“ராகுல் காந்தியின் இந்திய ஒற்றுமைப் பயணத்தை கண்டு மத்திய பாஜக அரசு அஞ்சுகிறது. இதனாலேயே மத்திய அரசு கடிதம் அனுப்பி உள்ளது,” என, ராஜஸ்தான் மாநில முதலமைச்சர் அசோக் கெலாட் குற்றம் சாட்டி உள்ளார்.
காங்கிரஸ் நாடாளுமன்ற உறுப்பினர் ராகுல் காந்தி, பாரத் ஜோடோ என்ற பெயரில், இந்திய ஒற்றுமைப் பயணத்தை நடத்தி வருகிறார். இந்த யாத்திரை, தமிழகத்தின் கன்னியாகுமரியில் கடந்த சில மாதங்களுக்கு முன்பு தொடங்கப்பட்டது.
கேரளா, ஆந்திரா, தெலங்கானா, கர்நாடகா, மகாராஷ்டிரா, ராஜஸ்தான் உள்ளிட்ட மாநிலங்களைக் கடந்து, தற்போது இந்த யாத்திரை, பாஜக ஆட்சி செய்யும் ஹரியானா மாநிலத்திற்குள் நுழைந்துள்ளது. வரும் 2024 ஆம் ஆண்டு நடைபெற உள்ள நாடாளுமன்ற மக்களவைத் தேர்தலை மையமாக வைத்தே இந்த யாத்திரையை ராகுல் காந்தி மேற்கொண்டு வருவதாக அரசியல் நோக்கர்கள் கருத்துத் தெரிவித்து உள்ளனர்.
இதற்கிடையே, சீனா, அமெரிக்கா உள்ளிட்ட நாடுகளில், கொரோனா பரவல் மீண்டும் வேகமாகப் பரவி வருகிறது. இது தொடர்பாக மத்திய சுகாதாரத் துறை அமைச்சர் மன்சுக் மாண்டவியா, இன்று, சுகாதாரத் துறை அதிகாரிகளுடன் ஆய்வுக் கூட்டம் நடத்தினார்.
இதைத் தொடர்ந்து, இந்திய ஒற்றுமைப் பயணத்தில் கொரோனா தடுப்பு நடவடிக்கைகளை முறையாக கடைபிடிக்கும்படி, ராகுல் காந்திக்கு, மத்திய சுகாதாரத் துறை அமைச்சர் மன்சுக் மாண்டவியா கடிதம் எழுதினார். மேலும், நாட்டின் நலன் கருதி, இந்திய ஒற்றுமைப் பயணத்தை ஒத்தி வைக்கும்படியும் அவர் கோரிக்கை விடுத்திருந்தார்.
இந்நிலையில், இந்த விவகாரம் தொடர்பாக, ராஜஸ்தான் மாநில முதலமைச்சரும், காங்கிரஸ் மூத்தத் தலைவருமான அசோக் கெலாட், செய்தியாளர்களுக்கு அளித்த பேட்டியில் கூறியதாவது:
ராகுல் காந்தியின் ஒற்றுமை யாத்திரைக்கு மக்கள் ஆதரவு பெருகுவதை கண்டு பாஜக பயந்து விட்டது. இந்த யாத்திரையில் லட்சக் கணக்கானோர் கலந்து கொள்கின்றனர். மத்திய அமைச்சர்கள் இப்படி கடிதம் எழுதுவதால் மத்திய அரசு மிகவும் பயந்து விட்டது. எங்கள் யாத்திரை நடந்து கொண்டிருக்கிறது. மேலும் தொடரும்.
ஒற்றுமை யாத்திரையை சீர்குலைக்கவே மத்திய சுகாதாரத் துறை அமைச்சர் மன்சுக் மாண்டவியா கடிதம் எழுதி உள்ளார். நாட்டில் பாரத் ஜோடோ யாத்ராவின் தாக்கம் உள்ளது. பாஜகவே மிகவும் கலக்கத்தில் உள்ளது. சில நாட்களுக்கு முன்பு ஜெ.பி.நட்டாவின் ‘ஆக்ரோஷ்’ பேரணி தோல்வி அடைந்தது. திரிபுராவில் பிரதமர் நரேந்திர மோடி நடத்திய பேரணியில் கொரோனா நடைமுறைகள் பின்பற்றவில்லை.
இவ்வாறு அவர் கூறினார்.