மத்திய பட்ஜெட் வழக்கமாக பிப்ரவரி மாதம் கடைசி வாரத்தில் தாக்கல் செய்யப்படுவது வழக்கம். இந்த முறையில் மாற்றம் செய்யப்பட்டு, மத்திய பாஜக ஆட்சிக்கு பிறகு, பொது பட்ஜெட் மற்றும் ரயில்வே பட்ஜெட் இவை இரண்டும் சேர்த்து பிப்ரவரி முதல் வாரத்திலேயே தாக்கல் செய்யப்பட்டு வருகிறது.
அதன்படி, ஜனவரி கடைசி வாரத்தில் தொடங்கி ஏப்ரல் முதல் வாரம் வரை இரண்டு கட்டங்களாக பட்ஜெட் கூட்டத்தொடர் நடைபெற்று வருகிறது. 2022-23ஆம் நிதியாண்டுக்கான பட்ஜெட் கூட்டத்தொடர் முதல் கட்டமாக கடந்த ஜனவரி மாதம் 31 ஆம் தேதி முதல் பிப்ரவரி 11ஆம் தேதி வரையும், இரண்டாம் கட்டமாக கடந்த மார்ச் மாதம் 14 ஆம் தேதி முதல் ஏப்ரல் 8ஆம் தேதி வரையும் இரண்டு கட்டங்களாக நடைபெற்றது.
இந்த நிலையில், 2023-24ஆம் நிதியாண்டுக்கான பட்ஜெட்டை தாக்கல் செய்வதற்கான பணிகளை மத்திய பாஜக அரசு தொடங்கியுள்ளது. கடந்த நிதியாண்டை போலவே இந்த முறையும் இரண்டு கட்டங்களாக பட்ஜெட் அமர்வு நடைபெறும் என தெரிகிறது. இந்த பட்ஜெட் கூட்டத்தொடரானது புதிய நாடாளுமன்றக் கட்டிடத்தில் நடைபெற வாய்ப்புள்ளதாக கூறப்படுகிறது.
புதிய நாடாளுமன்ற கட்டடம், மார்ச் மாதம் திறக்கப்படும் என மத்திய அரசு வட்டாரங்கள் தெரிவிக்கின்றன. கட்டுமான பணி முழு வேகத்தில் நடந்து வருவதாகவும், பிப்ரவரி மாதத்துக்குள் பணிகள் முடிவடைந்து மார்ச் மாதம் கட்டடம் திறந்து வைக்கப்படும் என கூறப்படுகிறது. இதனால், பட்ஜெட் கூட்டத்தொடரின் 2ஆவது அமர்வு புதிய நாடாளுமன்ற கட்டிடத்தில் நடக்கும் என்று எதிர்பார்க்கப்படுகிறது.
டெல்லியில் சுமார் 100 ஆண்டுகள் பழமை வாய்ந்த நாடாளுமன்ற கட்டடம் அமைந்துள்ளது. இந்த சூழலில் பிரம்மாண்டமான புதிய நாடாளுமன்றம் கட்டுவதற்கு மத்திய அரசு முடிவு செய்தது. அதன்படி, சென்ட்ரல் விஸ்டா மறுசீரமைப்புத் திட்டத்தின் கீழ் டெல்லியில் ரூ.970 கோடி மதிப்பீட்டில் 4 மாடிகளைக் கொண்ட புதிய நாடாளுமன்றம் கட்டப்பட்டு வருகிறது.
இந்த புதிய நாடாளுமன்ற கட்டடத்துக்கு கடந்த 2020ஆம் ஆண்டு டிசம்பா் 10ஆம் தேதி பிரதமர் மோடி அடிக்கல் நாட்டினார். புதிய நாடாளுமன்றத்தை எதிர்த்த வழக்குகள் மீது தீர்ப்பளித்த உச்ச நீதிமன்றம், புதிய நாடாளுமன்ற கட்டடம் உள்ளிட்டவற்றை அடக்கிய சென்ட்ரல் விஸ்டா திட்டத்துக்கு அனுமதி அளித்தது. இதையடுத்து, புதிய நாடாளுமன்ற கட்டடத்தின் கட்டுமான பணிகள் தொடங்கப்பட்டு பணிகள் விறுவிறுப்பாக நடைபெற்று வருகின்றன என்பது குறிப்பிடத்தக்கது.