்பு உருவானது. இந்த சூழலில் தீர்ப்பு தற்போது வெளிவந்துள்ளது. அதாவது, கர்நாடக அரசின் ஹிஜாப் தடையை நீக்கி நீதிபதி சுதான்சு துலியா உத்தரவிட்டுள்ளார்.
மேலும் கர்நாடக உயர் நீதிமன்றத்தில் மேல்முறையீடு செய்யவும் அனுமதி அளித்துள்ளார். அதுமட்டுமின்றி ஹிஜாப் அணிவது என்பது ஒருவரின் தனிப்பட்ட விருப்பம். பெண்களுக்கு கல்வி அளிப்பது மட்டுமே பிரதானமாக இருக்க வேண்டும் எனவும் தெரிவித்துள்ளார்.
ஆனால் அரசியல் சாசனம் அனுமதித்துள்ள சரத்துகளின் படி, கர்நாடக அரசு விதித்த தடை செல்லும் என்று நீதிபதி ஹேமந்த் குப்தா அதிரடி உத்தரவு பிறப்பித்துள்ளார். இவ்வாறு இரண்டு நீதிபதிகளும் மாறுபட்ட தீர்ப்பை வழங்கியிருப்பதால் மூன்றாவது நீதிபதிக்கு இந்த வழக்கு பரிந்துரை செய்யப்படலாம் என்று எதிர்பார்க்கப்படுகிறது.
இதற்கிடையில் ஹிஜாப் வழக்கில் கூடுதல் நீதிபதிகளை நியமிக்கக் கோரி உச்ச நீதிமன்ற தலைமை நீதிபதியிடம் ஆலோசனை கேட்கப்பட்டுள்ளதாக தகவல்கள் வெளியாகியுள்ள. ஹிஜாப்பிற்கு விதிக்கப்பட்ட தடை செல்லும் என்று உத்தரவிட்ட உச்ச நீதிமன்ற நீதிபதி ஹேமந்த் குப்தா நாளை தனது பணியில் இருந்து ஓய்வு பெறுவது குறிப்பிடத்தக்கது.