ஈரோடு மாவட்ட மக்களின் முக்கிய குடிநீர் ஆதாரமாக பவானிசாகர் அணை விளங்குகிறது. இதன் மொத்த கொள்ளளவு 105 அடி. இந்த அணை மூலம் ஈரோடு, திருப்பூர், கரூர் ஆகிய மாவட்டங்களை சேர்ந்த 2 லட்சத்து 7 ஆயிரத்துக்கும் மேற்பட்ட விவசாய நிலங்கள் பாசன வசதி பெற்று வருகின்றன. ஈரோட்டில் இருந்து 76 கிலோமீட்டர் தொலைவில் பவானிசாகர் அணை அமைந்துள்ளது.
தமிழகத்தின் இரண்டாவது மிகப்பெரிய அணை என்ற பெருமைக்கு உரியது. பவானிசாகர் அணையின் முக்கிய நீர்ப்பிடிப்பு பகுதியாக நீலகிரி மலை விளங்குகிறது. கடந்த சில நாட்களாக நீலகிரி மலைப் பகுதியில் பரவலாக மழை பெய்து வந்தது. இதன் காரணமாக பவானிசாகர் அணைக்கு நீர்வரத்து தொடர்ந்து அதிகரித்து வருகிறது.
“லவ் டுடே பார்த்த முதலமைச்சர்” அண்ணாமலை ஆவேசம்!
ஒருவார காலமாக பவானிசாகர் அணையின் நீர்மட்டம் 104 அடியாக நீடித்து வந்தது. இன்று (நவம்பர் 16) காலை நிலவரப்படி பவானிசாகர் அணையின் நீர்மட்டம் 104.29 அடியாக உள்ளது. அணைக்கு வினாடிக்கு 3 ஆயிரத்து 600 கன அடி வீதம் தண்ணீர் வந்து கொண்டிருக்கிறது. அணையில் இருந்து பவானி ஆற்றின் வழியாக உபரிநீராக ஆயிரம் கன அடி தண்ணீர் திறந்து விடப்படுகிறது.
இதேபோல் கீழ்பவானி வாய்க்காலுக்கு 1,800 கன அடி தண்ணீர் வெளியேற்றப்படுகிறது. மொத்தமாக பவானிசாகர் அணையில் இருந்து 2,800 கன அடி நீர் வெளியேற்றப்படுவது குறிப்பிடத்தக்கது. வடகிழக்கு பருவமழை காரணமாக தமிழகத்தின் பல்வேறு பகுதிகளில் நல்ல மழை பெய்து வருகிறது. அந்த வகையில் நீலகிரியில் உள்ள பவானிசாகர் நீர்பிடிப்பு பகுதிகளில் மழை பெய்ததால் அணைக்கு நீர்வரத்து அதிகரித்தது.
கடந்த வாரமே முழு கொள்ளளவை எட்டும் என்று எதிர்பார்க்கப்பட்டது. இதையொட்டி ஆற்றின் கரையோரம் மற்றும் தாழ்வான பகுதிகளில் வசிக்கும் மக்களுக்கு எச்சரிக்கை விடப்பட்டது. இப்பகுதி மக்கள் அனைவரும் பாதுகாப்பான இடங்களுக்கு செல்லுமாறு அறிவுறுத்தப்பட்டது.
நீர்வளத்துறை மற்றும் மாவட்ட நிர்வாகம் சார்பில் அனைத்து விதமான முன்னெச்சரிக்கை நடவடிக்கைகளும் மேற்கொள்ளப்பட்டன. அதன்பிறகு மழை சற்றே ஓய்ந்ததால் நீர்மட்டம் சரியத் தொடங்கியது. இதன் தொடர்ச்சியாக நடப்பு வாரத்திலும் மழை தொடர்வதால் பவானிசாகர் அணையின் நீர் மட்டம் மீண்டும் உச்சம் நோக்கி சென்று கொண்டிருக்கிறது.