தமிழகத்தின் முன்னணி நடிகர்களாக விளங்கும் தளபதி விஜய் மற்றும் தல அஜித் ஆகியோரின் திரைப்படங்கள் 8 ஆண்டுகளுக்குப் பிறகு நேரடியாக ஒரே நேரத்தில் ரிலீஸ் செய்யப்படுகின்றது. விஜய் நடிப்பில் வாரிசு திரைப்படமும், அஜித் நடிப்பில் துணிவு திரைப்படமும் பொங்கல் அன்று வெளியாகின்றன.
படம் வெற்றி பெற வேண்டி இரண்டு தரப்பு ரசிகர்களும் பல்வேறு பிரார்த்தனையில் ஈடுபட்டு வருகின்றனர். கடந்த சில தினங்களுக்கு முன்பு விஜய் ரசிகர்கள் சபரிமலையில் வாரிசு பட பேனரை வைத்து வழிபாட்டில் ஈடுபட்டனர்.
இந்த நிலையில் மயிலாடுதுறையை சார்ந்த அஜித் ரசிகர்கள் ஐயப்பன், மகேஷ், சூர்யா, ஆகிய மூன்று பேர் இருமுடி கட்டி சபரிமலை யாத்திரை சென்று, துணிவு பட பேனரை வைத்து சிறப்பு பிரார்த்தனையில் ஈடுபட்டனர் தற்போது அந்த வீடியோக்கள் வாட்ஸ் அப்பில் வைரல் ஆகி வருகின்றன.
மாமன்னனுக்கு சிறப்பு வழிபாடு:
உதயநிதி ஸ்டாலின் நடிப்பில் வெளிவர உள்ள மாமன்னன் படம் வெற்றி பெற வேண்டி சபரிமலையில் பேனர் வைத்து வழிபாடு செய்த சீர்காழி பக்தர்களின் வாட்ஸ் அப் வீடியோ தற்போது வைரலாகி வருகிறது.
மாமன்னன் படம் மாரி செல்வராஜ் எழுதி இயக்க, உதயநிதி ஸ்டாலின் தயாரிப்பு மற்றும் நடிப்பில் மாமன்னன் திரைப்படம் தயாராகி வருகிறது. இந்த படத்தில் பகத் பாசில், கீர்த்தி சுரேஷ், வடிவேலு ஆகியோருடன் உதயநிதி ஸ்டாலின் நடித்துள்ளார்.
தமிழக விளையாட்டு துறை அமைச்சரும், சட்டமன்ற உறுப்பினருமான உதயநிதி ஸ்டாலின் நடித்து வெளிவர உள்ள மாமன்னன் திரைப்படம், ரசிகர்களிடையே பெரும் எதிர்பார்ப்பையும், ஆவலையும் ஏற்படுத்தியுள்ளது. விரைவில் வெளிவர உள்ள மாமன்னன் திரைப்படம் வெற்றி பெற வேண்டி மயிலாடுதுறை மாவட்டம் சீர்காழி அருகே வாணகிரி மீனவ கிராமத்தை சார்ந்த ரசிகர்கள் சபரிமலை கோவிலுக்கு சென்று பம்பையில் மாமன்னன் பட பேனரை வைத்து படம் வெற்றி பெற வேண்டி பூஜை செய்து ஐயப்பனிடம் வேண்டுதலில் ஈடுபட்டனர். அந்த காட்சிகள் தற்போது வாட்ஸ் அப்பில் வைரலாக பரவி வருகிறது.