யாருக்கு பொங்கல் பரிசு இல்லை?; வெளியான பரபரப்பு தகவல்!

பொங்கல் பண்டிகையை ஒட்டி, அனைத்து அரிசி குடும்ப அட்டைதாரர்களுக்கும் பொங்கல் பரிசுத்தொகுப்பு வழங்கப்படும் என திமுக தலைவரும், தமிழ்நாடு முதல்வருமான மு.க.ஸ்டாலின் கடந்த ஆண்டு அறிவித்து இருந்தார்.

அதன்படியே பச்சரிசி- 1 கிலோ, வெல்லம்- 1 கிலோ, முந்திரி – 50 கிராம், திராட்சை – 50 கிராம், ஏலக்காய்- 10 கிராம், பாசிப்பருப்பு- 500 கிராம், ஆவின் நெய் – 100 கிராம், மஞ்சள் தூள் – 100 கிராம், மிளகாய் தூள் -100 கிராம், மல்லி தூள் -100 கிராம் ஆகியவை, வழங்கப்பட்டது.

இவற்றுடன் கடுகு – 100 கிராம், சீரகம்- 100 கிராம், மிளகு – 50 கிராம், புளி- 200 கிராம், கடலைப் பருப்பு- 250 கிராம், உளுத்தம் பருப்பு- 500 கிராம், ரவை- 1, கோதுமை 1 கிலோ, உப்பு – 500 கிராம், துணி பை ஒன்று மற்றும் கரும்பு என மொத்தம் 21 பொருட்கள் அடங்கிய பரிசு தொகுப்பு வழங்கப்பட்டது.

இதேப்போல் நடப்பாண்டும் பொங்கல் பரிசு தொகுப்பு வழங்க தமிழக அரசு திட்டமிட்டு உள்ளதாகவும், இதற்கான அறிவிப்பு ஓரிரு நாளில் வெளியாகலாம் என்றும் தகவல் வெளியானபடி இருந்தது.

இந்நிலையில் வரும் 2023ம் ஆண்டு தைப்பொங்கலை சிறப்பாக கொண்டாடும், அனைத்து அரிசி குடும்ப அட்டைதாரர்கள் மற்றும் இலங்கை தமிழர் மறுவாழ்வு முகாம்களில் வசிக்கும் குடும்பத்தினருக்கு ரூ.1000 பணத்துடன் ஒரு கிலோ பச்சரிசி மற்றும் சர்க்கரை வழங்க முதலமைச்சர் மு.க.ஸ்டாலின் உத்தரவிட்டுள்ளார்.

தமிழக முதல்வர் மு.க.ஸ்டாலின் பொங்கல் பரிசு வழங்கும் நிகழ்ச்சியை ஜனவரி 02, 2023 அன்று சென்னையிலும், அன்றைய தினமே அனைத்து மாவட்டங்களில் அமைச்சர்கள் தொடங்கி வைப்பார்கள் என்றும் தெரிவிக்கப்பட்டு உள்ளது.

இந்நிலையில் தமிழக முதல்வர் அறிவித்த பொங்கல் பரிசு யாருக்கெல்லாம் கிடைக்காது என்கிற தகவல் வெளியாகி இருக்கிறது. தமிழ்நாட்டில் பொதுவாகவே 5 வகையான ரேஷன் கார்டுகள் உள்ளன.

அவை PHH, PHH-AAY, NPHH, NPHH-S,NPHH-NC என்பன ஆகும்.

PHH : Priority Household

PHH : AAY (Priority house hold-Antyodaya Anna Yojana)

NPHH : Non Priority Household

NPHH- S : NPHH- Sugar

NPHH- NC : NPHH- No Commodity

இதில் PHH என்று குறிப்பிடப்பட்டிருக்கும் ரேஷன் கார்டுக்கு அரிசி உள்பட அனைத்து பொருட்களும் வழங்கப்படும். மேலும் இந்த ரேஷன் கார்டுகளுக்கு முன்னுரிமை வழங்கப்படும்.

ரேஷன் கார்டில் PHH-AAY என்று குறிப்பிடப்பட்டு இருந்தால் இந்த ரேஷன் கார்டுக்கு 35 கிலோ அரிசி உள்ளிட்ட அனைத்துப் பொருட்களையும் பெற்றுக்கொள்ளலாம்.

NPHH-S- NPHH என, குறிப்பிட்டிருக்கும் ரேஷன் கார்டுகளுக்கு சர்க்கரை மட்டுமே வழங்கப்படும். NPHH-NC – NPHH ஆகிய ரேஷன் அட்டைதாரர்களுக்கு எந்த பொருளும் இல்லை என, தெரிவிக்கப்பட்டு உள்ளது.

இதனால் மேலே குறிப்பிட்டு உள்ள 3 வகையான PHH, PHH-AAY, NPHH அரிசி ரேஷன் அட்டைதாரர்களுக்கு மட்டுமே ரூ.1000 வழங்கப்படும் என, தெரிவிக்கப்பட்டு உள்ளது குறிப்பிடத்தக்கது.