பிக்பாஸில் இருந்து வெளியேறும் கமல்ஹாசன்?
2017ம் ஆண்டு விஜய் டிவியில் தொடங்கப்பட்ட பிக்பாஸ் நிகழ்ச்சியை தொடர்ந்து ஆறு சீசன்களாக தொகுத்து வழங்கி வருகிறார் கமல்ஹாசன். விக்ரம் படம் திரைக்கு வருவதற்கு முன்பு நான்கு ஆண்டுகளாக கமல் நடிப்பில் எந்த ஒரு படமும் திரைக்கு வராத நிலையில் மக்கள் மத்தியில் அவரை பிக்பாஸ் நிகழ்ச்சி தான் கொண்டு சேர்த்து வந்தது. ஆனால் விக்ரம் படம் திரைக்கு வந்த பிறகு மீண்டும் கமலின் மார்க்கெட் சூடு பிடித்து விட்டது.
தற்போது ஷங்கர் இயக்கும் இந்தியன்-2 படத்தில் நடித்து வரும் கமல்ஹாசன் அடுத்தபடியாக மணிரத்னம், எச்.வினோத், வெற்றிமாறன், பா.ரஞ்சித், லோகேஷ் கனகராஜ், மகேஷ் நாராயணன் ஆகியோர் இயக்கும் படங்களில் அடுத்தடுத்து நடிக்க போகிறார். இதற்கிடையே லோக்சபா தேர்தல் பணிகளும் தொடங்கப்பட்டிருப்பதால் முன்பை விட அதிக பிஸியாகி விட்ட கமல்ஹாசன் பிக்பாஸ் நிகழ்ச்சியை தற்போது நடைபெற்று வரும் ஆறாவது சீசனோடு முடித்துக் கொள்வதற்கு திட்டமிட்டிருப்பதாக தகவல் வெளியாகி உள்ளன. தற்போது நடைபெற்று வரும் பிக்பாஸ் சீசன் 6வது சீசனின் இறுதி நாள் அன்று இந்த அறிவிப்பை கமல்ஹாசன் வெளியிட இருப்பதாக கூறப்படுகிறது.