மேல்மாகாணத்தில் உள்ள வைத்தியசாலைகளில் ,தேவைக்கு ஏற்ப அத்தியாவசிய மருந்துகளை வெளியில் கொள்வனவு செய்வதற்கு அனுமதி வழங்கப்பட்டுள்ளதாக நகர அபிவிருத்தி மற்றும் வீடமைப்பு அமைச்சர் திரு.பிரசன்ன ரணதுங்க தெரிவித்தார்.
கம்பஹா மாவட்ட ஒருங்கிணைப்புக் குழு கூட்டத்தின் பின்னர் நேற்று (22) ஊடகவியலாளர்கள் எழுப்பிய கேள்விகளுக்கு பதிலளிக்கும் போதே அமைச்சர் இந்த விடயத்தை குறிப்பிட்டார்.
கேள்வி – கம்பஹா வைத்தியசாலைகளின் வெளிநோயாளர் பிரிவில் மருந்துப் பொருட்களுக்கு தட்டுப்பாடு ஏற்பட்டுள்ளது. ஒருங்கிணைப்புக் குழு எடுத்த நடவடிக்கை என்ன?
பதில் – சில மருந்துகளுக்கு தட்டுப்பாடு இருப்பதாக இங்கு முன்வைக்கப்பட்டது. சுகாதார அமைச்சும் மாகாண சபையும் இணைந்து இதனை நிர்வகிக்க வேண்டும். கடந்த காலங்களில் இது சரியாக நிர்வகிக்கப்படவில்லை என்று நான் நம்புகிறேன். அதனால்தான் இன்று மாவட்டக் குழு இது குறித்து ஆலோசித்தது. மேல் மாகாணத்தில் அத்தியாவசிய மருந்து இல்லை என்றால், தேவைக்கு ஏற்ப மருந்துகளை வெளியில் இருந்து கொள்வனவு செய்வதற்கு இன்று அனுமதி வழங்கப்பட்டுள்ளது.
கேள்வி – நாடு முழுவதும் மருந்து தட்டுப்பாடு உள்ளது. சுகாதார அமைச்சு எடுத்த நடவடிக்கைகள் என்ன?
பதில் – நாடு முழுவதும் மருந்து தட்டுப்பாடு இல்லை. மருந்துகளில் மாஃபியா இருக்கிறது. மருந்துப் பொருட்களின் விலையை உயர்த்தி பெரிய நெருக்கடியை உருவாக்கியுள்ளனர். ஆனால் பல வகையான மருந்துகளுக்கு தட்டுப்பாடு நிலவுவதாக மாகாண சுகாதார பணிப்பாளர் மற்றும் வைத்தியர்கள் தெரிவிக்கின்றனர்.
கேள்வி – மின்கட்டணம் அதிகரிப்பதாக மக்கள் பேசுகின்றனர்.
பதில் – மின்சார கட்டணம் தொடர்பில் அரசாங்கம் இன்று தீர்மானம் எடுத்துள்ளது. தற்போதைய பொருளாதார நெருக்கடியால், மக்களின் செலவுகள் அதிகரித்துள்ளன. மின்கட்டணம் மேலும் அதிகரித்தால் மக்களால் தாங்க முடியாத நிலை ஏற்படும் என்பதை ஏற்றுக் கொள்கிறோம். ஆனால் நாட்டின் நிலைமை உதாரணமாக ஒரு லீற்றர் எரிபொருளை 500 ரூபாவிற்கு வாங்கினால் அரசாங்கம் 250 ரூபாவை அறவிடுகின்றது. அதாவது மக்களின் வரிப்பணத்தில் இருந்து 250 ரூபாயை அரசாங்கம் செலுத்தும். அதற்காக அப்பாவி மக்கள் பணம் செலவழிக்கிறார்கள். சரியான விலையை வைத்த பிறகு, பயணங்கள் குறைந்துள்ளன. அந்த நிவாரணத்தை மக்களுக்கு வழங்க முடிந்துள்ளது. நுரைச்சோலை அனல்மின் நிலையம் அமைக்கப்படும் வரை கடந்த காலங்களில் மின்சாரம் உற்பத்தி செய்ய வழியில்லை. மலிவான மின்சாரத்தை வாங்க சூரிய சக்தியை செயல்படுத்தும் திட்டம் எதுவும் இல்லை. இதிலெல்லாம் மாஃபியாக்கள் இருந்தார்கள். ஆனால் அரசு சட்டங்களை இயற்றி அதை செயல்படுத்தும் திட்டத்தை தொடங்கியுள்ளது. மின்சாரத்திற்கு எரிபொருளைப் பயன்படுத்தும் போது, ஒரு யூனிட் மின்சாரத்திற்கு அதிக செலவைச் செய்ய வேண்டும். இதற்கெல்லாம் அப்பாவி ஏழை மக்கள் நசுக்கப்படுகிறார்கள். அவர்களுக்கு ஏதாவது நடக்க வேண்டும். அதிகம் பயன்படுத்துபவர்களிடம் அதிக கட்டணம் வசூலிக்கவும், குறைவாக பயன்படுத்துவோரிடம் குறைவாக வசூலிக்கும் முறையை உருவாக்க சொல்கிறோம்.